തൊഴിലുറപ്പ് പദ്ധതി 42 പരാതികൾ പരിഹരിച്ചു പി ആർ ഡി അറിയിപ്പുകൾ
November 2 | 05:41 AM
തൊഴിലുറപ്പ് പദ്ധതി: 42 പരാതികൾ പരിഹരിച്ചു
തൊഴിലുറപ്പ് പദ്ധതിക്കായി സർക്കാർ നിയോഗിച്ച ഓംബുഡ്സ്മാൻ അഞ്ച് മാസത്തിനിടെ ജില്ലയിലെ 42 പരാതികൾ പരിഹരിച്ചു. പദ്ധതി പ്രവർത്തനത്തിലെ അപാകതകൾ, പോരായ്മകൾ, സാമ്പത്തിക തിരുമറി, അനുവദനീയമല്ലാത്ത പ്രവൃത്തികൾ ഏറ്റെടുത്ത് നടപ്പാക്കൽ, പ്രവൃത്തി സ്ഥലങ്ങളിലെ സൗകര്യങ്ങൾ നിഷേധിക്കൽ എന്നിവ സംബന്ധിച്ച പരാതികളാണ് ഓംബുഡ്സ്മാൻ കെ എം രാമകൃഷ്ണൻ പരിഹരിച്ചത്.
38 പരാതികൾ വിവിധ ബ്ലോക്ക് ഓഫീസുകളിൽ നടത്തിയ സിറ്റിങ്ങിലും മറ്റുള്ളവ ഇ മെയിൽ, കത്തുകൾ എന്നിവ വഴിയുമാണ് ലഭിച്ചത്. പ്രവൃത്തി സ്ഥലങ്ങളിൽ തൊഴിലാളികൾക്ക് സുരക്ഷാ സംവിധാനങ്ങൾ ഒരുക്കാൻ ഓംബുഡ്സ്മാൻ വിവിധ പഞ്ചായത്തുകൾക്ക് നിർദേശം നൽകി. പദ്ധതിയിലെ പ്രശ്നങ്ങൾ ചൂണ്ടിക്കാട്ടി ചീഫ് സെക്രട്ടറി, മിഷൻ ഡയറക്ടർ, പ്രോഗ്രാം കോ-ഓർഡിനേറ്റർ ആൻഡ് ജില്ലാ കലക്ടർ, ജോയിന്റ് പ്രോഗ്രാം കോ-ഓർഡിനേറ്റർ എന്നിവർക്ക് റിപ്പോർട്ട് സമർപ്പിച്ചു.
കേന്ദ്രസർക്കാരിന്റെ പ്രധാനമന്ത്രി ആവാസ് യോജന പദ്ധതിയുമായി ബന്ധപ്പെട്ട പരാതികളും ഓംബുഡ്സ്മാന് നൽകാം. നേരിട്ട് പരാതിപ്പെടാൻ ബുദ്ധിമുട്ടുള്ളവർക്ക് ഫോൺ വഴിയോ ഇമെയിൽ വഴിയോ അറിയിക്കാം. വിലാസം: ഓംബുഡ്സ്മാന്റെ കാര്യാലയം, രണ്ടാം നില, സിവിൽ സ്റ്റേഷൻ അനക്സ് (ഇ ബ്ലോക്ക്), കണ്ണൂർ. ഫോൺ 9447287542. ഇ മെയിൽ: ombudsmanmgnregskannur@gmail.com
കെ എസ് ആർ ടി സിക്ക് ഊർജം പകർന്ന് കെ എസ് ഇ ബി
കെ എസ് ആർ ടി സി ബജറ്റ് ടൂറിസം സെല്ലിന്റെ നേതൃത്വത്തിൽ നടത്തുന്ന ടൂർ പാക്കേജുകൾ ഏറ്റെടുത്ത് കെ എസ് ഇ ബി ജീവനക്കാരും. കേരളപ്പിറവി ദിനത്തിൽ മുണ്ടയാട് സബ് സ്റ്റേഷനിലെ ഓവർസിയർ മുഹമ്മദ് ബഷീറിന്റെ നേതൃത്വത്തിൽ ആഡംബരക്കപ്പലായ കൊച്ചി നെഫ്രറ്റിറ്റിയിലേക്കായിരുന്നു യാത്ര. കണ്ണൂർ വൈദ്യുതി ഭവനിലെ സൂപ്രണ്ട് പ്രമോദ് കുമാർ അതിരകത്തിന്റെ നേതൃത്വത്തിലുള്ള സംഘങ്ങളും യാത്ര പോകുന്നുണ്ട്. ഡി ടി ഒ മനോജ്കുമാർ ഫ്ളാഗ് ഓഫ് ചെയ്തു. എല്ലാ സർക്കാർ വകുപ്പുകളും പാക്കേജുമായി സഹകരിച്ചാൽ അത് കെ എസ് ആർ ടി സിയുടെ കുതിപ്പിന് ഊർജമാകുമെന്ന് ഡി ടി ഒ പറഞ്ഞു. നവംബർ മാസത്തെ ടൂർ ഷെഡ്യുളും ഡി ടി ഒ പ്രകാശനം ചെയ്തു. നവംബർ ആറ്, 16, 29 തീയതികളിൽ നെഫ്രറ്റിറ്റി ആഡംബര കപ്പലിലേക്കും നവംബർ 11, 25 തീയതികളിൽ വാഗമൺ- കുമരകം എന്നിവിടങ്ങളിലേക്കും 12, 19, 26 തീയതികളിൽ മൂന്നാറിലേക്കുമാണ് യാത്ര. കൂടാതെ നവംബർ 13, 27 തീയതികളിൽ പൈതൽമല, റാണിപുരം- ബേക്കൽ എന്നിവിടങ്ങളിലേക്കും എല്ലാ ഞായറാഴ്ചകളിലും വയനാട്ടിലേക്കും യാത്ര പോകുന്നുണ്ട്.
