കോണ്ഗ്രസ് തന്റെ ശവക്കുഴി തോണ്ടുന്ന തിരക്കിലാണ്, താൻ രാജ്യത്തെ പാവപ്പെട്ടവരുടെ ജീവിതം മെച്ചപ്പെടാന് ഉതകുന്ന കാര്യങ്ങൾ ചെയ്യുന്ന തിരക്കിലും: നരേന്ദ്രമോദി
March 12 | 05:05 PM
ബെംഗളൂരു: കര്ണാടകയില് ബെംഗളൂരു-മൈസൂരു എക്സ്പ്രസ് വേ ഉദ്ഘാടന വേദിയില് കോണ്ഗ്രസിനെ കടന്നാക്രമിച്ച് പ്രധാനമന്ത്രി നരേന്ദ്രമോദി. കോണ്ഗ്രസ് തന്റെ ശവക്കുഴി തോണ്ടുന്നത് സ്വപ്നം കാണുമ്പോള് താന് പാവപ്പെട്ടവരുടെ ജീവിതം മെച്ചപ്പെടാന് ഉതകുന്ന ബെംഗളൂരു-മൈസൂരു എക്സ്പ്രസ്വേയുടെ നിര്മാണത്തിന്റെ തിരക്കിലായിരുന്നുവെന്ന് മോദി പറഞ്ഞു.
‘കോണ്ഗ്രസ് മോദിയുടെ ശവക്കുഴി തോണ്ടുന്നതാണ് സ്വപ്നം കാണുന്നത്. എന്നാല് ഈ രാജ്യത്തെ അമ്മമാരുടെയും സഹോദരിമാരുടെയും ജനങ്ങളുടെയും അനുഗ്രഹം എനിക്ക് സുരക്ഷാകവചം ഒരുക്കുന്ന കാര്യം അവര്ക്കറിയില്ല’ മോദി പറഞ്ഞു. 8,172 കോടി രൂപ ചെലവിട്ടു നിര്മിച്ച 118 കിലോമീറ്റര് ബെംഗളൂരു-മൈസൂരു എക്സ്പ്രസ് വേ രാജ്യത്തിന് സമര്പ്പിച്ച് സംസാരിക്കുകയായിരുന്നു അദ്ദേഹം. മൈസൂരു-കുശാല്നഗര് നാലുവരി പാതയുടെ നിര്മാണോദ്ഘാടനവും പ്രധാനമന്ത്രി നിര്വഹിച്ചു. 4,130 കോടിയാണ് പദ്ധതിയുടെ ചെലവ്. നിയമസഭാ തെരഞ്ഞെടുപ്പ് ആസന്നമായ കര്ണാടകയില് മാണ്ഡ്യ, ഹുബ്ബള്ളി-ധര്വാഡ് ജില്ലകളിലായി ഏകദേശം പതിനാറായിരം കോടി രൂപയുടെ പദ്ധതികളുടെ ശിലാസ്ഥാപനമാണ് മോദി നിര്വഹിച്ചത്.