മാൻഡോസ് ചുഴലിക്കാറ്റ് ചെന്നൈയിൽ നിന്നുള്ള 16 വിമാനങ്ങൾ റദ്ദാക്കി
December 10 | 02:47 PM
ചെന്നൈ: മാൻഡോസ് ചുഴലിക്കാറ്റ് ശക്തിപ്രാപിച്ചതോടെ ചെന്നൈയിൽ നിന്നുള്ള 16 വിമാനങ്ങൾ റദ്ദാക്കി. മോശം കാലാവസ്ഥയെ തുടർന്ന് 13 ആഭ്യന്തര വിമാനങ്ങളും മൂന്ന് അന്താരാഷ്ട്ര വിമാനങ്ങളുമാണ് റദ്ദാക്കിയത്. യാത്രക്കാർ വിശദവിവരങ്ങൾക്കായി അതത് എയർലൈനുകളുമായി ബന്ധപ്പെടണമെന്ന് ചെന്നൈ ഇന്റർനാഷണൽ എയർപോർട്ട് അധികൃതർ അറിയിച്ചു.
മാൻഡോസ് ചുഴലിക്കാറ്റ് തമിഴ്നാട്ടിലെ മാമല്ലപുരത്ത് (മഹാബലിപുരം) പുലർച്ചെ 1.30 ഓടെ പ്രവേശിച്ചത്. മണിക്കൂറിൽ 75 കിലോമീറ്റർ വേഗതയിലാണ് കാറ്റടിച്ചത്. ചെന്നൈ നഗരത്തിൽ മഴ തുടരുന്നതിനാൽ പട്ടിനപാക്കം മേഖലയിൽ വെള്ളക്കെട്ട് തുടരുകയാണ്. ചെന്നൈയിൽ ഇരുന്നൂറോളം മരങ്ങൾ കടപുഴകി. കനത്ത മഴയിൽ നഗരത്തിലെ തെരുവുകൾ വെള്ളത്തിനടിയിലായി. എന്നാൽ, ക്രിയാത്മകമായ ഇടപെടൽ മൂലം വൻ നാശനഷ്ടം ഒഴിവായതായി അധികൃതർ പറഞ്ഞു.