ഭാരത് ജോഡോ യാത്ര ഇന്ന് ശ്രീനഗറില്; നാളെ സമാപിക്കും
January 29 | 12:12 PM
ശ്രീനഗർ: രാഹുല് ഗാന്ധി നയിക്കുന്ന ഭാരത് ജോഡോ യാത്ര ഇന്ന് ശ്രീനഗറില് പര്യടനം നടത്തും. നാളെ യാത്ര സമാപിക്കാന് ഇരിക്കെയാണ് ഇന്നത്തെ ശ്രീനഗറിലെ പര്യടനം. ശ്രീനഗറിലെ പാന്ത ചൗക്കില് നിന്ന് ഇന്ന് പത്തുമണിക്കാണ് യാത്ര ആരംഭിക്കുക. ശ്രീനഗറിലൂടെ യാത്ര പ്രവേശിച്ച പശ്ചാത്തലത്തില് കനത്ത സുരക്ഷാ സംവിധാനങ്ങളാണ് ഇന്നും ഒരുക്കിയിട്ടുള്ളത്.
12 മണിക്ക് ശ്രീനഗറിലെ ലാല്ചൗക്കില് രാഹുല്ഗാന്ധി ദേശീയ പതാക ഉയര്ത്തും. ശേഷം ഉച്ചയ്ക്ക് രണ്ടിന് പാര്ട്ടി സംസ്ഥാന ഓഫീസില് അദ്ദേഹം വാര്ത്താസമ്മേളനം നടത്തും. നാളെ നടക്കുന്ന സമാപന സമ്മേളനത്തില് കോണ്ഗ്രസിന്റെ എല്ലാ പ്രമുഖ നേതാക്കന്മാരും പ്രതിപക്ഷ പാര്ട്ടികളിലെ നേതാക്കന്മാരും പങ്കെടുക്കുമെന്ന് കോണ്ഗ്രസ് അറിയിച്ചു.
ശനിയാഴ്ച ജോഡോ യാത്രയില്, ജമ്മു കശ്മീര് മുന് മുഖ്യമന്ത്രിയും പിഡിപി അധ്യക്ഷയുമായ മെഹബൂബ മുഫ്തിയും പങ്കെടുത്തിരുന്നു. നേരത്തെ നാഷണല് കോണ്ഫറന്സ് നേതാവും ജമ്മു കശ്മീര് മുന് മുഖ്യമന്ത്രിയുമായ ഒമര് അബ്ദുള്ളയും ജോഡോ യാത്രയില് പങ്കെടുത്തിരുന്നു. രാഹുലിനൊപ്പം ബനിഹാലിലാണ് ഒമര് അബ്ദുള്ള പങ്കെടുത്തത്. രാഹുല് ഗാന്ധിയുടെ പ്രതിച്ഛായ മെച്ചപ്പെടുത്തുകയല്ല, രാജ്യത്തിന്റെ പ്രതിച്ഛായ മെച്ചപ്പെടുത്തുകയാണ് ഈ സന്ദര്ശനത്തിന്റെ ലക്ഷ്യമെന്നായിരുന്നു ഒമര് അബ്ദുള്ളയുടെ പ്രതികരണം.