തദ്ദേശ വാര്‍ഡുകളിലെ ഉപതെരഞ്ഞെടുപ്പ്; കണ്ണൂരില്‍ മൂന്നിടത്തും എല്‍ഡിഎഫ്
March 1 | 01:19 PM
കണ്ണൂര്‍: ജില്ലയില്‍ ഉപതെരഞ്ഞെടുപ്പ് നടന്ന മൂന്നിടത്തും എല്‍ഡിഎഫ് വാര്‍ഡ് നിലനിര്‍ത്തി. ശ്രീകണ്ഠാപുരം നഗരസഭയില്‍ കോട്ടൂര്‍ വാര്‍ഡ്, മയ്യില്‍ പഞ്ചായത്ത് എട്ടാം വാര്‍ഡ്, പേരാവൂര്‍ ഗ്രാമപഞ്ചായത്ത് ഒന്നാം വാര്‍ഡ് എന്നിവിടങ്ങളിലാണ് ഉപതെരഞ്ഞെടുപ്പ് നടന്നത്. കോട്ടൂര്‍ വാര്‍ഡില്‍ എല്‍ഡിഎഫ് സ്ഥാനാര്‍ത്ഥി കെസി അജിത 189 വോട്ടിന് വിജയിച്ചു. കോണ്‍ഗ്രസില്‍ നിന്നും കെ സവിതയും ബിജെപി സ്ഥാനാര്‍ത്ഥിയായി ടി.ഒ ഇന്ദിരയുമാണ് മത്സരിച്ചത്.
വാര്‍ഡ് കൗണ്‍സിലറായിരുന്ന സിപിഐഎമ്മിലെ ടി.സി ഭവാനി മൃഗസംരക്ഷണവകുപ്പില്‍ ജോലി ലഭിച്ചതിനെ തുടര്‍ന്ന് രാജിവെച്ചതിനാലാണ് ഉപതെരഞ്ഞെടുപ്പ് നടന്നത്. കഴിഞ്ഞ തെരഞ്ഞെടുപ്പില്‍ 252 വോട്ടുകളുടെ ഭൂരിപക്ഷത്തിനായിരുന്നു ടിസി ഭവാനി വിജയിച്ചത്.മയ്യില്‍ പഞ്ചായത്തിലെ വള്ളിയോട് വാര്‍ഡില്‍ എല്‍ഡിഎഫ് സ്ഥാനാര്‍ത്ഥി ഇ.പി രാജന്‍ 301 വോട്ടുകള്‍ക്ക് വിജയിച്ചു. 1335 വോട്ടുകളാണ് ആകെയുള്ളത്. ഇതില്‍ 1049 വോട്ടുകള്‍ പോള്‍ ചെയ്തതില്‍ 656 വോ്ട്ട് എല്‍ഡിഎഫും 366 വോട്ട് യുഡിഎഫും നേടി. ബിജെപി 38 വോട്ട് മാത്രമാണ് ലഭിച്ചത്.
പേരാവൂര്‍ ഗ്രാമപഞ്ചായത്ത് ഒന്നാം വാര്‍ഡില്‍ എല്‍ഡിഎഫ് സ്ഥാനാര്‍ത്ഥി ടി രഗിലാഷ് 146 വോട്ടിന് വിജയിച്ചു. ആകെ 521 വോട്ടാണ് എല്‍ഡിഎഫ് നേടിയത്. യുഡിഎഫ് സ്വതന്ത്രന്‍ -375 ,എന്‍ഡിഎ- 253 സ്വതന്ത്ര സ്ഥാനാര്‍ത്ഥികളായ കെ.പി സുഭാഷ് 11, സുഭാഷ് കക്കണ്ടി 2 വോട്ട് നേടി.സംസ്ഥാനത്തെ 28 വാര്‍ഡുകളിലെ തദ്ദേശ വാര്‍ഡുകളിലേക്ക് നടത്തിയ ഉപതെരഞ്ഞെടുപ്പ് ഫലമാണ് പുറത്തുവന്നുകൊണ്ടിരിക്കുന്നത്. 23 ഗ്രാമ പഞ്ചായത്ത് വാര്‍ഡുകളിലേക്കും 2 നഗരസഭ വാര്‍ഡുകളിലേക്കും ഓരോ ജില്ലാ പഞ്ചായത്ത്, കോര്‍പറേഷന്‍ ഡിവിഷന്‍ വാര്‍ഡ്, ബ്ലോക്ക് പഞ്ചായത്ത് വാര്‍ഡ് എന്നിവിടങ്ങളിലേക്കുമായിരുന്നു തെരഞ്ഞെടുപ്പ് നടന്നത്. 74.38 ശതമാനമാണ് പോളിംഗ്.
