November 15 | 06:25 AM

ആറളം ഫാമിൽ ഗ്രാമവണ്ടി പദ്ധതി നടപ്പാക്കുന്നു
ആറളംഫാം ആദിവാസി പുനരധിവാസ മേഖലയിലെ യാത്രാ ക്ലേശം പരിഹരിക്കാൻ ഗ്രാമവണ്ടി പദ്ധതി നടപ്പാക്കുന്നു. ആറളം ഗ്രാമപഞ്ചായത്ത്, കെ എസ് ആർ ടി സി, പട്ടികവർഗ വികസന വകുപ്പ് എന്നിവ ചേർന്നാണ് ബസ് സർവ്വീസുകൾ ആരംഭിക്കുന്നത്.

ദിവസവും രാവിലെ ഫാമിൽ നിന്നും വളയംചാൽ-കീഴ്പ്പള്ളി-ഇരിട്ടി റൂട്ടിലേക്കും തിരിച്ചും സർവ്വീസ് നടത്തും. തുടർന്ന് ഇരിട്ടി-മട്ടന്നൂർ-കണ്ണൂർ റൂട്ടിൽ സഞ്ചരിച്ച് ഫാമിൽ തിരികെയെത്തും. ഇതോടെ ആറളം പുനരധിവാസ മേഖല, ആറളം കൃഷി ഫാം, ആറളം ഹയർസെക്കണ്ടറി സ്‌കൂൾ, പ്രീമെട്രിക് ഹോസ്റ്റൽ, എം ആർ എസ് ഹോസ്റ്റൽ എന്നിവിടങ്ങളിലെയും പഞ്ചായത്തിന്റെ മറ്റ് മേഖലകളിലെയും യാത്രാ പ്രശ്‌നത്തിന് പരിഹരമാകുമെന്നാണ് പ്രതീക്ഷ. പുനരധിവാസ മേഖലയിൽ താമസിക്കുന്ന 1812 കുടുംബങ്ങളും കൂടുതലായി ആശ്രയിക്കുന്നത് സ്വകാര്യ വാഹനങ്ങളെയാണ്. ഗോത്രസാരഥി പദ്ധതിയിലൂടെ ഫാം സ്‌കൂളിലെ 649 ആദിവാസി കുട്ടികൾക്ക് നിലവിൽ യാത്രാ സൗകര്യമുണ്ട്. ഗ്രാമവണ്ടി ആരംഭിക്കുന്നതോടെ കുട്ടികൾക്കും ഈ സൗകര്യം ഉപയോഗിക്കാനാകും.

പദ്ധതി പ്രകാരം ബസിന് ഡീസൽ ലഭ്യമാക്കേണ്ടത് ഗ്രാമപഞ്ചായത്താണ്. പഞ്ചായത്ത് ആവശ്യപ്പെടുന്ന റൂട്ടുകളിലേക്കാണ് സർവീസ് നടത്തുക. ഇതിനായി രണ്ടു ബസുകളാണ് കെ എസ് ആർ ടി സിയോട് ആവശ്യപ്പെട്ടിട്ടുള്ളത്. ഡിസംബർ ആദ്യ വാരം തന്നെ സർവീസ് ആരംഭിക്കാൻ കഴിയുമെന്നാണ് പ്രതീക്ഷയെന്നും റൂട്ട് മാപ്പ് തയ്യാറായി കഴിഞ്ഞതായും ആറളം ഗ്രാമപഞ്ചായത്ത് പ്രസിഡണ്ട് കെ പി രാജേഷ് പറഞ്ഞു.

