കെപിസിസി അധ്യക്ഷ പദവി ഒഴിയാന് രാഹുല് ഗാന്ധിക്ക് കത്തയച്ചെന്ന വാര്ത്ത അടിസ്ഥാനരഹിതം: കെ.സുധാകരന്
November 16 | 12:56 PM
കണ്ണൂർ: കെപിസിസി അധ്യക്ഷ പദവി ഒഴിയാന് തയാറാണെന്നറിയിച്ച് രാഹുല് ഗാന്ധിക്ക് കത്തയച്ചെന്ന വിധത്തില് മാധ്യമങ്ങളിലൂടെ പ്രചരിക്കുന്ന വാര്ത്ത അടിസ്ഥാന രഹിതമാണെ് കെപിസിസി പ്രസിഡന്റ് കെ സുധാകരന് എം.പി. എന്റെ പേരില് ഇപ്പോള് പുറത്ത് വരുന്ന കത്തിലെ കാര്യങ്ങള് മാധ്യമങ്ങളുടെ ഭാവനാ സൃഷ്ടിയാണ്. ഇത്തരം കത്ത് ഏത് കേന്ദ്രത്തില് നിന്നാണ് വന്നതെന്ന് അന്വേഷിക്കും. കോണ്ഗ്രസിന്റെ സംഘടനാകാര്യങ്ങളെ കുറിച്ച് ഒരു ചുക്കും അറിയാത്തവരാണ് അബദ്ധജടിലമായ വാര്ത്തകള് പടച്ചുണ്ടാക്കുന്നതെന്നും അദ്ദേഹം പറഞ്ഞു. ഫാസിസ്റ്റ് ശക്തികളില് നിന്നും ഇന്ത്യയെ മോചിപ്പിക്കാനുള്ള വലിയ ഉദ്യമം ഏറ്റെടുത്ത് ഭാരത് ജോഡോ യാത്രയുമായി മുന്നോട്ട് പോകുന്ന രാഹുല് ഗന്ധിക്ക് അലോസരമുണ്ടാക്കുന്ന വിധം കത്തെഴുതാനുള്ള മൗഢ്യം എനിക്കില്ല. ഇങ്ങനെ ഒരു കത്ത് എഴുതേണ്ടതുണ്ടെങ്കില് അത് കോണ്ഗ്രസ് അധ്യക്ഷന് മല്ലികാര്ജുന ഖാര്ഗെക്കാണെന്ന സംഘടനാബോധം എനിക്കുണ്ട്. എന്നാല് അതിന് കടകവിരുദ്ധമായി രാഹുല് ഗാന്ധിക്ക് കത്തയച്ചെന്ന വിധത്തിലാണ് മാധ്യമങ്ങള് വാര്ത്ത നല്കിയത്. കോണ്ഗ്രസിന്റെയും യുഡിഎഫിന്റെയും തകര്ച്ച ആഗ്രഹിക്കുന്നവരാണ് വാര്ത്തയുടെ ബുദ്ധികേന്ദ്രം. അത്തരം കെണിയില് വീഴാതിരിക്കാനുള്ള ജാഗ്രത പ്രവര്ത്തകര് കാണിക്കണമെന്നും സുധാകരന് പറഞ്ഞു.