ഫിഷറി ഗാർഡ് നിയമനം
ഫിഷറീസ് വകുപ്പിന്റെ ഫീൽഡ്തല പ്രവർത്തനങ്ങൾക്ക് ജില്ലയിൽ താൽക്കാലിക ഫിഷറി ഗാർഡിനെ നിയമിക്കുന്നു. യോഗ്യത: വി എച്ച് എസ് ഇ ഫിഷറീസ് സയൻസ്/എച്ച് എസ് ഇ, സ്രാങ്ക് ലൈസൻസ് ഉള്ളവരായിരിക്കണം. മത്സ്യത്തൊഴിലാളി കുടുംബത്തിലുള്ളവർക്ക് മുൻഗണന. താൽപര്യമുള്ളവർ നവംബർ ഏഴിന് രാവിലെ 10.30ന് ബയോഡാറ്റയും സർട്ടിഫിക്കറ്റുകളുടെ അസ്സലും പകർപ്പും സഹിതം ഫിഷറീസ് ഡെപ്യൂട്ടി ഡയറക്ടറുടെ കാര്യാലയത്തിൽ ഹാജരാക്കണം. ഫോൺ: 0497 2731081.
ഏവിയേഷൻ ആൻഡ് ടൂറിസം മാനേജ്മെന്റ് ഡിപ്ലോമ
കേരള ഇൻസ്റ്റിറ്റ്യൂട്ട് ഓഫ് ടൂറിസം ആൻഡ് ട്രാവൽ സ്റ്റഡീസിന്റെ തലശ്ശേരി സെന്ററിൽ ഡിപ്ലോമ ഇൻ ഏവിയേഷൻ ആൻഡ് ടൂറിസം മാനേജ്മെന്റ് കോഴ്സിന് അപേക്ഷ ക്ഷണിച്ചു. ആറ് മാസത്തെ കോഴ്സിന് ബിരുദമാണ് അടിസ്ഥാന യോഗ്യത. നവംബർ 14 വരെ അപേക്ഷിക്കാം. കൂടുതൽ വിവരങ്ങൾക്ക് www.kittsedu.org സന്ദർശിക്കുക. ഫോൺ: 0490 2344419.
സഹകരണ വാരാഘോഷം നടത്തി
69-ാമത് അഖിലേന്ത്യാ സഹകരണ വാരാഘോഷത്തിന്റെ ഭാഗമായി ജില്ലാതല പ്രബന്ധ രചന, പ്രസംഗ മത്സരം സംഘടിപ്പിച്ചു. ജില്ലാ സഹകരണ സംഘം ജോയിന്റ് ഡയറക്ടർ ഇ രാജേന്ദ്രൻ ഉദ്ഘാടനം ചെയ്തു. സഹകരണ പരിശീലന കേന്ദ്രത്തിൽ നടന്ന പരിപാടിയിൽ ഡെപ്യൂട്ടി രജിസ്ട്രാർ പ്രിൻസിപ്പൽ യു കെ ബിജു അധ്യക്ഷത വഹിച്ചു. സഹകരണ വിദ്യാഭ്യാസ ഡയറക്ടർ പി അശോകൻ, ടി പി സുനിൽ കുമാർ, പ്രകാശൻ കുന്നിരിക്ക എന്നിവർ സംസാരിച്ചു.