സ്വയം തൊഴിൽ വായ്പ
സംസ്ഥാന പട്ടികജാതി പട്ടികവർഗ വികസന കോർപ്പറേഷൻ പട്ടികജാതി വിഭാഗത്തിനായി നടപ്പാക്കുന്ന സ്വയം തൊഴിൽ വായ്പ പദ്ധതിയിലേക്ക് അപേക്ഷ ക്ഷണിച്ചു. ജില്ലയിലെ തൊഴിൽ രഹിതരായ യുവതീ യുവാക്കൾക്ക് അപേക്ഷിക്കാം. 50,000 രൂപ മുതൽ 50 ലക്ഷം രൂപ വരെയാണ് വായ്പ തുക. അപേക്ഷകർ 18 നും 55നും ഇടയിൽ പ്രായമുള്ളവരായിരിക്കണം. നാല് മുതൽ ഒമ്പത് ശതമാനം വരെ പലിശ നിരക്കിൽ തുക 36 മാസം മുതൽ 60 തുല്യ മാസഗഡുക്കളായി തിരിച്ചടക്കണം. കോർപ്പറേഷന്റെ നിബന്ധനകൾക്കനുസരിച്ച് ആവശ്യമായ ഉദ്യോഗസ്ഥ ജാമ്യമോ, വസ്തു ജാമ്യമോ ഹാജരാക്കണം. താൽപര്യമുള്ളവർ അപേക്ഷാ ഫോറത്തിനും വിശദ വിവരങ്ങൾക്കുമായി കോർപ്പറേഷന്റെ ജില്ലാ ഓഫീസുമായി ബന്ധപ്പെടുക. ഫോൺ: 0497-2705036, 9400068513.

ഓംബുഡ്‌സ്മാൻ സിറ്റിങ് 24ന്
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി, പ്രധാനമന്ത്രി ആവാസ് യോജന (ഗ്രാമീൺ) എന്നിവയുമായി ബന്ധപ്പെട്ട പരാതികൾ സ്വീകരിക്കാൻ നവംബർ 24ന് ജില്ലാ എം ജി എൻ ആർ ഇ ജി എസ് ഓംബുഡ്‌സ്മാൻ തളിപ്പറമ്പ് ബ്ലോക്ക് പഞ്ചായത്ത് ഓഫീസിൽ സിറ്റിങ് നടത്തും. രാവിലെ 11 മുതൽ ഉച്ചക്ക് ഒരു മണി വരെ നടക്കുന്ന സിറ്റിങ്ങിൽ പരാതികൾ നേരിട്ട് നൽകാം. ഇ മെയിൽ, ഫോൺ, തപാൽ എന്നിവ വഴിയും പരാതി സമർപ്പിക്കാം. ഫോൺ: 9447287542. ഇ മെയിൽ: ombudsmanmgnregskannur@gmail.com, ombudsmanpmayg@gmail.com

പാരമ്പര്യേതര ട്രസ്റ്റി നിയമനം
തളിപ്പറമ്പ് താലൂക്കിലെ ചുഴലി ഭഗവതി ക്ഷേത്രം, മാണിയൂർ സുബ്രഹ്മണ്യ സ്വാമി ക്ഷേതം എന്നിവിടങ്ങളിൽ പാരമ്പര്യേതര ട്രസ്റ്റിമാരെ നിയമിക്കാൻ ക്ഷേത്ര പരിസരവാസികളിൽ നിന്നും അപേക്ഷ ക്ഷണിച്ചു. അപേക്ഷാ ഫോറം മലബാർ ദേവസ്വം ബോർഡിന്റെ നീലേശ്വരത്തുള്ള അസി.കമ്മീഷണറുടെ ഓഫീസിലും തളിപ്പറമ്പ് ഇൻസ്‌പെക്ടറുടെ ഓഫീസിലും www.malabardevaswom.kerala.gov.in ലും ലഭിക്കും. പൂരിപ്പിച്ച അപേക്ഷ ഡിസംബർ അഞ്ചിന് വൈകീട്ട് അഞ്ച് മണിക്കകം നീലേശ്വരത്തെ അസി.കമ്മീഷണറുടെ ഓഫീസിൽ ലഭിക്കണം.

കോഷൻ ഡെപ്പോസിറ്റ് കൈപ്പറ്റണം
2012-2013 അധ്യയന വർഷം മട്ടന്നൂർ ഗവ.പോളിടെക്‌നിക്കിൽനിന്ന് പഠനം പൂർത്തിയാക്കിയിട്ടും കോഷൻ ഡെപ്പോസിറ്റ് കൈപ്പറ്റാത്ത വിദ്യാർഥികൾ നവംബർ 21നകം തുക തിരികെ വാങ്ങണമെന്ന്  പ്രിൻസിപ്പൽ അറിയിച്ചു. ഇതിനായി തിരിച്ചറിയൽ രേഖ സഹിതം നേരിട്ട് അപേക്ഷിക്കണം. അല്ലാത്തപക്ഷം തുക സർക്കാരിലേക്ക് തിരിച്ചടക്കും.

