പൊലീസ് കസ്റ്റഡിയിലായിരിക്കെ ഇരുമ്പനം സ്വദേശി മരിച്ച സംഭവം; ഹൃദയാഘാതം മൂലമെന്ന് പോസ്റ്റുമോര്ട്ടം റിപ്പോര്ട്ട്
March 26 | 10:03 PM
കൊച്ചി: തൃപ്പുണിത്തുറ ഹില്പാലസ് പൊലീസ് സ്റ്റേഷനില് വെച്ച് മരിച്ചയാളുടെ പോസ്റ്റുമോര്ട്ടം റിപ്പോര്ട്ട് പുറത്ത്. ഇരുമ്പനം സ്വദേശി മനോഹരന്റെ മരണം ഹൃദയാഘാതം മൂലമെന്നാണ് പ്രാഥമിക പോസ്റ്റുമോര്ട്ടം റിപ്പോര്ട്ടില് പറയുന്നത്. ശരീരത്തില് മര്ദ്ദനമേറ്റതിന്റെ പാടുകളില്ലെന്നും റിപ്പോര്ട്ടില് പറയുന്നു. മനോഹരന് ഹൃദ്രോഗത്തിന്റെ ലക്ഷണങ്ങളുണ്ടായിരുന്നുവെന്ന് റിപ്പോര്ട്ടില് സൂചനയുണ്ട്. ആന്തരിക അവയവങ്ങള് പരിശോധനയ്ക്ക് അയച്ചിരിക്കുകയാണ്. തൃശൂര് മെഡിക്കല് കോളേജിലായിരുന്നു പോസ്റ്റുമോര്ട്ടം നടപടികള് നടന്നത്. മനോഹരനെ പൊലീസ് മര്ദ്ദിച്ചിരുന്നുവെന്ന് നാട്ടുകാര് ആരോപിച്ചിരുന്നു. ശനിയാഴ്ച രാത്രിയിലായിരുന്നു സംഭവം. നിര്ത്താതെ പോയ വാഹനം പിന്തുടര്ന്ന ശേഷമായിരുന്നു മര്ദ്ദനമെന്നും ഇതിനു ശേഷമാണ് മനോഹരനെ പൊലീസ് സ്റ്റേഷനിലേക്ക് കൊണ്ടുപോയതെന്നും നാട്ടുകാര് ആരോപിച്ചിരുന്നു. അലക്ഷ്യമായി വാഹനം ഓടിച്ചു എന്ന കാരണത്താലാണ് പൊലീസ് മനോഹരനെ കസ്റ്റഡിയിലെടുത്തത്. കൈ കാണിച്ചിട്ടും നിര്ത്താതെ പോയ ഇയാളെ പിടികൂടി പൊലീസ് സ്റ്റേഷനിലേക്ക് കൊണ്ടുവരികയായിരുന്നുവെന്ന് പൊലീസ് പറഞ്ഞു. കസ്റ്റഡിയിലിരിക്കെ മനോഹരന് പൊലീസ് സ്റ്റേഷനില് കുഴഞ്ഞുവീഴുകയായിരുന്നു. ഉടന് തന്നെ ആശുപത്രിയിൽ എത്തിച്ചെങ്കിലും ജീവന് രക്ഷിക്കാനായില്ല.