കടകളും വാണിജ്യ സ്ഥാപനങ്ങളും രജിസ്ട്രേഷൻ പുതുക്കണം; പി ആർ ഡി അറിയിപ്പുകൾ
November 6 | 09:36 AM
കടകളും വാണിജ്യ സ്ഥാപനങ്ങളും രജിസ്ട്രേഷൻ പുതുക്കണം
1960-ലെ കേരള ഷോപ്സ് ആൻഡ് കൊമേഴ്സ്യൽ എസ്റ്റാബ്ലിഷ്മെന്റ് നിയമപ്രകാരം തൊഴിൽ വകുപ്പിൽ രജിസ്റ്റർ ചെയ്ത സ്ഥാപനങ്ങളുടെ 2023 വർഷത്തേക്കുളള രജിസ്ട്രേഷൻ നവംബർ 30നകം www.lc.kerala.gov.in മുഖേന ഓൺലൈനായി അപേക്ഷ നൽകി പുതുക്കണമെന്ന് ജില്ലാ ലേബർ ഓഫീസർ അറിയിച്ചു. കടയുടമകൾ നേരിട്ടോ അക്ഷയകേന്ദ്രം വഴിയോ നവംബർ 30നകം അപേക്ഷ സമർപ്പിക്കണം.
പുതുതായി തുടങ്ങിയ സ്ഥാപനങ്ങൾ, ഷോപ്പ് ക്ഷേമനിധിയിൽ അംഗമായിട്ടുളള ഇതുവരെയും രജിസ്ട്രേഷൻ എടുക്കാത്ത സ്ഥാപനങ്ങൾ, ഫാക്ടറികളുടെയും സ്ഥാപനങ്ങളുടെയും സ്റ്റോർ റൂം, ഗോഡൗൺ, വെയർഹൗസുകൾ, 14 ദിവസത്തിലധികം പ്രവർത്തിക്കുന്ന മേളകൾ എന്നിവക്ക് പ്രത്യേകം രജിസ്ട്രേഷൻ എടുക്കണം. നവംബർ 30 കഴിഞ്ഞ് സമർപ്പിക്കുന്ന അപേക്ഷകൾക്ക് 25ശതമാനം അധിക ഫീസ് നൽകണം. രജിസ്റ്റർ ചെയ്യാത്തതും പുതുക്കാത്തതുമായ സ്ഥാപന ഉടമകൾക്കെതിരെ നിയമനടപടികൾ സ്വീകരിക്കുന്നതും ഒരു ലക്ഷം രൂപ വരെ പിഴ ഈടാക്കുന്നതാണെന്നും ജില്ലാ ലേബർ ഓഫീസർ അറിയിച്ചു.
സർവ്വെയർ: ഇന്റർവ്യൂ 11ന്
ജില്ലയിൽ ഡിജിറ്റൽ സർവ്വേയ്ക്ക് എംപ്ലോയ്മെന്റ് എക്സ്ചേഞ്ച് മുഖേന സർവ്വെയർമാരെ നിയമിക്കുന്നതിന് സെപ്റ്റംബർ 18ന് നടത്തിയ എഴുത്തു പരീക്ഷക്ക് ഹാജരായ ഉദ്യോഗാർഥികൾക്കുള്ള ഇന്റർവ്യൂ നവംബർ 11ന് ജില്ലാ ആസൂത്രണ സമിതി കാര്യാലയത്തിൽ നടക്കും. അറിയിപ്പ് തപാൽ മുഖേന അയച്ചിട്ടുണ്ട്. രണ്ട് ദിവസം മുമ്പ് വരെ അറിയിപ്പ് ലഭിക്കാത്തവർ കലക്ടറേറ്റിലുള്ള സർവ്വെ ഡെപ്യൂട്ടി ഡയറക്ടറുടെ കാര്യാലയവുമായി ബന്ധപ്പെടണം.
