രാഹുല് ഗാന്ധി ആത്മഹത്യ ചെയ്ത ആദിവാസി യുവാവ് വിശ്വനാഥന്റെ വീട്ടിലെത്തി
February 13 | 11:18 AM
കോഴിക്കോട്: മെഡിക്കല് കോളേജിന് സമീപം തൂങ്ങിമരിച്ച നിലയില് കണ്ടെത്തിയ ആദിവാസി യുവാവ് വിശ്വനാഥന്റെ വീട് സന്ദര്ശിച്ച് രാഹുല് ഗാന്ധി എം.പി. കല്പ്പറ്റ പാറവയലിലുള്ള വീട്ടിലാണ് രാഹുല് ഗാന്ധി എത്തിയത്. വിശ്വനാഥന്റെ ഭാര്യയുമായി അദ്ദേഹം സംസാരിച്ചു. ആശുപത്രിയിലെ സുരക്ഷാ ജീവനക്കാര് മോഷണക്കുറ്റം ആരോപിച്ചതില് മനംനൊന്താണ് വിശ്വനാഥന് ആത്മഹത്യ ചെയ്തതെന്നാണ് കുടുംബം ആരോപിക്കുന്നത്. തങ്ങള്ക്ക് നീതി ലഭണമെന്നും കുടുംബം ആവശ്യപ്പെടുന്നു. ഈ പശ്ചാത്തലത്തില് കൂടിയാണ് രാഹുല് ഗാന്ധി വിശ്വനാഥന്റെ വീട് സന്ദർശിച്ചത്. ടി സിദ്ധിഖ് എംഎല്എ, ജനറല് സെക്രട്ടറി കെ.സി വേണുഗോപാല് എന്നിവര്ക്കൊപ്പമാണ് രാഹുല് വിശ്വനാഥന്റെ വീട്ടിലെത്തിയത്. കുടുംബം പങ്കുവെച്ച ആശങ്ക കെ സി വേണുഗോപാല് രാഹുലിന് വിശദീകരിച്ചുകൊടുത്തു.
വിശ്വനാഥന്റെ മരണത്തില് മനുഷ്യാവകാശ കമ്മീഷന് സ്വമേധയാ കേസെടുത്ത് പൊലീസ് അസിസ്റ്റന്റ് കമ്മീഷണറോടും ആശുപത്രി സൂപ്രണ്ടിനോടും അന്വേഷണം നടത്തി ഒരാഴ്ചയ്ക്കകം റിപ്പോര്ട്ട് സമര്പ്പിക്കാന് നിര്ദേശിച്ചു. കഴുത്തില് കുരുക്ക് മുറുകിയതാണ് മരണ കാരണമെന്നാണ് പ്രാഥമിക നിഗമനം.