വിചാരണ മാറ്റി
നവംബർ 15,16 തിയതികളിൽ രാവിലെ 11ന് കലക്ട്രേറ്റിൽ വിചാരണ നടത്താനിരുന്ന കണ്ണൂർ താലൂക്കിലെ ദേവസ്വം പട്ടയ കേസുകൾ യഥാക്രമം ഡിസംബർ 28, 29 തീയതികളിലേക്ക് മാറ്റിയതായി എൽ ആർ ഡെപ്യൂട്ടി കലക്ടർ അറിയിച്ചു.

ഫാർമസിസ്റ്റ് നിയമനം
കുന്നോത്തുപറമ്പ് കുടുംബാരോഗ്യ കേന്ദ്രത്തിൽ ഫാർമസിസ്റ്റിനെ താൽക്കാലികമായി നിയമിക്കുന്നു. താൽപര്യമുള്ളവർ ഗവ. അംഗീകൃത സർട്ടിഫിക്കറ്റുകളുമായി നവംബർ 15ന് രാവിലെ 11 മണിക്ക് കുന്നോത്തുപറമ്പ് എഫ് എച്ച് സിയിൽ അഭിമുഖത്തിന് ഹാജരാകണം. ഫോൺ: 0490 2313266.

കുളമ്പു രോഗ പ്രതിരോധ കുത്തിവെപ്പ് മൂന്നാംഘട്ടം: ജില്ലാതല ഉദ്ഘാടനം 15ന്  
ദേശീയ ജന്തുരോഗ നിയന്ത്രണ പദ്ധതിയുടെ ഭാഗമായ കുളമ്പുരോഗ പ്രതിരോധ കുത്തിവെപ്പ് മൂന്നാംഘട്ടത്തിലേക്ക്. ജില്ലാതല ഉദ്ഘാടനം നവംബർ 15ന് രാവിലെ 10 മണിക്ക് ജില്ലാ വെറ്ററിനറി കേന്ദ്രത്തിൽ മേയർ അഡ്വ. ടി ഒ മോഹനൻ നിർവഹിക്കും.

നവംബർ 15 മുതൽ ഡിസംബർ എട്ട് വരെയുള്ള 21 പ്രവൃത്തി ദിവസങ്ങളിലാണ് വാക്സിനേറ്റർമാർ വീടുകളിലെത്തി കുത്തിവെപ്പ് നടത്തുക. നാലു മാസത്തിന് മുകളിൽ പ്രായമുള്ള മൃഗങ്ങൾക്കാണ് കുത്തിവെപ്പ്. ജില്ലയിലെ 91706 പശുക്കളെയും 2449 എരുമ/പോത്തുകളെയും കുത്തിവെപ്പിന് വിധേയമാക്കും. ഇതിനായി കർഷകരിൽ നിന്ന് ഫീസ് ഈടാക്കില്ല. കുത്തിവെപ്പ് എടുത്താൽ പനി, പാൽ കുറയുക തുടങ്ങിയ പാർശ്വഫലങ്ങൾ ഉണ്ടാവില്ല. കുളമ്പുരോഗ പ്രതിരോധ കുത്തിവെപ്പ് സംസ്ഥാനത്ത് നിയമപ്രകാരം നിർബന്ധമാക്കിയിട്ടുണ്ട്. അതിനാൽ ലൈസൻസുകൾ, വിവിധ സർക്കാർ ആനുകൂല്യങ്ങൾ തുടങ്ങിയവ ലഭിക്കുന്നതിന് കുത്തിവെപ്പ് നിർബന്ധമാണ്. പ്രതിരോധ കുത്തിവെപ്പ് മൂലം അപകടങ്ങൾ സംഭവിച്ചാൽ സർക്കാർ നഷ്ടപരിഹാരം നൽകും. കുത്തിവെപ്പ് എടുക്കാൻ അനുവദിക്കാത്ത കർഷകരുടെ വിവരങ്ങൾ മൃഗസംരക്ഷണ വകുപ്പ് ഡയറക്ടർക്ക് റിപ്പോർട്ട് ചെയ്യും.