പ്രൊജക്ട് കോ- ഓർഡിനേറ്റർ നിയമനം
അഞ്ചരക്കണ്ടി പുഴയിൽ ഫിഷറീസ് വകുപ്പ് നടപ്പാക്കുന്ന 'ജല ആവാസ വ്യവസ്ഥയിൽ സമഗ്ര മത്സ്യ സംരക്ഷണം 2022-25' പദ്ധതി നിർവഹണത്തിനായി പ്രൊജക്ട് കോ ഓർഡിനേറ്റർമാരെ താൽക്കാലികമായി നിയമിക്കുന്നു. കാർഷിക സർവ്വകലാശാലയിൽ നിന്നോ ഫിഷറീസ് സർവ്വകലാശാലയിൽ നിന്നോ ഉള്ള ബി എഫ് എസ് സി, അംഗീകൃത സർവ്വകലാശാലയിൽ നിന്നും ഫിഷറീസ് വിഷയങ്ങളിലോ സുവോളജിയിലോ ഉള്ള ബിരുദാനന്തര ബിരുദം , സർക്കാർ സ്ഥാപനങ്ങളിൽ നിന്നും അക്വാകൾച്ചർ മേഖലയിലുള്ള മൂന്ന് വർഷത്തെ പ്രവൃത്തി പരിചയം എന്നിവയാണ് യോഗ്യത. താൽപര്യമുള്ള ഉദ്യോഗാർഥികൾ നവംബർ 11 വെള്ളി പകൽ 12 ന് ഫിഷറീസ് ഡെപ്യൂട്ടി ഡയറക്ടറുടെ മാപ്പിളബേ ഫിഷറീസ് കോംപ്ലക്സ് കണ്ണൂർ ഓഫീസിൽ നടക്കുന്ന വാക്ക് ഇൻ ഇന്റർവ്യൂവിന് ബയോഡാറ്റയും സർട്ടിഫിക്കറ്റുകളുടെ അസ്സലും പകർപ്പും സഹിതം ഹാജരാകണം. ഫോൺ: 0497 2731081.
ഗസ്റ്റ് ലക്ചറർമാരുടെ പാനൽ തയ്യാറാക്കുന്നു
കണ്ണൂർ ഗവ.പോളിടെക്നിക്ക് കോളേജിൽ ടെക്സ്റ്റൈൽ ടെക്നോളജി വിഭാഗത്തിൽ ഗസ്റ്റ് ലക്ചറർ പാനലിനായി അപേക്ഷ ക്ഷണിച്ചു .ടെക്സ്റ്റൈൽ ടെക്നോളജിയിൽ ഒന്നാം ക്ലാസ്സോടുകൂടിയ ബിടെക്/ബി ഇ ബിരുദം അല്ലങ്കിൽ തത്തുല്യ യോഗ്യതയുള്ളവർക്ക് അപേക്ഷിക്കാം . അപേക്ഷകർ ബയോഡാറ്റ, മാർക്ക്ലിസ്റ്റ്, യോഗ്യത, അധികയോഗ്യതയുണ്ടെങ്കിൽ അത്, പ്രവൃത്തി പരിചയം എന്നിവ തെളിയിക്കുന്ന അസ്സൽ സർട്ടിഫിക്കറ്റുകൾ സഹിതം ഗവ.പോളിടെക്നിക്ക് കോളേജ് പ്രിൻസിപ്പൽ മുമ്പാകെ നവംബർ എട്ടിന് രാവിലെ 10 മണിക്ക് നടത്തുന്ന എഴുത്തു പരീക്ഷക്കും കൂടിക്കാഴ്ചയ്ക്കും ഹാജരാകണം. ഫോൺ: 0497 2835106.
