പാർട്ടിയുമായി ഇടഞ്ഞിട്ടില്ല, ജാഥ മാത്രമല്ല സംഘടനാ പ്രവർത്തനം; ജനകീയ പ്രതിരോധ ജാഥയിൽ പങ്കെടുക്കാൻ ഇ.പി ജയരാജൻ തൃശൂരിൽ
March 4 | 03:30 PM
തൃശൂർ: സിപിഐഎം സംസ്ഥാന സെക്രട്ടറി എം.വി ഗോവിന്ദൻ നയിക്കുന്ന ജനകീയ പ്രതിരോധ ജാഥയിൽ പങ്കെടുക്കാൻ എൽഡിഎഫ് കൺവീനർ ഇ.പി ജയരാജൻ തൃശൂരിലെത്തി. പാർട്ടി നിർദേശത്തെ തുടർന്നല്ല ജാഥയിൽ പങ്കെടുക്കുന്നതെന്ന് ജാഥയിൽ പങ്കെടുക്കുന്നതിന് മുന്നോടിയായി ഇ.പി മാധ്യമങ്ങളോട് പ്രതികരിച്ചു. ഇന്ന് വൈകിട്ട് തേക്കിൻകാട് മൈതാനിയിൽ വെച്ചാണ് ജില്ലയിലെ ആദ്യ ദിവസത്തെ ജാഥയുടെ സമാപന സമ്മേളനം നടക്കുക. ഈ പരിപാടിയിൽ ആയിരിക്കും ഇ.പി ജയരാജൻ പങ്കെടുക്കുക. 'ജാഥ മാത്രമല്ല സംഘടനാ പ്രവർത്തനം. ജാഥയിൽ പങ്കെടുക്കാൻ ഇനിയും വൈകിയിട്ടില്ല. പാര്ട്ടിയുമായി ഞാൻ ഇടഞ്ഞിട്ടില്ല. പ്രതിരോധ ജാഥയില് പങ്കെടുക്കുന്നത് പാർട്ടിയുടെ പ്രത്യേക നിര്ദേശപ്രകാരമല്ല, ജാഥയില് പങ്കെടുക്കുന്നില്ലെന്നത് മാധ്യമങ്ങളുണ്ടാക്കിയ പ്രശ്നമാണ്. മാധ്യമങ്ങൾ വല്ലാത്ത പുകമറ സൃഷ്ടിക്കുന്നു. യാഥാർത്ഥ്യം ജനങ്ങളെ ബോധ്യപ്പെടുത്താന് വേണ്ടിയാണ് തൃശൂരിലെ പൊതു സമ്മേളനത്തിൽ പങ്കെടുക്കാനെത്തിയത്,' എന്നും ഇ.പി ജയരാജൻ മാധ്യമങ്ങളോട് പറഞ്ഞു.
സിപിഐഎം പ്രതിരോധ ജാഥ കണ്ണൂരിൽ എത്തിയിട്ടും ഇ പി യാത്രയില് പങ്കെടുത്താത്തതിനെ തുടർന്നായിരുന്നു മാധ്യമങ്ങളിൽ വാർത്തയായത്. യാത്രയുടെ ഉദ്ഘാടന പരിപാടിയില് നിന്നും ഇ.പി വിട്ടുനിന്നിരുന്നു.