വലിയചാൽ ഗവ. എൽ പി സ്കൂൾ കെട്ടിടം ഉദ്ഘാടനം ചെയ്തുകുട്ടികളിൽ ശാസ്ത്രബോധം വളർത്തണം: സ്പീക്കർ എ എൻ ഷംസീർ
November 11 | 05:22 AM
കണ്ണൂർ: വർധിച്ചുവരുന്ന അന്ധവിശ്വാസങ്ങളെയും അനാചാരങ്ങളെയും പ്രതിരോധിക്കാൻ കുട്ടികളിൽ ശാസ്ത്രബോധം വളർത്തണമെന്ന് നിയമസഭാ സ്പീക്കർ എ എൻ ഷംസീർ പറഞ്ഞു. കാങ്കോൽ-ആലപ്പടമ്പ് പഞ്ചായത്തിലെ വലിയചാൽ ഗവ. എൽ പി സ്കൂൾ കെട്ടിടം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ശാസ്ത്രലോകത്തിന്റെ വളർച്ചയും പുരോഗമന ആശയങ്ങളും വിദ്യാർഥികളിൽ എത്തിക്കാനും അധ്യാപകർക്ക് സാധിക്കണം. അതോടൊപ്പം കുട്ടികളിലെ ലഹരി ഉപയോഗം തടയണമെന്നും വിദ്യാലയങ്ങൾ കേന്ദ്രീകരിച്ച് നടക്കുന്ന ലഹരി മാഫിയയുടെ പ്രവർത്തനങ്ങൾ തിരിച്ചറിയാൻ സാധിക്കണമെന്നും സ്പീക്കർ പറഞ്ഞു.
ജില്ലാ പഞ്ചായത്ത് 15 ലക്ഷം, ബ്ലോക്ക് പഞ്ചായത്ത് ഏഴ് ലക്ഷം, കാങ്കോൽ ആലപ്പടമ്പ് പഞ്ചായത്ത് 16 ലക്ഷം എന്നിങ്ങനെ 38 ലക്ഷം രൂപ ചെലവിലാണ് കെട്ടിടം നിർമിച്ചത്. മൂന്ന് ക്ലാസ് മുറികളും ഒരു ശുചിമുറി ബ്ലോക്കുമാണ് ഇതിലുള്ളത്.
ടി ഐ മധുസൂദനൻ എംഎൽഎ അധ്യക്ഷത വഹിച്ചു. പുതുക്കിയ കമ്പ്യൂട്ടർ ലാബിന്റെ ഉദ്ഘാടനം ബ്ലോക്ക് പഞ്ചായത്ത് പ്രസിഡണ്ട് പി വി വത്സലയും സ്കൂൾ ചരിത്രത്തിന്റെ ഫോട്ടോ അനാഛാദനം ഗ്രാമപഞ്ചായത്ത് പ്രസിഡണ്ട് എം വി സുനിൽകുമാറും നിർവഹിച്ചു. വൈദ്യുതീകരണം വൈസ് പ്രസിഡണ്ട് കെ പത്മിനിയും വായന മുറിയുടെ ഉദ്ഘാടനം മുൻ ബ്ലോക്ക് പഞ്ചായത്ത് പ്രസിഡണ്ട് സി സത്യപാലനും നിർവഹിച്ചു. പഞ്ചായത്ത് അസിസ്റ്റന്റ് എഞ്ചിനീയർ എം വി ശ്രീകുമാർ റിപ്പോർട്ട് അവതരിപ്പിച്ചു. പഞ്ചായത്ത് വികസനകാര്യ സ്ഥരം സമിതി അധ്യക്ഷൻ കെ വി സുരേഷ് ബാബു, മുൻ പഞ്ചായത്ത് പ്രസിഡണ്ടുമാരായ പി ശശിധരൻ, പി ഉഷ, പഞ്ചായത്ത് സെക്രട്ടറി കെ മോഹനൻ, എസ് എം സി ചെയർമാൻ രമേശൻ ചെറൂട്ട, പ്രധാനാധ്യാപകൻ എം എൻ പ്രതാപ് കേശവൻ, സ്കൂൾ വികസന സമിതി അംഗങ്ങളായ കെ പി കണ്ണൻ, എൻ കെ ഗംഗാധരൻ, പി രാധാകൃഷ്ണൻ, സംഘാടകസമിതി ചെയർമാൻ സി രമേശൻ, വിവിധ രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.