മോദി-അദാനി കൂട്ടുകെട്ട് വീഡിയോകള് അടിച്ചമര്ത്തപ്പെടുന്നു എന്ന് യൂട്യൂബിനോട് രാഹുല് ഗാന്ധി; പരിശോധിക്കുമെന്ന് യൂട്യൂബ്
March 30 | 04:41 PM
ന്യൂഡല്ഹി: തന്റെ വീഡിയോകള് യൂട്യൂബില് അടിച്ചമര്ത്തപ്പെടുന്നു എന്ന പരാതിയുമായി രാഹുല് ഗാന്ധി. പ്രധാനമന്ത്രി നരേന്ദ്ര മോദിയും അദാനിയും തമ്മിലുളള സൗഹൃദത്തെ വിമര്ശിക്കുന്ന വീഡിയോകള് യൂട്യൂബില് അടിച്ചമര്ത്തപ്പെടുന്നു എന്നാണ് രാഹുലിന്റെ പരാതി. അദ്ദേഹത്തിന്റെ പരാതി യൂട്യൂബ് പരിശോധിച്ചുവരികയാണ്.
പ്രസ്തുത വീഡിയോകള്ക്ക് കാഴ്ച്ചക്കാരില്ലെന്നാണ് പരാതിയില് പറയുന്നത്. അദ്ദേഹത്തിന്റെ സോഷ്യല് മീഡിയ ടീം നല്കിയ അനലിറ്റിക്സ് അടക്കം തെളിവുകള് സഹിതമാണ് രാഹുലിന്റെ അനുയായികള് യൂട്യൂബിന് പരാതി നല്കിയിരിക്കുന്നത്.
അദാനി കുംഭകോണത്തിനെതിരെയും രാഹുല് ഗാന്ധിയെ ലോക്സഭയില് നിന്ന് അയോഗ്യനാക്കിയതിനെതിരെയും പ്രതിഷേധം തുടരാന് കോണ്ഗ്രസ് നേതൃത്വം തീരുമാനിച്ചിരിക്കുകയാണ്. അടുത്ത മാസം ആരംഭിക്കാനിരിക്കുന്ന സംസ്ഥാനങ്ങളിലുടനീളമുളള പ്രകടനങ്ങളും നേതൃത്വം ആസൂത്രണം ചെയ്തിട്ടുണ്ട്. അയോഗ്യനാക്കിയതിന് പിന്നാലെ ബുധനാഴ്ച പാര്ലമെന്റിലെത്തിയ രാഹുല് ഗാന്ധി പാര്ട്ടി ഓഫീസില് കോണ്ഗ്രസ് എംപിമാരുടെ യോഗത്തില് പങ്കെടുത്തു. പാര്ട്ടി അദ്ധ്യക്ഷന് മല്ലികാര്ജുന് ഖാര്ഗെയുടെ അധ്യക്ഷതയില് സോണിയ ഗാന്ധിയും രാജ്യസഭാംഗങ്ങളും ലോക്സഭാംഗങ്ങളും യോഗത്തില് പങ്കെടുത്തു.