എച്ച് എസ് എ അറബിക് ഒഴിവുകളിൽ നിയമനം നടത്തണം: ന്യൂനപക്ഷ കമ്മീഷൻ
November 20 | 07:48 AM
എച്ച് എസ് എ അറബിക് ഒഴിവുകളിൽ നിയമനം നടത്തണം: ന്യൂനപക്ഷ കമ്മീഷൻ
കണ്ണൂർ, കാസർകോട്, ജില്ലകളിൽ ഹൈസ്കൂൾ അസിസ്റ്റന്റ് അറബിക് തസ്തികയിലെ ഒഴിവുകളിലേക്ക് അടിയന്തിരമായി നിയമനം നടത്തണമെന്ന് സംസ്ഥാന ന്യൂനപക്ഷ കമ്മീഷൻ അംഗം അഡ്വ. മുഹമ്മദ് ഫൈസൽ കെ പി എസ് സിക്ക് നിർദേശം നൽകി. കമ്മീഷൻ അദാലത്തിൽ ഇരു ജില്ലകളിലെയും ഉദ്യോഗാർഥികളുടെ പരാതികളെ തുടർന്നാണ് നിർദേശം.
കലക്ടറേറ്റ് കോൺഫറൻസ് ഹാളിൽ നടന്ന അദാലത്തിൽ കണ്ണൂർ, കാസർകോട് ജില്ലകളിലെ 16 പരാതികൾ പരിഗണിച്ചു. രണ്ട് പരാതികൾ തീർപ്പാക്കി. ബാക്കിയുള്ളവയിൽ ബന്ധപ്പെട്ടവരോട് റിപ്പോർട്ട് തേടി. പുതിയ ഒരു പരാതി സ്വീകരിച്ചു. എ ഡി എം കെ കെ ദിവാകരനും അദാലത്തിൽ പങ്കെടുത്തു.
ചാല കട്ടിംഗ് റെയിൽവെ മേൽപാലത്തിന് 7.02 കോടിയുടെ പുതുക്കിയ ഭരണാനുമതി
കണ്ണൂർ ജില്ലയിലെ ചാലക്കുന്നിനെയും തോട്ടട പ്രദേശത്തെയും തമ്മിൽ ബന്ധിപ്പിക്കുന്ന ചാല കട്ടിംഗ് റെയിൽവെ മേൽപാലത്തിന് 7.02 കോടി രൂപയുടെ പുതുക്കിയ ഭരണാനുമതിയായി. വർഷങ്ങളായുള്ള ജനങ്ങളുടെ ആവശ്യമായിരുന്നു ചാല കട്ടിംഗ് റെയിൽമെ മേൽപാലം. ഉന്നത വിദ്യാഭ്യാസ സ്ഥാപനങ്ങൾ ഉൾപ്പെടെ നിരവധി വിദ്യാഭ്യാസ സ്ഥാപനങ്ങൾ ഉൾപ്പെടുന്ന ഏറെ തിരക്കുള്ള പ്രദേശമാണിത്. മേൽപാലത്തിൻറെ ആവശ്യം രാമചന്ദ്രൻ കടന്നപ്പള്ളി എംഎൽഎയും യുവജന വിദ്യാർഥി സംഘടനകളും രാഷ്ട്രീയ പാർട്ടി നേതൃത്വവും പൊതുമരാമത്ത് മന്ത്രി പി എ മുഹമ്മദ് റിയാസിന്റെ ശ്രദ്ധയിൽക്കൊണ്ടുവന്നിരുന്നു.
