April 1 | 12:38 PM

പട്യാല: പഞ്ചാബ് മുൻ പിസിസി അധ്യക്ഷനും മുൻ ക്രിക്കറ്റ് താരവുമായ നവജോത് സിംഗ് സിദ്ദു ഇന്ന് ജയിൽ മോചിതനാകും. പട്യാല ജയിലിൽ കഴിയുന്ന സിദ്ദു മെയ് 16 നാണ് ജയിൽ മോചിതനാകേണ്ടിയിരുന്നത്.

നല്ല നടപ്പ് പരിഗണിച്ചാണ് 45 ദിവസം നേരത്തെ വിടുന്നത്. നല്ല പെരുമാറ്റം പാലിക്കുന്ന കുറ്റവാളിക്ക് ജയിലിൽ ചെലവഴിക്കുന്ന എല്ലാ മാസവും അഞ്ച് ദിവസത്തെ ഇളവ് ലഭിക്കാൻ നിയമം വ്യവസ്ഥ ചെയ്യുന്നുണ്ടെന്ന് അധികൃതർ വ്യക്തമാക്കി.

കാർ പാർക്കിങ്ങിന്റെ പേരിലുള്ള തർക്കത്തിനിടെ ഒരാൾ കൊല്ലപ്പെട്ട കേസിൽ സിദ്ദു കുറ്റക്കാരനാണെന്ന് കണ്ടെത്തിയ സുപ്രിംകോടതി കഴിഞ്ഞവർഷമാണ് ഒരു വർഷം തടവിന് വിധിച്ചിരുന്നത്. 1988 ഡിസംബർ 27 നായിരുന്നു കേസിന് ആസ്പദമായ സംഭവം.