സൂര്യാഘാതത്തിന് സാധ്യത; രാവിലെ 11 മുതൽ 3 മണിവരെ നേരിട്ട് വെയിൽകൊള്ളരുത്
February 27 | 01:29 PM
തിരുവനന്തപുരം : വേനൽച്ചൂടിൽ സൂര്യാഘാതത്തിന് സാധ്യതയുള്ളതിനാൽ രാവിലെ 11 മുതൽ 3 മണി വരെയുള്ള സമയം ശരീരത്തിൽ നേരിട്ട് വെയിൽ ഏൽക്കരുതെന്ന് ആരോഗ്യ വകുപ്പിന്റെ ജാഗ്രതാ നിർദ്ദേശം. സൂര്യാതപം, സൂര്യാഘാതം, പകർച്ചവ്യാധികൾ എന്നിവയ്ക്കെതിരെ കരുതൽ വേണമെന്ന് ആരോഗ്യ വകുപ്പ് ജില്ലകൾക്ക് നിർദ്ദേശം നൽകി.
അന്തരീക്ഷതാപം പരിധിക്കപ്പുറം ഉയർന്നാൽ ശരീരം കൂടുതലായി വിയർത്ത് നിർജലീകരണം സംഭവിക്കാം. ശ്രദ്ധിച്ചില്ലെങ്കിൽ മരണംവരെ സംഭവിക്കാം. പ്രായമായവർ, കുട്ടികൾ, ഗർഭിണികൾ, ഗുരുതര രോഗമുള്ളവർ, വെയിലത്ത് ജോലി ചെയ്യുന്നവർ എന്നിവർ പ്രത്യേകം ശ്രദ്ധിക്കണം. ആരോഗ്യ വകുപ്പ് നൽകുന്ന മാർഗനിർദേശങ്ങൾ എല്ലാവരും പാലിക്കണമെന്ന് ആരോഗ്യമന്ത്രി വീണാ ജോർജ് അഭ്യർത്ഥിച്ചു.