ഹൈമാസ്റ്റ്, മിനിമാസ്റ്റ് ലൈറ്റുകൾക്ക് ഭരണാനുമതി
രാമചന്ദ്രൻ കടന്നപ്പള്ളി എം എൽ എയുടെ ആസ്തി വികസന ഫണ്ടിൽ നിന്നും 11 ലക്ഷം രൂപ വിനിയോഗിച്ച് തോട്ടട പോളിടെക്നിക് ഐ ടി ഐ ജങ്ഷൻ, തളാപ്പ് ഓലച്ചേരി കാവിന് സമീപം എന്നിവിടങ്ങളിൽ ഹൈമാസ്റ്റ് ലൈറ്റും വാരം ശ്രീകൃഷ്ണ ക്ഷേത്ര പരിസരത്ത് മിനിമാസ്റ്റ് ലൈറ്റും സ്ഥാപിക്കാൻ ജില്ലാ കലക്ടർ ഭരണാനുമതി നൽകി.
ഗതാഗത നിയന്ത്രണം
മൂന്നാംപാലം പുനർ നിർമാണത്തിന്റെ ഭാഗമായി കണ്ണൂർ-കൂത്തുപറമ്പ് റൂട്ടിൽ നവംബർ 22 മുതൽ ഗതാഗത നിയന്ത്രണം. കണ്ണൂരിൽ നിന്നും കൂത്തുപറമ്പിലേക്ക് വരുന്ന ചരക്ക് വാഹനങ്ങളും നീളം കൂടിയ വാഹനങ്ങളും ചാല സ്കൂൾ ഭാഗത്ത് നിന്നും ഇടത്തോട്ട് തിരിഞ്ഞ് ചാല-തന്നട-പൊതുവാച്ചേരി-ആർവി മെട്ട-മൂന്നുപെരിയ വഴി കണ്ണൂർ-കൂത്തുപറമ്പ് റോഡിൽ പ്രവേശിക്കണം. കൂത്തുപറമ്പിൽ നിന്നും കണ്ണൂരിലേക്ക് വരുന്ന വാഹനങ്ങൾ മൂന്നുപെരിയയിൽ നിന്നും ഇടത്തോട്ട് തിരിഞ്ഞ് പാറപ്രം-മേലൂർക്കടവ്-കാടാച്ചിറ വഴി കണ്ണൂരിലേക്ക് പോകണം. മറ്റു വാഹനങ്ങൾക്ക് മൂന്നാംപാലത്തെ സമാന്തര റോഡ് വഴി പോകാമെന്നും പി ഡബ്ലു ഡി അസി. എക്സിക്യുട്ടീവ് എഞ്ചിനീയർ അറിയിച്ചു.
സന്നദ്ധ സേനാംഗങ്ങൾക്ക് പരിശീലനം
കണ്ണൂർ താലൂക്ക് പരിധിയിൽ പഞ്ചായത്ത്/മുനിസിപ്പൽ കോർപറേഷനിൽ ഉൾപ്പെട്ട സന്നദ്ധ സേനാംഗങ്ങൾക്ക് ദുരന്ത മുന്നൊരുക്ക പരിശീലനം നൽകുന്നു. താണ ആനയിടുക്ക് റോഡിലെ റിഫ്റ്റ ഓഡിറ്റോറിയത്തിൽ നടക്കുന്ന പരിശീനലനം നവംബർ 23ന് രാവിലെ 9.30ന് ജില്ലാ കലക്ടർ എസ് ചന്ദ്രശേഖർ ഉദ്ഘാടനം ചെയ്യും.
പട്ടയകേസുകളുടെ വിചാരണ മാറ്റി
നവംബർ 22, 24 തീയതികളിൽ കലക്ടറേറ്റിൽ നടത്താനിരുന്ന പയ്യന്നൂർ, തളിപ്പറമ്പ് താലൂക്കുകളിലെ ദേവസ്വം പട്ടയകേസുകളുടെ വിചാരണ യഥാക്രമം ഡിസംബർ 20, 22 തീയതികളിലേക്ക് മാറ്റിയതായി ആർ ആർ ഡെപ്യൂട്ടി കലക്ടർ അറിയിച്ചു.