2030നകം ഇന്ത്യയെ കുളമ്പുരോഗ മുക്തമാക്കുകയാണ് പദ്ധതിയുടെ ലക്ഷ്യം. പാൽ, മാംസം എന്നിവയുടെ ഉത്പാദനത്തിൽ സ്വയംപര്യാപ്തത കൈവരിക്കുക, കയറ്റുമതി ശക്തമാക്കുക, കർഷകരുടെ വരുമാനം വർധിപ്പിക്കുക എന്നിവയും ലക്ഷ്യമിടുന്നു. മൃഗസംരക്ഷണ വകുപ്പിന്റെ കുളമ്പുരോഗ പ്രതിരോധ കുത്തിവെപ്പ് പദ്ധതിയായ ഗോരക്ഷ നടപ്പാക്കിയതിനെ തുടർന്ന് കഴിഞ്ഞ ഒരു വർഷമായി ജില്ലയിൽ കുളമ്പുരോഗ ബാധ റിപ്പോർട്ട് ചെയ്തിട്ടില്ല.

ഉദ്യോഗ് 2022 മെഗാ  മെഗാ ജോബ് ഫെയർ
കണ്ണൂർ ജില്ലാ എംപ്ലോയ്‌മെൻറ് എക്‌സ്‌ചേഞ്ച് നവംബർ 27ന് കണ്ണൂർ ഗവ. പോളിടെക്‌നിക് കോളേജിൽ 2022 ഉദ്യോഗ് 2022 എന്ന പേരിൽ മെഗാ ജോബ് ഫെയർ സംഘടിപ്പിക്കുന്നു. ഐടി, ആരോഗ്യം, ബാങ്കിങ്, എൻജിനീയറിങ്, ഓട്ടോമൊബൈൽ അഡ്മിനിസ്‌ട്രേഷൻ തുടങ്ങി വിവിധ മേഖലകളിലെ തൊഴിലവസരങ്ങൾ നൽകുന്ന മേളയിൽ സംസ്ഥാനത്തിനകത്തെയും പുറത്തെയും നിരവധി പ്രമുഖ സ്വകാര്യ കമ്പനികൾ പങ്കാളികളാകും. പങ്കെടുക്കാൻ ആഗ്രഹിക്കുന്ന ഉദ്യോഗാർഥികൾ താഴെപ്പറയുന്ന ഗൂഗിൾ ഫോം ലിങ്ക് മുഖേന നവംബർ 26 വൈകുന്നേരം അഞ്ച് മണിക്ക് മുൻപായി പേര് രജിസ്റ്റർ ചെയ്യണമെന്ന് ജില്ലാ എംപ്ലോയ്‌മെന്റ് ഓഫീസർ അറിയിച്ചു.  https://forms.gle/V2Ha77JTi8Hz1jn97  താൽപര്യമുള്ള തൊഴിൽ ദാതാക്കൾക്ക് ബന്ധപ്പെടാം:  ഫോൺ: 6282942066,൦൪൯൭൨൭൦൦൮൩൧

ഡിജിറ്റൽ സർവ്വെ: എഴുത്തു പരീക്ഷ 20ന്
ജില്ലയിൽ ഡിജിറ്റൽ സർവ്വെക്കായി ഹെൽപ്പർമാരെ നിയമിക്കാൻ നവംബർ 20ന് രാവിലെ 10.30 മുതൽ 12.30 വരെ ചെമ്പേരി വിമൽ ജ്യോതി എഞ്ചിനീയറിങ് കോളേജിൽ സെന്റർ ഫോർ മാനേജ്മെന്റ് ഡവലപ്മെന്റ് മുഖേന എഴുത്തു പരീക്ഷ നടക്കും. ജില്ലാ എംപ്ലോയ്മെന്റ് ഓഫീസിൽ നിന്നും ലഭ്യമാക്കിയ ലിസ്റ്റുകളിലെ ഉദ്യോഗാർഥികൾക്കായാണ് പരീക്ഷ. അഡ്മിഷൻ ടിക്കറ്റ് 'എന്റെ ഭൂമി' പോർട്ടലിൽ ലഭിക്കും.

