March 30 | 10:59 AM

ന്യൂഡൽഹി: രാഹുൽ ഗാന്ധിയെ കോടതി കയറ്റുമെന്ന് ഐ.പി.എൽ നടത്തിപ്പുമായി ബന്ധപ്പെട്ട സാമ്പത്തിക തട്ടിപ്പുകേസിൽ രാജ്യം വിട്ട ലളിത് മോദി. മാനനഷ്ടക്കേസിൽ രാഹുൽ ഗാന്ധി ശിക്ഷിക്കപ്പെട്ടതിന് പിന്നാലെയാണ് ലളിത് മോദി രാഹുലിനെതിരെ രം​ഗത്തെത്തിയത്. അദ്ദേഹം സ്വയം വിഡ്ഢിയാകുന്നത് കാണാൻ താൻ കാത്തിരിക്കുകയായിരുന്നുവെന്ന് ലളിത് മോദി ട്വിറ്ററിൽ കുറിച്ചു. താൻ നീതിയിൽ നിന്ന് ഒളിച്ചോടിയവനാണെന്ന് ഓരോരുത്തരും വീണ്ടും വീണ്ടും ആരോപിക്കുന്നു. എന്തുകൊണ്ടാണത്? എങ്ങനെയാണ്? ഈ കുറ്റത്തിന് എപ്പോഴാണ് താൻ ശിക്ഷിക്കപ്പെട്ടിട്ടുള്ളതെന്നും ലളിത് മോദി ചോദിച്ചു. തനിക്കെതിരെ തെളിവുകള്‍ ഹാജരാക്കാന്‍ കോണ്‍ഗ്രസിന് കഴിഞ്ഞിട്ടില്ലെന്നും തനിക്കെതിരെ നടക്കുന്നത് വ്യാജപ്രചരണങ്ങളാണെന്നും ലളിത് മോദി ട്വീറ്റിൽ പറഞ്ഞു.

മോദി സമുദായത്തിനെതിരായ പരാമർശത്തിൽ രാഹുൽ ​ഗാന്ധി കുറ്റക്കാരനാണെന്ന് തെളിഞ്ഞതിനാലാണ് സൂറത്ത് കോടതി രാഹുൽ ഗാന്ധിയെ രണ്ട് വർഷം തടവിന് ശിക്ഷ വിധിച്ചിരുന്നത്. 'എല്ലാ കള്ളന്‍മാരുടെയും പേരിനൊപ്പം മോദിയെന്ന് വരുന്നതെങ്ങനെ' എന്നായിരുന്നു രാഹുൽ ​ഗാന്ധിയുടെ വിവാദ പരാമർശം. ഐപിഎല്ലിൽ സാമ്പത്തിക ക്രമക്കേടുകൾ ആരോപിച്ച് ലളിത് മോദിയെയും ഒളിവിൽ കഴിയുന്ന വജ്രവ്യാപാരി നീരവ് മോദിക്കുമെതിരെ രാഹുൽ ഗാന്ധി പരാമർശം നടത്തിയിരുന്നു.