എലത്തൂരിലെ ട്രെയിൻ ആക്രമണം: പ്രതി നോയിഡ സ്വദേശിയെന്ന് സൂചന; അന്വേഷണം ഊര്ജിതം
April 3 | 03:48 PM
കോഴിക്കോട്: എലത്തൂര് തീവണ്ടി ആക്രമണ കേസിലെ പ്രതിയാണെന്ന് സംശയിക്കുന്ന ഷെഹ്റുഫ് സെയ്ഫി കെട്ടിട നിര്മ്മാണ ജോലിക്കാരനാണെന്ന് സൂചന. ഇയാള് നോയിഡ സ്വദേശിയാണെന്ന് പൊലീസിന് നേരത്തെ വിവരം ലഭിച്ചിരുന്നു. ഇയാള് കോഴിക്കോടാണ് താമസിച്ചിരുന്നതെന്നും സൂചനയുണ്ട്.സംഭവത്തില് പ്രതിയെന്ന് സംശയിക്കുന്നയാളുടെ രേഖാചിത്രം പൊലീസ് നേരത്തെ പുറത്ത് വിട്ടിരുന്നു. ഇതിന് പിന്നാലെ നടത്തിയ അന്വേഷണത്തിലാണ് പ്രതിയെ സംബന്ധിച്ചുള്ള കൂടുതല് വിവരങ്ങള് പൊലീസിന് ലഭിക്കുന്നത്. പ്രത്യേക സംഘം രൂപീകരിച്ച് അന്വേഷണം ഊര്ജിതമാക്കിയെന്നും നിര്ണായക തെളിവുകള് ലഭിച്ചിട്ടുണ്ടെന്നും ഡിജിപി അനില്കാന്ത് അറിയിച്ചിരുന്നു. ക്രമസമാധാന ചുമതലയുള്ള എഡിജിപി എംആര് അജിത്കുമാറാണ് അന്വേഷണത്തിന് നേതൃത്വം നല്കുന്നത്.
അതേസമയം അക്രമിയുടേതെന്ന് സംശയിച്ച് പുറത്തുവിട്ട സിസിടിവി ദൃശ്യങ്ങളിലുള്ളത് മറ്റൊരാളാണെന്ന് പൊലീസ് വ്യക്തമാക്കിയിരുന്നു. ദൃശ്യങ്ങളിലുള്ളത് കാപ്പാട് സ്വദേശിയായ വിദ്യാര്ത്ഥിയാണ്. അക്രമിയുടേതെന്ന് സംശയിക്കുന്ന ബാഗില് നിന്ന് ലഭിച്ച നോട്ടുപുസ്തകങ്ങളിലെ കുറിപ്പുകള് ദുരൂഹത വര്ധിപ്പിക്കുന്നതാണ്. ഒരു കുപ്പി പെട്രോള്, നോട്ടുപുസ്തകം, വസ്ത്രങ്ങള്, കണ്ണട, പേഴ്സ്, ടിഫിന് ബോക്സ്, ഭക്ഷണം എന്നിവയാണ് ബാഗിലുണ്ടായിരുന്നത്. സമീപത്തുനിന്നായി ഒരു മൊബൈല് ഫോണും കണ്ടെടുത്തിരുന്നു.