സ്പീക്കര് വിളിച്ച കക്ഷി നേതാക്കളുടെ യോഗം അവസാനിച്ചു; നടപടി ആവശ്യത്തില് ധാരണയായില്ല
March 16 | 08:08 AM
തിരുവനന്തപുരം: നിയമസഭയിലെ സംഘര്ഷത്തിന്റെ പശ്ചാത്തലത്തില് സ്പീക്കര് വിളിച്ച കക്ഷി നേതാക്കളുടെ യോഗം അവസാനിച്ചു. വാച്ച് ആന്ഡ് വാര്ഡര്മാര്ക്കെതിരെ നടപടി സ്വീകരിക്കണമെന്ന ആവശ്യത്തില് തീരുമാനമായില്ല. നടപടി വേണമെന്ന നിലപാടില് പ്രതിപക്ഷം ഉറച്ചുനിന്നതോടെ യോഗം പിരിഞ്ഞു. സമാന്തരസഭ ചേര്ന്നതില് നടപടി വേണമെന്ന് ഭരണപക്ഷവും യോഗത്തില് ആവശ്യപ്പെട്ടു. മുഖ്യമന്ത്രി പിണറായി വിജയന്, പ്രതിപക്ഷ നേതാവ് വിഡി സതീശന് ഉള്പ്പെടെയുള്ള നേതാക്കളാണ് യോഗത്തില് പങ്കെടുത്തത്. എട്ടുമണിയോടെ സ്പീക്കറുടെ ഓഫീസിലാണ് യോഗം ആരംഭിച്ചത്.
സ്ത്രീകള്ക്കും കുട്ടികള്ക്കും എതിരെ അതിക്രമം തടയുക എന്ന വിഷയത്തില് പ്രതിപക്ഷം അവതരിപ്പിച്ച അടിയന്തര പ്രമേയത്തിന് അനുമതി നിഷേധിച്ചതിന് പിന്നാലെ അസാധാരണ സംഭവങ്ങളായിരുന്നു ഇന്നലെ സ്പീക്കറുടെ ഓഫീസിന് മുന്നില് അടക്കം നടന്നത്. സ്പീക്കറെ സംരക്ഷിക്കാന് ഭരണപക്ഷ എംഎല്എമാരും സ്പീക്കറുടെ ഓഫീസിന് മുന്നിലെത്തിയതോടെ പ്രതിപക്ഷ ഭരണപക്ഷ അംഗങ്ങള് തമ്മില് വാക്കേറ്റമുണ്ടായി. തുടര്ച്ചയായി അടിയന്തര പ്രമേയങ്ങള്ക്ക് സ്പീക്കര് അനുമതി നിഷേധിക്കുന്നതില് പ്രതിഷേധിച്ചാണ് പ്രതിപക്ഷം സ്പീക്കറുടെ ഓഫീസ് ഉപരോധിച്ചത്. സഭാമന്ദിരത്തില് ഭരണ പ്രതിപക്ഷ അംഗങ്ങള് ഏറ്റുമുട്ടിയത് അപൂര്വ സംഭവമാണ്.