മത്സ്യഫെഡിൽ മെക്കാനിക്ക് നിയമനം
ജില്ലയിലെ മത്സ്യഫെഡ് ഔട്ട് ബോർഡ് മോട്ടോർ സർവീസ് സെന്റർ വ്യവസ്ഥകൾക്കനുസൃതമായി ഏറ്റെടുത്ത് നടത്തുന്നതിന് മെക്കാനിക്കുകളെ നിയമിക്കുന്നു. മത്സ്യത്തൊഴിലാളി കുടുംബത്തിലെ ഐ ടി ഐ - ഫിറ്റർ/ മെഷിനിസ്റ്റ് (വി എച്ച് എസ് ഇ അഭിലഷണീയം) യോഗ്യതയുള്ളതും അല്ലാത്തപക്ഷം ഈ മേഖലയിൽ പ്രവൃത്തി പരിചയമുള്ളതുമായ യുവാക്കളെയാണ് പരിഗണിക്കുക. പ്രാവീണ്യവും യോഗ്യതയുമുള്ള മെക്കാനിക്കുകളെ സ്വന്തമായി നിയമിച്ചുകൊണ്ട് സർവീസ് സെന്റർ പ്രവർത്തിപ്പിക്കുവാൻ താൽപര്യമുള്ള പ്രാഥമിക മത്സ്യത്തൊഴിലാളി വികസന ക്ഷേമ സഹകരണ സംഘങ്ങളെയും പരിഗണിക്കും. താൽപര്യമുള്ളവർ യോഗ്യതാ സർട്ടിഫിക്കറ്റുകൾ സഹിതം മാപ്പിളബേ ഫിഷറീസ് കോംപ്ലക്സിലുള്ള മത്സ്യഫെഡ് ജില്ലാ ഓഫീസിൽ നവംബർ ഒമ്പതിന് പകൽ 11 മണിക്ക് കൂടിക്കാഴ്ചക്ക് പങ്കെടുക്കണം. ഫോൺ: 0497 2731257, 9526041206.
മെറിറ്റോറിയസ് ധനസഹായത്തിന് അപേക്ഷ ക്ഷണിച്ചു
പട്ടികജാതി വിഭാഗക്കാർക്ക് ദേശീയ/ അന്തർദേശീയ സർവ്വകലാശാലകളിൽ പ്രവേശനമുൾപ്പെടെയുള്ള ചെലവുകൾക്ക് ജില്ലാ പഞ്ചായത്ത് നടപ്പാക്കുന്ന മെറിറ്റോറിയസ് ധനസഹായത്തിന് അപേക്ഷ ക്ഷണിച്ചു. കോഴ്സിന് പോകുന്ന രാജ്യം/സ്ഥലം എന്നിവ പരിഗണിച്ച് കാലാകാലങ്ങളിൽ പട്ടികജാതി വികസന വകുപ്പ് നടപ്പാക്കുന്ന സ്കീമിന് നിശ്ചയിക്കുന്ന മാനദണ്ഡങ്ങൾക്ക് വിധേയമായി തുക അനുവദിക്കും. ദേശീയ സർവ്വകലാശാലകളിൽ മെറിറ്റിൽ പ്രവേശനം ലഭിച്ചതും ഇ ഗ്രാന്റ്സ് ലഭ്യമാകാത്തതുമായ വിദ്യാർഥികൾക്ക് വരുമാന പരിധി 2.50 ലക്ഷം രൂപയാണ്. അന്തർദേശീയ സർവ്വകലാശാലകളിൽ മെറിറ്റ് സീറ്റിൽ പ്രവേശനം ലഭിക്കുന്ന വിദ്യാർഥികൾക്ക് വരുമാന പരിധിയില്ല. അപേക്ഷ അതാത് ഗ്രാമപഞ്ചായത്തിൽ നൽകണം. ഫോൺ: 0497 2700596.
ഭരണാനുമതി ലഭിച്ചു
കെ കെ ശൈലജ ടീച്ചർ എം എൽ എയുടെ പ്രത്യേക വികസന നിധിയിൽ ഉൾപ്പെടുത്തി 30 ലക്ഷം രൂപ വിനിയോഗിച്ച് ഇരിക്കൂർ പഞ്ചായത്തിലെ ഊരത്തൂർ പി എച്ച് സിയുടെ പുതിയ കെട്ടിടം നിർമ്മാണ പ്രവൃത്തിക്ക് ജില്ലാ കലക്ടർ ഭരണാനുമതി നൽകി.
