പി കെ ഫിറോസിന്റെ അറസ്റ്റ് അന്യായം; പിന്നില് മുഖ്യമന്ത്രി തലത്തിലുള്ള ഗൂഢാലോചന: യൂത്ത് ലീഗ്
January 23 | 07:09 PM
ഡൽഹി: യൂത്ത് ലീഗ് സംസ്ഥാന ജനറല് സെക്രട്ടറി പി.കെ ഫിറോസിന്റെ അറസ്റ്റ് അന്യായമെന്ന് യൂത്ത് ലീഗ് ദേശീയ നേതൃത്വം. അറസ്റ്റിന് പിന്നില് മുഖ്യമന്ത്രി തലത്തിലുള്ള ഗൂഢാലോചന നടന്നിട്ടുണ്ടെന്ന് ലീഗ് ദേശീയ ഓര്ഗനൈസിംഗ് സെക്രട്ടറി ടി.പി അഷ്റഫലി പറഞ്ഞു. ഭയപ്പെടുത്തി കീഴ്പ്പെടുത്തുന്ന ഫാസിസ്റ്റ് ശൈലിയിലേക്ക് ഭരണം മാറിയെന്ന് യൂത്ത് ലീഗ് ദേശീയ ജനറല് സെക്രട്ടറി അഡ്വ. ഫൈസല് ബാബു കുറ്റപ്പെടുത്തി. പി.കെ ഫിറോസിന്റെ അറസ്റ്റിന് പിന്നാലെ നടത്തിയ വാര്ത്താ സമ്മേളനത്തിലായിരുന്നു നേതാക്കളുടെ പ്രതികരണം.
യൂത്ത് ലീഗ് സെക്രട്ടേറിയറ്റ് മാര്ച്ചിലെ സംഘര്ഷവുമായി ബന്ധപ്പെട്ടാണ് യൂത്ത് ലീഗ് നേതാവ് പി.കെ ഫിറോസിനെ പൊലീസ് അറസ്റ്റ് ചെയ്തത്. തിരുവനന്തപുരം കന്റോണ്മെന്റ് പൊലീസ് ആണ് ഫിറോസിനെ അറസ്റ്റ് ചെയ്തത്. പി.കെ ഫിറോസിന്റെ നേതൃത്വത്തിലായിരുന്നു കഴിഞ്ഞ ദിവസം സെക്രട്ടേറിയറ്റ് മാര്ച്ച് നടന്നത്. പ്രതിഷേധ മാര്ച്ച് വലിയ സംഘര്ഷത്തിലേക്ക് വഴിമാറുകയും നിരവധിപേര്ക്ക് പരിക്ക് ഏല്ക്കുകയും ചെയ്തിരുന്നു.