November 26 | 10:48 AM

കണ്ണൂർ: 'ഒരു വർഷം ഒരു ലക്ഷം സംരംഭങ്ങൾ' പദ്ധതിയിൽ പുതിയ സംരംഭങ്ങൾ തുടങ്ങാൻ തദ്ദേശ സ്ഥാപനങ്ങൾ മുൻകൈയെടുക്കണമെന്ന് തദ്ദേശ സ്വയംഭരണ എക്‌സൈസ് വകുപ്പ് മന്ത്രി എം ബി രാജേഷ് പറഞ്ഞു. ജില്ലയിലെ തദ്ദേശ സ്വയംഭരണ സ്ഥാപന അധ്യക്ഷന്മാർ, സെക്രട്ടറിമാർ എന്നിവർ പങ്കെടുത്ത നവകേരള തദ്ദേശകം 2.0 അവലോകന യോഗം ജില്ലാ പഞ്ചായത്ത് ഹാളിൽ ഉദ്ഘാടനം ചെയ്യുകയായിരുന്നു മന്ത്രി.

സൂക്ഷ്മ സംരംഭങ്ങൾ ആരംഭിച്ച് തൊഴിലവസരങ്ങൾ വർധിപ്പിക്കാനാണ് സർക്കാർ ശ്രമം. ഇതിന്റെ ഭാഗമായുള്ള തൊഴിൽസഭകളിൽ ജനങ്ങളുടെ പ്രതീക്ഷ നിലനിർത്താൻ തദ്ദേശ സ്ഥാപനങ്ങൾ അവസരത്തിനൊത്തുയരണം. സൂക്ഷ്മ സംരംഭങ്ങൾ തൊഴിലവസരങ്ങളും സാമ്പത്തിക വളർച്ചയും സൃഷ്ടിക്കും. സംരംഭങ്ങൾ മുടക്കാൻ മുന്നിൽ നിൽക്കുന്നവരായി തദ്ദേശ സ്ഥാപനങ്ങളിലെ ജനപ്രതിനിധികളും ഉദ്യോഗസ്ഥരും മാറരുത്. ഇത്തരം പ്രതിച്ഛായ മാറി വരുന്നുണ്ട്. അതുകൊണ്ടാണ് 'ഈസ് ഓഫ് ഡൂയിംഗ് ബിസിനസി'ൽ ഒരു വർഷം കൊണ്ട് രാജ്യത്ത് 28ൽനിന്ന് 15ാം സ്ഥാനത്ത് എത്താൻ കേരളത്തിന് സാധിച്ചത്. എന്നാൽ, എല്ലാവരും മാറി എന്നല്ല, പഴയ മനോഭാവത്തിൽതന്നെ നിൽക്കുന്നവരും ഉണ്ട്-മന്ത്രി പറഞ്ഞു.

പ്രാദേശിക സാമ്പത്തിക വികസനം പോലെ തന്നെ പ്രധാനമാണ് അതിദാരിദ്ര്യ നിർമാർജനവുമെന്ന് മന്ത്രി പറഞ്ഞു. സമൂഹത്തിൽ പിന്തള്ളപ്പെട്ടുപോകുന്നവരെ പ്രത്യേകം കരുതുകയും പിന്തുണ നൽകുകയും വേണം. സർവേ നടത്തി അതിദരിദ്രരെ കണ്ടെത്തി പ്രശ്‌നങ്ങൾ നിർണയിച്ചിട്ടുണ്ട്. ഓരോ കുടുംബത്തിന്റെയും ആവശ്യങ്ങൾക്കനുസരിച്ച് സൂക്ഷ്മതല പദ്ധതികൾ തയ്യാറാക്കണം. ജനുവരി ഒന്നിന് മുമ്പ് ജില്ലയിലെ മുഴുവൻ അതിദരിദ്രർക്കും രേഖകൾ ഉറപ്പാക്കണം. 

നാല് വർഷം കൊണ്ട് കേരളത്തെ സമ്പൂർണ മാലിന്യമുക്ത സംസ്ഥാനമാക്കണം. മാലിന്യ സംസ്‌കരണത്തിന് ഫണ്ട് ലഭ്യമായിട്ടും വെല്ലുവിളി ഏറ്റെടുക്കാൻ തദ്ദേശ സ്ഥാപനങ്ങൾ തയ്യാറാവാതെ ഒഴിഞ്ഞുമാറുന്നതാണ് പ്രശ്‌നം. ഒറ്റപ്പെട്ട മുന്നേറ്റങ്ങൾക്കപ്പുറത്ത് പ്രശ്‌നപരിഹാരത്തിന് സാധിക്കണം. മാലിന്യശേഖരണത്തിനായുള്ള ഹരിതകർമ്മസേനയെ എല്ലാ വാർഡുകളിലും നിയോഗിക്കണം. ഹരിതകർമ്മസേന വീടുകളിൽനിന്നും യൂസേഴ്‌സ് ഫീ ശേഖരിക്കുന്നുവെന്ന് ഉറപ്പാക്കണം. ഉറവിട മാലിന്യ സംസ്‌കരണം നടപ്പിലാക്കി മാലിന്യം പൊതുസ്ഥലത്ത് തള്ളുന്നവർക്കെതിരെ കർശന നടപടി സ്വീകരിക്കണമെന്നും മന്ത്രി പറഞ്ഞു. 