കാർഷിക യന്ത്രങ്ങൾ അനുവദിച്ചു തുടങ്ങി
എസ് എം എ എം പദ്ധതി പ്രകാരം യന്ത്രങ്ങൾക്ക് അപേക്ഷിച്ച കർഷകർ agrimachinery.nic.in സൈറ്റിൽ ലോഗിൻ ചെയ്ത് യന്ത്രങ്ങൾ അനുവദിച്ചിട്ടുണ്ടോയെന്ന് പരിശോധിക്കണമെന്ന് കൃഷി വകുപ്പ് എക്സിക്യൂട്ടീവ് എഞ്ചിനീയർ അറിയിച്ചു. അനുവദിച്ചിട്ടുള്ള കർഷകർ വെബ്സൈറ്റിൽ നിന്നും താൽപ്പര്യമുള്ള ഡീലറെ തെരഞ്ഞെടുത്ത് യന്ത്രങ്ങൾ വാങ്ങണം. ഡീലറെ തെരഞ്ഞെടുക്കാനുള്ള സമയം 15 ദിവസം മാത്രമാണ്. വാങ്ങാൻ താൽപ്പര്യമില്ലാത്തവർ സൈറ്റിൽ ലോഗിൻ ചെയ്ത് അവരുടെ അപേക്ഷ പിൻവലിക്കണമെന്നും അറിയിച്ചു.
മിനിമം വേതന ഉപദേശക സമിതി യോഗം 11ന്
ഫൂട്ട് വെയർ മാനുഫാക്ച്ചറിംഗ്, കെയിൻ ആന്റ് ബാംബൂ എന്നീ മേഖലകളിലെ തൊഴിലാളികളുടെ മിനിമം വേതനം പുതുക്കി നിശ്ചയിക്കുന്നതിന് മിനിമം വേതന ഉപദേശക സമിതിയുടെ ഉപസമിതി തെളിവെടുപ്പ് യോഗം നവംബർ 11ന് നടക്കും. യഥാക്രമം രാവിലെ 11 മണിക്കും ഉച്ചക്ക് 12 മണിക്കും കോഴിക്കോട് ഗാന്ധി റോഡിലെ കേരള സ്റ്റേറ്റ് സ്മോൾ ഇൻഡസ്ട്രീസ് അസോസിയേഷൻ ഓഫീസ് കോൺഫറൻസ് ഹാളിലാണ് യോഗം നടക്കുക. ജില്ലയിലെ ബന്ധപ്പെട്ട തൊഴിലാളി-തൊഴിലുടമാ പ്രതിനിധികൾ യോഗത്തിൽ പങ്കെടുക്കണമെന്ന് ജില്ലാ ലേബർ ഓഫീസർ അറിയിച്ചു.
വിചാരണക്ക് ഹാജരാകണം
പയ്യന്നൂർ ലാൻഡ് ട്രിബ്യൂണൽ ഓഫീസിൽ നിന്നും പട്ടയത്തിനായി വിചാരണ നോട്ടീസ് ലഭിച്ചിട്ടും ഇതുവരെ വിചാരണക്ക് ഹാജരാകാത്തവർ ബന്ധപ്പെട്ട രേഖകൾ സഹിതം നവംബർ 10 മുതൽ ഓഫീസ് പ്രവൃത്തി ദിവസങ്ങളിൽ പയ്യന്നൂർ ലാന്റ് ട്രിബ്യൂണൽ ഓഫീസിൽ ഹാജരാകണമെന്ന് സ്പെഷ്യൽ തഹസിൽദാർ അറിയിച്ചു.
അപേക്ഷ ക്ഷണിച്ചു
കൃഷിയിടത്തിന് അനുയോജ്യമായ കാർഷിക ഘടകങ്ങൾ കൂട്ടിച്ചേർത്ത് പദ്ധതികൾ ആവിഷ്കരിച്ച് നടപ്പാക്കുന്ന ഫാം പ്ലാൻ ബേസ്ഡ് അപ്രോച്ച് സ്കീം 2022-23 ലേക്ക് അപേക്ഷ ക്ഷണിച്ചു. നൂതന സാങ്കേതിക വിദ്യകൾ കൃഷിയിടത്തിൽ നടപ്പാക്കാൻ താൽപര്യമുള്ള 10 സെന്റ് മുതൽ രണ്ട് ഏക്കർ വരെ കൃഷിയിടമുള്ള കർഷകർ നവംബർ 15നകം കൃഷിഭവനുകളിൽ അപേക്ഷ സമർപ്പിക്കണം. ശാസ്ത്രീയ കൃഷി അവലംബിക്കുന്ന 10 കർഷകരെയാണ് കൃഷിഭവനുകളിൽ നിന്ന് തെരഞ്ഞെടുക്കുക. ഫോൺ: 0490 2365154.