'മധുവിന് നീതി കിട്ടിയിട്ടില്ല, 16 പ്രതികളും ശിക്ഷിക്കപ്പെടണം'; വിധിക്കെതിരെ അപ്പീല് പോകുമെന്ന് മധുവിന്റെ കുടുംബം
April 4 | 03:50 PM
പാലക്കാട്: കോടതി വിധിയില് പ്രതികരണവുമായി കൊല്ലപ്പെട്ട അട്ടപ്പാടി മധുവിന്റെ കുടുംബം. രണ്ട് പേരെ വെറുതെവിട്ട കോടതി വിധിക്കെതിരെ അപ്പീല് പോകുമെന്ന് അമ്മയും സഹോദരിയും വ്യക്തമാക്കി. മധുവിനെ കൊലപ്പെടുത്തിയതില് എല്ലാവരും കുറ്റക്കാരാണെന്ന് മധുവിന്റെ അമ്മ പ്രതികരിച്ചു. പതിനാല് പേര് കുറ്റക്കാരാണെന്ന് കണ്ടെത്തിയതില് സന്തോഷമുണ്ടന്നും എന്നാല് രണ്ട് പേരെ വെറുതെ വിട്ടതില് വിഷമമുണ്ടെന്ന് മധുവിന്റെ സഹോദരിയും പ്രതികരിച്ചു. ഇതിനെതിരെ വേണ്ടി വന്നാല് സുപ്രീംകോടതി വരെ പോകും.
'ഇത്രയും താഴെക്കിടയില് നിന്ന് കേസ് ഇവിടെ വരെ എത്തിക്കാന് കഴിഞ്ഞെങ്കില് അതില് സന്തോഷമുണ്ട്. കോടതിയോട് നന്ദി പറയുന്നു. മധുവിന് നീതി കിട്ടിയെന്ന് പറയാനാകില്ല. പതിനാറ് പേരും ശിക്ഷിക്കപ്പെടുന്നതിന് വേണ്ടിയാണ് പോരാടിയത്. എന്നാല് രണ്ട് പേരെ വെറുതെ വിട്ടു. ഇവരെ കൂടി ശിക്ഷിക്കുന്നതിനായി പോരാടും. ഇപ്പോളും തങ്ങളെ ഒറ്റപ്പെടുത്തുന്ന രീതിയിലുള്ള സംഭവങ്ങളുണ്ടെന്നും നേരിട്ടല്ലെങ്കിലും ഭീഷണി തുടരുന്നുണ്ടെന്നും സഹോദരി മാധ്യമങ്ങളോട് പ്രതികരിച്ചു.