ശിശുദിനാചരണം:  പഠനോപകരണങ്ങളും കളിപ്പാട്ടങ്ങളും വിതരണം ചെയ്തു
ശിശുദിനാചരണത്തിന്റെ ഭാഗമായി ജില്ലയിലെ 91 സ്റ്റുഡന്റ് പൊലീസ് കേഡറ്റ് യൂണിറ്റുകളിലെ കേഡറ്റുകളും എസ് പി സി പൂർവ്വ വിദ്യാർഥി കൂട്ടായ്മയായ പയനിയേഴ്സും ചേർന്ന് സമാഹരിച്ച പഠനോപകരണങ്ങൾ, കളിപ്പാട്ടങ്ങൾ, കുഞ്ഞുടുപ്പുകൾ, സ്പോർട്സ്, കരകൗശല സാമഗ്രികൾ എന്നിവ വിതരണം ചെയ്തു. സ്‌കൂളുകൾക്ക് സമീപമുള്ള പ്രാഥമിക വിദ്യാലയങ്ങൾ, അങ്കണവാടികൾ, സ്പെഷ്യൽ സ്‌കൂളുകൾ, ബഡ്സ് സ്‌കൂളുകൾ എന്നിവിടങ്ങളിലെ കുട്ടികൾക്കാണ് വിതരണം ചെയ്തത്.

ജില്ലാതല ഉദ്ഘാടനം താവക്കര ഗവ. യു പി സ്‌കൂളിൽ കണ്ണൂർ സിറ്റി അഡീഷണൽ പൊലീസ് സൂപ്രണ്ട് എ വി പ്രദീപ് നിർവ്വഹിച്ചു. താവക്കര ഗവ.യു പി സ്‌കൂൾ പ്രധാനാധ്യാപകൻ രാധാകൃഷ്ണൻ മാണിക്കോത്ത് അധ്യക്ഷത വഹിച്ചു. വിദ്യാഭ്യാസ ഉപ ഡയറക്ടർ വി എ ശശീന്ദ്രവ്യാസ് മുഖ്യാതിഥിയായി. നാർക്കോട്ടിക് അസി. പൊലീസ് കമ്മീഷ്ണർ ജയൻ ഡൊമനിക്, എസ് പി സി അസി. ജില്ലാ നോഡൽ ഓഫീസർ കെ രാജേഷ്, എസ് പി സി കണ്ണൂർ സിറ്റി പ്രൊജക്ട് അസിസ്റ്റന്റ് സി എം ജയദേവൻ, പി ടി എ പ്രസിഡണ്ട് കെ രശ്മി, എസ് പി സി പയനിയേസ് അഡീഷണൽ. കോ-ഓർഡിനേറ്റർ ചന്ദന ശിവദാസ്, എം ഷൈജു തുടങ്ങിയവർ പങ്കെടുത്തു.

കൊവിഡ് ലോക്ഡൗൺ കാലത്ത് ജില്ലയിൽ ആരംഭിച്ച ഈ പ്രവർത്തനം പിന്നീട് സംസ്ഥാനതലത്തിൽ ഏറ്റെടുക്കുകയും തുടർച്ചയായി മൂന്ന് വർഷം തുടരുകയും ചെയ്തിട്ടുണ്ട്. കഴിഞ്ഞ വർഷം ജില്ലയിൽ നിന്ന് 8.15 ലക്ഷം രൂപയുടെ സമ്മാനപ്പൊതികളാണ് കുട്ടികൾക്ക് വിതരണം ചെയ്തത്. ജില്ലയിലെ ഏഴ് പോലീസ് സബ്ബ് ഡിവിഷനുകളിലും പോലീസ് സ്റ്റേഷൻ, സ്‌കൂളുകൾ എന്നിവ കേന്ദ്രീകരിച്ചും വിവിധ ശിശുദിനാചരണ പരിപാടികൾ സംഘടിപ്പിച്ചു.