യോഗത്തിൽ പ്രതിനിധികളുടെ അഭിപ്രായങ്ങളും നിർദേശങ്ങളും കേട്ട മന്ത്രി ഇവയിൽ അടിയന്തിര പ്രധാന്യമുള്ളവ ഉടൻ നടപ്പിലാക്കുമെന്ന് പറഞ്ഞു. പഞ്ചായത്തുകളിലെ ഐൽജിഎംഎസ് സോഫ്റ്റ്‌വെയർ കൂടുതൽ കാര്യക്ഷമമാക്കും. ഖരമാലിന്യ സംസ്‌കരണ പദ്ധതികൾക്ക് ഭൂമി വാങ്ങാൻ നഗരസഭകൾക്ക് അനുമതി നൽകണമെന്ന നിർദേശം സർക്കാർ പരിഗണിക്കും. നഗരസഭകളുടെ പെൻഷൻ ഫണ്ടിലേക്ക് 25 കോടി രൂപ അനുവദിച്ചിട്ടുണ്ട്. നഗരസഭകളിലെ അയ്യങ്കാളി തൊഴിലുറപ്പു പദ്ധതിയുടെ കുടിശ്ശിക ധനവകുപ്പിന്റെ ശ്രദ്ധയിൽപെടുത്തും. തെരുവിളക്കുകൾക്കുള്ള നിലാവ് പദ്ധതിയുടെ നടത്തിപ്പ് തദ്ദേശ സ്ഥാപനങ്ങൾക്ക് നിർവഹിക്കാം. കെഎസ്ഇബിയെ ആശ്രയിക്കേണ്ടതില്ല. കെട്ടിടങ്ങളിലെ കൂട്ടിച്ചേർക്കലുകൾ കണ്ടെത്തി നികുതി പുനർനിർണയിക്കാനുള്ള നടപടികൾ വകുപ്പ് പരിശോധിക്കും. പദ്ധതി വിഹിതത്തെ മാത്രം ആശ്രയിച്ച് തദ്ദേശ സ്ഥാപനങ്ങൾക്ക് മുന്നോട്ടുപോകാനാവില്ല. പിഎംഎവൈ പദ്ധതി സമയബന്ധിതമായി പൂർത്തിയാക്കിയ നഗരസഭകളിൽ ഇന്ത്യയിൽ മൂന്നാം സ്ഥാനം നേടിയ മട്ടന്നൂർ നഗരസഭയെ മന്ത്രി അഭിനന്ദിച്ചു. മികച്ച പഞ്ചായത്ത് സെക്രട്ടറിമാരായി തെരഞ്ഞെടുക്കപ്പെട്ട കെ വി പ്രകാശൻ, കെ വി പത്മനാഭൻ, എന്നിവർക്കും ഐഎൽജിഎംഎസ് ആപ്ലിക്കേഷൻ സേവനം ലഭ്യമാക്കിയ മികച്ച പഞ്ചായത്തുകളായ കടന്നപ്പള്ളി-പാണപ്പുഴ, കല്ല്യാശ്ശേരി, മാട്ടൂൽ എന്നിവയ്ക്കും മന്ത്രി ഉപഹാരം നൽകി.

ജില്ലാ പഞ്ചായത്ത് ഹാളിൽ ചേർന്ന യോഗത്തിൽ പ്രസിഡണ്ട് പി പി ദിവ്യ അധ്യക്ഷത വഹിച്ചു. കണ്ണൂർ കോർപറേഷൻ മേയർ അഡ്വ. ടി ഒ മോഹനൻ, ഗ്രാമപഞ്ചായത്ത് അസോസിയേഷൻ ജില്ലാ പ്രസിഡണ്ട് എം ശ്രീധരൻ, ബ്ലോക്ക് പഞ്ചായത്ത് അസോസിയേഷൻ ജില്ലാ പ്രസിഡണ്ട് പി പി ഷാജിർ, കൂത്തുപറമ്പ് നഗരസഭാ ചെയർപേഴ്‌സൻ വി സുജാത ടീച്ചർ, മലപ്പട്ടം ഗ്രാമപഞ്ചായത്ത് പ്രസിഡൻറ് കെ പി രമണി, ആന്തൂർ നഗരസഭാ ചെയർമാൻ പി മുകുന്ദൻ, പഞ്ചായത്ത് ഡയറക്ടർ എച്ച് ദിനേശൻ, ജില്ലാ കലക്ടർ എസ് ചന്ദ്രശേഖർ, അഡീഷനൽ ഡവലപ്‌മെൻറ് കമ്മീഷണർ സി പി ജോസഫ്, തദ്ദേശ സ്വയംഭരണ വകുപ്പ് ജോയിൻറ് ഡയറക്ടർ ടി ജെ അരുൺ, തദ്ദേശ സ്ഥാപന അധ്യക്ഷന്മാർ, സെക്രട്ടറിമാർ തുടങ്ങിയവർ പങ്കെടുത്തു.