ബഫര്‍ സോണ്‍: സര്‍ക്കാരിലേക്ക് പരാതികളുടെ കുത്തൊഴുക്ക് തുടരുന്നു
December 23 | 03:11 PM
തിരുവനന്തപുരം: ഭൂപടം സർക്കാർ പ്രസിദ്ധീകരിച്ചതിനു പിന്നാലെ ബഫര്‍ സോണിലെ ജനവാസ കേന്ദ്രങ്ങള്‍ സംബന്ധിച്ച് സര്‍ക്കാരിലേക്ക് പരാതികളുടെ കുത്തൊഴുക്ക്. ഇതുവരെ പതിനായിരത്തിലേറെ പരാതികളാണ് സര്‍ക്കാരിന് ലഭിച്ചത്. ഉപഗ്രഹ സര്‍വേയുമായി ബന്ധപ്പെട്ട് 12,000 പരാതികളോളമാണ് സര്‍ക്കാരിന് ലഭിച്ചത്. എന്നാല്‍ വനംവകുപ്പ് പുതിയ ഭൂപടം പ്രസിദ്ധീകരിച്ച സാഹചര്യത്തില്‍ ഉപഗ്രഹ സര്‍വേയുമായി ബന്ധപ്പെട്ട പരാതികള്‍ അതാത് തദ്ദേശ സ്വയംഭരണ സ്ഥാപനങ്ങള്‍ക്ക് നല്‍കാനാണ് സര്‍ക്കാര്‍ നിര്‍ദേശിച്ചിരിക്കുന്നത്. സര്‍ക്കാര്‍ പുറത്തിറക്കിയ ഭൂപടത്തില്‍ പല ജില്ലകളിലും ജനവാസ മേഖലകള്‍, കൃഷിയിടങ്ങള്‍ എന്നിവ ഉള്‍പ്പെടുന്നതിനാല്‍ ജനങ്ങള്‍ക്ക് ആശങ്ക ഏറുകയാണ്. വരും ദിവസങ്ങളില്‍ പരാതികളുടെ എണ്ണം ഇനിയും കൂടിയേക്കുമെന്നാണ് സര്‍ക്കാരിന്റെ കണക്കുകൂട്ടല്‍.
