November 10 | 06:02 AM

കണ്ണൂർ: ഇന്ത്യൻ തെരഞ്ഞെടുപ്പ് കമ്മീഷന്റെ പ്രത്യേക സംക്ഷിപ്ത വോട്ടർ പട്ടിക പുതുക്കലിന്റെ ഭാഗമായി വോട്ടർ ബോധവത്കരണ പരിപാടി ആരംഭിച്ചു. ജില്ലാതല ഉദ്ഘാടനം കണ്ണൂർ ഗവ. മുനിസിപ്പൽ ഹയർസെക്കണ്ടറി സ്‌കൂളിൽ രാമചന്ദ്രൻ കടന്നപ്പള്ളി എം എൽ എ നിർവ്വഹിച്ചു.

വിദ്യാർഥികളിലൂടെ മുതിർന്നവരെ ബോധവത്കരിക്കുകയാണ് ലക്ഷ്യം. ഇതിനായി ഹൈസ്‌കൂൾ, ഹയർസെക്കണ്ടറി, കോളേജ് എന്നിവിടങ്ങളിൽ രൂപീകരിച്ച തെരഞ്ഞെടുപ്പ് സാക്ഷരത ക്ലബ്ബുകൾ മുഖേന ബോധവത്കരണം നടത്തും. പട്ടിക പുതുക്കലിന്റെ ഭാഗമായി പേര് ചേർക്കാനും തെറ്റ് തിരുത്താനും വിലാസം മാറ്റാനും സാധിക്കും. ആധാർ നമ്പർ തിരിച്ചറിൽ കാർഡുമായി ബന്ധിപ്പിക്കാൻ ഓൺലൈനായി അപേക്ഷ നൽകാം. എല്ലാ വർഷവും ജനുവരി ഒന്ന്, ഏപ്രിൽ ഒന്ന്, ജൂലൈ ഒന്ന്, ഒക്ടോബർ ഒന്ന് തീയ്യതികളിൽ 18 വയസ് തികയുന്നവർക്കും 17 വയസ് പൂർത്തിയായവർക്ക് മുൻകൂട്ടിയും പട്ടികയിൽ ഉൾപ്പെടാൻ അപേക്ഷിക്കാം. വോട്ടർ ഹെൽപ്പ് ലൈൻ മൊബൈൽ ആപ്പ്, വോട്ടർ പോർട്ടൽ, nvsp.in എന്നിവ വഴിയാണ് ഓൺലൈനായി അപേക്ഷിക്കാനാകുക.

കരട് വോട്ടർ പട്ടിക പ്രസിദ്ധീകരണം ജില്ലാ കലക്ടർ എസ് ചന്ദ്രശേഖർ ബി എൽ ഒ എം കെ ലതക്ക് നൽകി നിർവ്വഹിച്ചു. കണ്ണൂർ താലൂക്ക് തഹസിൽദാർ സുരേഷ് ചന്ദ്രബോസ് ആധ്യക്ഷത വഹിച്ചു. ജില്ലാ ഇലക്ഷൻ ഡെപ്യൂട്ടി കലക്ടർ ലിറ്റി ജോസഫ്, തഹസിൽദാർ ആഷിഖ് തോട്ടോൻ (എൽ ആർ), ഡെപ്യൂട്ടി തഹസിൽദാർമാരായ കെ ജയരാജ് (ഇലക്ഷൻ), കെ വി ഷാജു എന്നിവർ സംസാരിച്ചു.