സന്തോഷ് ട്രോഫി: ആദ്യ ഗ്രൂപ്പ് മത്സരത്തിൽ രാജസ്ഥാനെ എതിരില്ലാത്ത 7 ഗോളിന് തകർത്ത് കേരളം
December 26 | 07:32 PM
കോഴിക്കോട്: 76ാമത് സന്തോഷ് ട്രോഫി ടൂർണമെന്റിലെ ആദ്യ ഗ്രൂപ്പ് മത്സരത്തിൽ കേരളത്തിന് ജയം. രാജസ്ഥാനെ എതിരില്ലാത്ത 7 ഗോളുകൾക്കാണ് കേരളം പരാജയപ്പെടുത്തിയത്.
റിസ്വാൻ, വിഗ്നേഷ്, നരേഷ് എന്നിവർ ഇരട്ടഗോളുകള് നേടി. സ്വന്തം കാണികള്ക്ക് മുന്നില് ആദ്യപകുതിയില് തന്നെ 5-0ന്റെ ലീഡെടുത്ത കേരളത്തിന് അനായാസവും സമ്പൂര്ണ മേധാവിത്വവും നല്കുന്നതായി കളി. ശക്തരായ മിസോറാമും ബിഹാറും ആന്ധ്രാപ്രദേശും ജമ്മു കശ്മീരുമുള്ള ഗ്രൂപ്പില് നിന്ന് ആത്മവിശ്വാസത്തോടെ മുന്നോട്ടുപോകാന് കേരളത്തിന് ഈ വിജയം ആത്മവിശ്വാസമേകും.
കോഴിക്കോട് കോർപറേഷന് സ്റ്റേഡിയത്തിൽ എത്തിയ ആരാധകര്ക്ക് കാഴ്ചവിരുന്നേകി കേരളം. ആദ്യപകുതിയില് അഞ്ച് ഗോളടിച്ച് രാജസ്ഥാനെ ഞെട്ടിച്ച കേരളം രണ്ടാം പകുതിയില് രണ്ടെണ്ണം കൂടി വലയിലെത്തിച്ച് ആഘോഷം പൂര്ത്തിയാക്കുകയായിരുന്നു. സന്തോഷ് ട്രോഫിയില് നിലവിലെ ചാമ്പ്യന്മാര് കൂടിയാണ് കേരളം.