രാഹുൽ ഗാന്ധിക്കെതിരായ അയോഗ്യതാ നടപടി; വയനാട്ടിൽ യുഡിഎഫ് പ്രക്ഷോഭത്തിലേക്ക്
March 28 | 04:15 PM
കൽപ്പറ്റ: രാഹുൽ ഗാന്ധിയുടെ പാർലമെന്റ് അംഗത്വം റദ്ദ് ചെയ്തതിൽ പ്രതിഷേധിച്ച് വയനാട്ടിൽ യുഡിഎഫ് പ്രക്ഷോഭത്തിലേക്ക്. ജില്ലയിൽ സമര പ്രതിഷേധ പരിപാടികൾ ശക്തമാക്കാനൊരുങ്ങുകയാണ് യുഡിഎഫ് നേതൃത്വം. സമരത്തിന്റെ ആദ്യഘട്ടമെന്നോണം മണ്ഡലത്തിൽ പഞ്ചായത്ത് അടിസ്ഥാനത്തിൽ ജനകീയ പ്രതിഷേധ സംഗമം നടത്തും. ബുധനാഴ്ച വൈകിട്ട് ആണ് പ്രതിഷേധ സംഗമം നടത്തുക. ഏപ്രിൽ ഒന്നിനു രാവിലെ കല്പറ്റ ബിഎസ്എൻഎൽ ഓഫീസിലേക്ക് മാർച്ച് സംഘടിപ്പിക്കും. മാർച്ചിൽ പാർട്ടിയുടെ ദേശീയ സംസ്ഥാന നേതാക്കൾ പങ്കെടുക്കും. നേരത്തെ പ്രതിഷേധ പരിപാടികളിൽ പങ്കെടുത്ത 60 കോൺഗ്രസ് പ്രവർത്തകർക്കെതിരെ പൊലീസ് കേസെടുത്തിരുന്നു.
എംപി സ്ഥാനത്ത് നിന്നും രാഹുൽ ഗാന്ധിയെ അയോഗ്യനാക്കി വിജ്ഞാപനമിറങ്ങിയതോടെ വയനാട് ലോക്സഭാ സീറ്റിൽ ഉപതിരഞ്ഞെടുപ്പിന് കളമൊരുങ്ങിയിരിക്കുകയാണ്. കോൺഗ്രസിന്റെ ഉറച്ച മണ്ഡലമായ വയനാട്ടിൽ രാഹുലിന് പകരം ആരായിരിക്കും കോൺഗ്രസിന്റെ സ്ഥാനാർഥി എന്നത് വളരെ നിർണായകമാണ്. എന്നാൽ രാഹുൽ കുറ്റക്കാരനാണെന്ന വിധി മേൽകോടതി സ്റ്റേ ചെയ്യുകയോ റദ്ദാക്കുകയോ ചെയ്താൽ അയോഗ്യതയും തിരഞ്ഞെടുപ്പും ഒഴിവാകും.