December 14 | 09:46 AM

ദോഹ: ഖത്തറിലെ ലോകകപ്പ് ഫൈനലിന് ശേഷം താൻ രാജ്യാന്തര മത്സരങ്ങളിൽ നിന്നും വിരമിക്കുമെന്ന പ്രഖ്യാപനവുമായി ലയണൽ മെസ്സി. ക്രൊയേഷ്യക്കെതിരെ സെമിയിൽ പെനാൽറ്റിയിൽ നിന്ന് ഗോൾ നേടുകയും, ജൂലിയൻ അൽവാരസ് നേടിയ മറ്റ് രണ്ട് ഗോളുകളിലും തുല്യപ്രാധാന്യത്തോടെ കളിക്കുകയും ചെയ്ത ശേഷമാണ് മെസ്സി ഇക്കാര്യം പറഞ്ഞത്. ‘അടുത്ത ലോകകപ്പിന് നാല് വർഷം കൂടിയുണ്ട്. അത് സാധ്യമാകുമെന്ന് തോന്നുന്നില്ല. അർജന്റീന ലോകകപ്പ് ഫൈനലിൽ എത്തിയതിൽ ഏറെ സന്തോഷമുണ്ട്’- മെസി പറഞ്ഞു. ആദ്യ മത്സരത്തിൽ സൗദിയോട് പരാജയപ്പെട്ടത് തിരിച്ചടിയായി. പക്ഷെ എത്രത്തോളം കരുത്തരാണ് അർജന്റീനയെന്ന് തെളിയിച്ചെന്നും ലയണൽ മെസി പറഞ്ഞു.

ഡീഗോ മറഡോണയുടെയും ഹാവിയർ മഷറാനോയുടെയും റെക്കോർഡ് മറികടന്നാണ് 35-കാരനായ മെസ്സി തന്റെ അഞ്ചാം ലോകകപ്പ് കളിക്കുന്നത്.