ലേലം
കോടതി കുടിശ്ശിക ഈടാക്കാൻ ജപ്തി ചെയ്ത നുച്യാട് അംശം ദേശത്ത് റീ സർവേ ഒന്നിൽപെട്ട 0.0405 ഹെക്ടർ സ്ഥലവും അതിലുൾപ്പെട്ട സകലതും നവംബർ 22ന് രാവിലെ 11 മണിക്ക് നുച്യാട് വില്ലേജ് ഓഫീസിൽ ലേലം ചെയ്യും. കൂടുതൽ വിവരങ്ങൾ വില്ലേജ് ഓഫീസിലും ഇരിട്ടി താലൂക്ക് ഓഫീസിലും ലഭിക്കും.
കോടതി കുടിശ്ശിക ഈടാക്കാൻ ജപ്തി ചെയ്ത ആറളം അംശം ദേശത്ത് റീ സർവേ 67ൽപെട്ട 0.3358 ഹെക്ടർ സ്ഥലവും അതിലുൾപ്പെട്ട സകലതും (1/3 അവകാശം) നവംബർ 25ന് രാവിലെ 11 മണിക്ക് ആറളം വില്ലേജ് ഓഫീസിൽ ലേലം ചെയ്യും. കൂടുതൽ വിവരങ്ങൾ വില്ലേജ് ഓഫീസിലും ഇരിട്ടി താലൂക്ക് ഓഫീസിലും ലഭിക്കും.
നേവി വിമുക്തഭടന്മാരുടെ വിധവകളുമായി കൂടിക്കാഴ്ച
ഐ എൻ എസ് സമോറിൻ നേവി വിമുക്തഭടന്മാരുടെ വിധവകളുമായി നവംബർ 30ന് രാവിലെ 11.30 മുതൽ 12.30 വരെ ജില്ലാ സൈനിക ക്ഷേമ ഓഫീസിൽ കൂടിക്കാഴ്ച നടത്തും. പുതിയ ക്ഷേമ പദ്ധതികൾ, പരാതികൾ, പെൻഷൻ എന്നിവ സംബന്ധിച്ച സംശയങ്ങൾക്ക് മറുപടി ലഭിക്കും. ജില്ലയിലെ മുഴുവൻ നേവി വിമുക്തഭടന്മാരുടെ വിധവകളും പങ്കെടുക്കണമെന്ന് ജില്ലാ സൈനിക ക്ഷേമ ഓഫീസർ അറിയിച്ചു. ഫോൺ: 0497 2700069.
ഓക്സിജൻ ടെക്നീഷ്യൻ നിയമനം
ജില്ലാ ആശുപത്രിയിൽ ഓക്സിജൻ ടെക്നീഷ്യൻ കം ലിഫ്റ്റ് ഓപ്പറേറ്ററെ താൽക്കാലികമായി നിയമിക്കാനുള്ള വാക് ഇൻ ഇന്റർവ്യൂ നവംബർ 22ന് നടക്കും. യോഗ്യത: എസ് എസ് എൽ സി, തത്തുല്യ പ്രവൃത്തി പരിചയം. താൽപര്യമുള്ളവർ 22ന് രാവിലെ 10 മണിക്കകം ജില്ലാ ആശുപത്രി സൂപ്രണ്ട് മുമ്പാകെ ഹാജരാകണം.
ഫാഷൻ ഡിസൈനിങ്ങിൽ ഡിപ്ലോമ
തളിപ്പറമ്പ് നാടുകാണിയിലെ അപ്പാരൽ ട്രെയിനിങ് ആൻഡ് ഡിസൈൻ സെന്റർ ഒരു വർഷത്തെ ഫാഷൻ ഡിസൈൻ ടെക്നോളി ഡിപ്ലോമ കോഴ്സിലേക്ക് അപേക്ഷ ക്ഷണിച്ചു. യോഗ്യത: പ്ലസ് ടു. ഫോൺ: 8301030362, 9744917200.