സെമിനാർ: 17നകം രജിസ്റ്റർ ചെയ്യണം
കേരള ഖാദി ഗ്രാമ വ്യവസായ ബോർഡും അഖിലേന്ത്യാ ഖാദി കമ്മീഷനും ചേർന്ന് ജില്ലാ ഖാദി ഗ്രാമ വ്യവസായ ഓഫീസിന്റെ ആഭിമുഖ്യത്തിൽ ഏകദിന ബോധവത്കരണ സെമിനാർ സംഘടിപ്പിക്കുന്നു. സംരംഭകർക്കായുള്ള പുതിയ പദ്ധതികളുടെ പ്രചാരണത്തിന്റെ ഭാഗമായി നടത്തുന്ന സെമിനാർ നവംബർ 19ന് രാവിലെ 10ന് കാഞ്ഞിരങ്ങാട് റൂഡ്സെറ്റ് ഇൻസ്റ്റിറ്റ്യൂട്ടിൽ തളിപ്പറമ്പ് ബ്ലോക്ക് പഞ്ചായത്ത് പ്രസിഡണ്ട് സി എം കൃഷ്ണൻ ഉദ്ഘാടനം ചെയ്യും. താൽപര്യമുള്ളവർ 17ന് വൈകീട്ട് മൂന്നിനകം ജില്ലാ ഖാദി ഗ്രാമ വ്യവസായ ഓഫീസുമായി ബന്ധപ്പെട്ട് രജിസ്റ്റർ ചെയ്യണം. ഫോൺ: 0497 2700057.

മുട്ടക്കോഴി വളർത്തലിൽ പരിശീലനം
കണ്ണൂർ മൃഗസംരക്ഷണ പരിശീലന കേന്ദ്രത്തിൽ നവംബർ 18, 19 തീയതികളിൽ മുട്ടക്കോഴി വളർത്തലിൽ പരിശീലനം നൽകും. താൽപര്യമുള്ള കണ്ണൂർ, കാസർകോട്, കോഴിക്കോട് ജില്ലകളിലെ കർഷകർ നവംബർ 17നകം 04972763473 എന്ന നമ്പറിൽ പേര് രജിസ്റ്റർ ചെയ്യണം.

ഭരണാനുമതി
തളിപ്പറമ്പ് മണ്ഡലം എം എൽ എയുടെ 2020-21 വർഷത്തെ പ്രത്യേക വികസന നിധിയിൽ ഉൾപ്പെടുത്തി 4.60 ലക്ഷം രൂപ വിനിയോഗിച്ച് തളിപ്പറമ്പ് വിദ്യാഭ്യാസ സാംസ്‌കാരിക നിലയത്തിന് മുന്നിലെ ട്രാൻസ്ഫോർമർ മാറ്റുന്ന പ്രവൃത്തിക്ക് ജില്ലാ കലക്ടർ ഭരണാനുമതി നൽകി.

ക്വട്ടേഷൻ
കണ്ണൂർ ഗവ.എഞ്ചിനീയറിങ് കോളേജിൽ ഹാൻഡ് ബോൾ കോർട്ട് നിർമ്മിക്കാൻ ക്വട്ടേഷൻ ക്ഷണിച്ചു. നവംബർ 28ന് ഉച്ചക്ക് 12.30 വരെ ക്വട്ടേഷൻ സ്വീകരിക്കും.

കണ്ണൂർ ഗവ.എഞ്ചിനീയറിങ് കോളേജിലെ ജി ഒ ക്വാർട്ടേഴ്സ് എ, ബി ബ്ലോക്കിൽ ചുറ്റുമതിൽ നിർമ്മിക്കാൻ ക്വട്ടേഷൻ ക്ഷണിച്ചു. നവംബർ 30ന് ഉച്ചക്ക് 12.30 വരെ ക്വട്ടേഷൻ സ്വീകരിക്കും. ഫോൺ: 0497 2780226.

യോഗ്യതാ പട്ടിക പ്രസിദ്ധീകരിച്ചു
സഹകരണ സർവീസ് പരീക്ഷ ബോർഡിന്റെ 2021 നവംബർ 30 ലെ 11/2021 നമ്പർ വിജ്ഞാന പ്രകാരം 115 സംഘം/ബാങ്കുകളിലായി 301 ഒഴിവുകളിലേക്ക് 2022 ജൂലൈ 23ന് ജൂനിയർ ക്ലാർക്ക്/കാഷ്യർ തസ്തികയിലേക്ക് നടത്തിയ ഒ.എം.ആർ പരീക്ഷയുടെ യോഗ്യതാ പട്ടിക പ്രസിദ്ധീകരിച്ചു. വിശദവിവരങ്ങൾക്ക്: www.csebkerala.org.

