തലശ്ശേരിയിലെ മൂന്ന് ഹോട്ടലുകളില് നിന്ന് പഴകിയ ഭക്ഷണം പിടികൂടി
January 6 | 10:23 AM
കണ്ണൂർ: തലശ്ശേരി നഗരത്തിലെ ഹോട്ടലുകളില് ആരോഗ്യ വിഭാഗം നടത്തിയ പരിശോധനയില് പഴകിയ ഭക്ഷണം പിടികൂടി. സി പാരിസ്, തലശ്ശേരി റസ്റ്റോറന്റ്, എവിവി റസ്റ്റോറന്റ് എന്നിവിടങ്ങളില് നിന്നാണ് പഴകിയ ഭക്ഷണം പിടികൂടിയത്. ചിക്കന് കറി, ചിക്കന് ഫ്രൈ, പൊറോട്ട, ചോറ്, ചപ്പാത്തി, ന്യൂഡില്സ്, കറി മസാലകള്, പൊരിച്ച മീന്, ബിരിയാണി റൈസ്, ചൈനീസ് ഭക്ഷണ സാധനങ്ങള്ക്കായി തയ്യാറാക്കി വെച്ച ഭക്ഷ്യ യോഗ്യമല്ലാത്ത പച്ചക്കറികള് എന്നിവയാണ് പ്രധാനമായി പിടിച്ചെടുത്തത്. ദിവസങ്ങളും ആഴ്ചകളും പഴകിയതാണ് പിടിച്ചെടുത്തവയില് പലതുമെനാനതാണ് ഞെട്ടിക്കുന്ന വസ്തുത. രാവിലെ 6 മണി മുതല് നഗരത്തിലെ വിവിധ ഭാഗങ്ങളിലെ 12 കടകളിലാണ് ആരോഗ്യ വിഭാഗം പരിശോധന നടത്തിയത്. പഴകിയ ഭക്ഷണ സാധനങ്ങള് പിടിച്ചെടുത്ത സ്ഥാപനങ്ങള്ക്ക് ലൈസന്സ് റദ്ദ് ചെയ്യാതിരിക്കുന്നതിന് കാരണം കാണിക്കല് നോട്ടീസ് നല്കി.
ഹെല്ത്ത് സൂപ്പര്വൈസര് കെ.പ്രമോദ്, എച്ച്.ഐമാരായ വി.പി ബാബു, കെ ബാബു, അരുണ്.എസ് നായര് എന്നിവര് പരിശോധനയില് സംബന്ധിച്ചു. നഗരസഭ നല്കിയ ഭക്ഷ്യ സുരക്ഷ മാനദണ്ഡങ്ങളും ലൈസന്സ് വ്യവസ്ഥകളും പാലിക്കുന്നത് സംബന്ധിച്ച് വരും ദിവസങ്ങളിലും പരിശോധന തുടരുമെന്ന് ഉദ്യോഗസ്ഥർ പറഞ്ഞു.