ബിജെപി സര്‍ക്കാരിനെ തങ്ങള്‍ക്ക് താഴെയിറക്കണം; കോണ്‍ഗ്രസ് തിരഞ്ഞെടുപ്പിന് ശരിക്കും തയ്യാര്‍: ഡി.കെ ശിവകുമാര്‍
March 29 | 03:11 PM
ബെംഗളൂരു: കര്‍ണാടക നിയമസഭ തിരഞ്ഞെടുപ്പിന് കോണ്‍ഗ്രസ് ശരിക്കും തയ്യാറാണെന്ന് കോണ്‍ഗ്രസ് സംസ്ഥാന അദ്ധ്യക്ഷന്‍ ഡി.കെ ശിവകുമാര്‍. ബിജെപി സര്‍ക്കാരിനെ തങ്ങള്‍ക്ക് താഴെയിറക്കണമെന്നും അദ്ദേഹം പറഞ്ഞു. തിരഞ്ഞെടുപ്പ് കമ്മീഷന് സംസ്ഥാനത്തെ വോട്ടെടുപ്പ് ദിനം പ്രഖ്യാപിക്കുന്നതിന് തൊട്ടുമുന്‍പായിരുന്നു ശിവകുമാറിന്റെ പ്രതികരണം. സംസ്ഥാനത്തെ വികസനത്തെ മുന്‍നിര്‍ത്തിയും സംസ്ഥാനത്തും രാജ്യത്തും ഒരു അഴിമതിയില്ലാത്ത സര്‍ക്കാരിന് വേണ്ടിയുമായിരിക്കും ഈ തിരഞ്ഞെടുപ്പ്. അഴിമതി അതിന്റെ അങ്ങേയറ്റത്താണ്, പ്രധാനമന്ത്രി നരേന്ദ്രമോദി അതിനെ പ്രോത്സാഹിപ്പിക്കുകയും ചെയ്യുന്നു. അദ്ദേഹം തന്റെ പാര്‍ട്ടി നേതാക്കള്‍ക്കെതിരെ ഒരു നടപടിയും സ്വീകരിക്കുന്നില്ലെന്നും ഡി.കെ ശിവകുമാര്‍ പറഞ്ഞു.
നരേന്ദ്ര മോദിയും രാഹുല്‍ ഗാന്ധിയും തമ്മില്‍ നേരിട്ടുള്ള പോരാട്ടം എന്ന നിലക്കാണ് ഈ തിരഞ്ഞെടുപ്പ് വിലയിരുത്തപ്പെടുക. ലോക്സഭാ തിരഞ്ഞെടുപ്പിന് മുമ്പ് നടക്കുന്ന പ്രധാന തിരഞ്ഞെടുപ്പ് എന്ന രാഷ്ട്രീയ പ്രാധാന്യവും കര്‍ണാടക തിരഞ്ഞെടുപ്പിനുണ്ട്. കര്‍ണാടകയിലെ കോലാറില്‍ നടത്തിയ പ്രസംഗത്തിലെ ഒരു പരാമര്‍ശത്തിന്റെ പേരിലാണ് രാഹുല്‍ ഗാന്ധി ലോക്‌സഭയില്‍ നിന്നും അയോഗ്യനാക്കപ്പെട്ടത്. ഇതിനോടുള്ള ജനങ്ങളുടെ പ്രതികരണം കൂടിയായിരിക്കും കര്‍ണാടകയിലെ തിരഞ്ഞെടുപ്പ് ഫലം എന്ന വിലയിരുത്തലുമുണ്ട്. മെയ് 10 ന് ഒറ്റ ഘട്ടമായാണ് കര്‍ണാടകത്തില്‍ വോട്ടെടുപ്പ് നടക്കുക. മെയ് 13 നാണ് വോട്ടെണ്ണല്‍. കര്‍ണാടകത്തില്‍ തിരഞ്ഞെടുപ്പ് സര്‍വേകള്‍ കോണ്‍ഗ്രസിന് നേരിയ മുന്‍തൂക്കം പ്രവചിച്ചിട്ടുണ്ട്.