വൈദ്യുതി മുടങ്ങും
ധർമ്മശാല ഇലക്ട്രിക്കൽ സെക്ഷനിലെ ടി എം ആർ, ലേഡീസ് ഹോസ്റ്റൽ, മോത്തി, കടമ്പേരി, കടമ്പേരി അമ്പലം, സി കെ കുന്ന്, അയ്യങ്കോവിൽ, ആഷ ക്രഷർ, വനിത വ്യവസായം, സായി കൃപ, പീലേരി, ബക്കളം ടൗൺ, സ്നേഹ ഇൻ, കൃഷ്ണ റസിഡൻസി, ഡിറ്റർജന്റ്, പെട്രോൾ പമ്പ്, ആയുർവേദ ലേഡീസ് ഹോസ്റ്റൽ എന്നീ ട്രാൻസ്ഫോർമർ പരിധിയിൽ നവംബർ 15 ചൊവ്വ രാവിലെ എട്ട് മുതൽ വൈകീട്ട് അഞ്ച് മണി വരെ വൈദ്യുതി മുടങ്ങും.

പാടിയോട്ടുചാൽ ഇലക്ട്രിക്കൽ സെക്ഷനിലെ ചക്കാലക്കുന്ന്, ഏണ്ടി, കോലാച്ചിക്കുണ്ട്, പൂവത്തിങ്കാട്, വെളിച്ചംതോട് എന്നീ ട്രാൻസ്ഫോർമർ പരിധിയിൽ നവംബർ 15 ചൊവ്വ രാവിലെ എട്ട് മുതൽ വൈകീട്ട് അഞ്ച് മണി വരെ വൈദ്യുതി മുടങ്ങും.

വെള്ളൂർ ഇലക്ട്രിക്കൽ സെക്ഷനിലെ കാങ്കോൽ സബ്‌സ്റ്റേഷൻ, വെസ്റ്റ് കോസ്റ്റ്, കരിങ്കുഴി, അമല, വെൽക്കോ, ഏച്ചിലാംവയൽ വായനശാല എന്നീ ട്രാൻസ്‌ഫോർമർ പരിധിയിൽ നവംബർ 15 ചൊവ്വ രാവിലെ എട്ട് മുതൽ വൈകീട്ട് അഞ്ച് മണി വരെ വൈദ്യുതി മുടങ്ങും.

പയ്യാവൂർ ഇലക്ട്രിക്കൽ സെക്ഷനിലെ കോയിപ്ര, കാട്ടിക്കണ്ടം എന്നിവിടങ്ങളിൽ നവംബർ 15ന് രാവിലെ ഒമ്പത് മണി മുതൽ വൈകീട്ട് അഞ്ച് വരെ വൈദ്യുതി മുടങ്ങും.

കാടാച്ചിറ ഇലക്ട്രിക്കൽ സെക്ഷനിലെ നാമ്പോലൻമുക്ക്, കേളപ്പൻ മുക്ക്, ഹസൻമുക്ക്, കോയ്യോട് പോസ്റ്റ് ഓഫീസ്, തൈക്കണ്ടി സ്‌കൂൾ, ചെമ്പിലോട് എസ്റ്റേറ്റ് എന്നീ ട്രാൻസ്ഫോർമർ പരിധിയിൽ നവംബർ 15ന് രാവിലെ ഏഴ് മണി മുതൽ ഉച്ചക്ക് 2.30 വരെയും തങ്കേകുന്ന് ട്രാൻസ്ഫോർമർ പരിധിയിൽ രാവിലെ ഏഴ് മണി മുതൽ ഉച്ചക്ക് 2.30 വരെയും ഭാഗികമായി വൈദ്യുതി മുടങ്ങും.

വേങ്ങാട് ഇലക്ട്രിക്കല്‍ സെക്ഷനിലെ കോയിലോട്, കൈതച്ചാല്‍ ട്രാന്‍സ്ഫോര്‍മര്‍ പരിധികളില്‍ നവംബര്‍ 15ന് രാവിലെ 9.30 മുതല്‍ വൈകിട്ട് അഞ്ച് വരെ ഭാഗികമായോ/ പൂര്‍ണ്ണമായോ വൈദ്യുതി മുടങ്ങും