കിഫ്ബി അവലോകന യോഗം 22, 23 തീയതികളിൽ
ജില്ലയിൽ കിഫ്ബി വഴി നടപ്പാക്കുന്ന പദ്ധതികളുടെ അവലോകന യോഗം നവംബർ 22, 23 തീയതികളിൽ ജില്ലാ പഞ്ചായത്ത് ഹാളിൽ നടക്കും. പദ്ധതികൾ സമയബന്ധിതമായി പൂർത്തിയാക്കുന്നതിന്റെ ഭാഗമായാണ് യോഗം. നിയമസഭാ സ്പീക്കർ എ എൻ ഷംസീർ, ജില്ലയിലെ എം എൽ എമാർ, കിഫ്ബിയിലെയും പദ്ധതി നിർവഹണ ഏജൻസികളിലെയും ഉദ്യോഗസ്ഥർ, മറ്റ് വകുപ്പ് അധികൃതർ തുടങ്ങിയവർ പങ്കെടുക്കും.
പ്രൊജക്ട് മാനേജർ നിയമനം
ജില്ലാ പഞ്ചായത്തും സംസ്ഥാന എയ്ഡ്സ് കൺട്രോൾ സൊസൈറ്റിയും നടപ്പാക്കുന്ന മൈഗ്രന്റ് സുരക്ഷ പദ്ധതിയിൽ പ്രൊജക്ട് മാനേജറെ താൽക്കാലികമായി നിയമിക്കുന്നു. യോഗ്യത: എം എസ് ഡബ്ല്യു/എം ബി എ. പ്രവൃത്തി പരിചയമുള്ളവർക്ക് മുൻഗണന. താൽപര്യമുള്ളവർ നവംബർ 24ന് രാവിലെ 10.30ന് ജില്ലാ പഞ്ചായത്ത് ഹാളിൽ നടക്കുന്ന വാക്ക് ഇൻ ഇന്റർവ്യൂവിന് പങ്കെടുക്കണം.
പ്രവർത്തന സമയം മാറ്റി
അഴീക്കോട് ഇലക്ട്രിക്കൽ സെക്ഷൻ ഓഫീസിലെ ക്യാഷ് കൗണ്ടർ പ്രവർത്തന സമയം ഇനി മുതൽ രാവിലെ ഒമ്പത് മുതൽ ഉച്ചക്ക് ഒരു മണി വരെയും ഉച്ചക്ക് ശേഷം രണ്ട് മുതൽ മൂന്നു മണി വരെയും ആയിരിക്കുമെന്ന് അസിസ്റ്റന്റ് എഞ്ചിനീയർ അറിയിച്ചു.
ജില്ലാതല കായിക മത്സരം 20ന്
ജില്ലാ കുടുംബശ്രീ മിഷൻ പട്ടികവർഗ സുസ്ഥിര വികസന പദ്ധതിയുടെ ഭാഗമായി ജില്ലയിലെ തെരഞ്ഞെടുക്കപ്പെട്ട ട്രൈബൽ മേഖലയിലെ കുട്ടികൾക്കും യുവതീയുവാക്കൾക്കുമായി ജില്ലാതല കായിക മത്സരം അത്ലോസ്-22 സംഘടിപ്പിക്കുന്നു. നവംബർ 20ന് രാവിലെ 10 മണിക്ക് എം വി ഗോവിന്ദൻ മാസ്റ്റർ എം എൽ എ ഉദ്ഘാടനം ചെയ്യും. ധർമ്മശാലയിലെ കെ എ പി നാലാം ബറ്റാലിയൻ ഗ്രൗണ്ടിൽ നടക്കുന്ന പരിപാടിയിൽ ജില്ലയിലെ വിവിധ സി ഡി എസുകളിൽ നിന്നായി 500 ഓളം കായികതാരങ്ങൾ പങ്കെടുക്കും. വൈകീട്ട് 4.30ന് ഡോ.വി ശിവദാസൻ എം പി സമ്മാനദാനം നിർവഹിക്കും.
സൈറ്റ് സൂപ്പർവൈസർ നിയമനം
കേരളാ പൊലീസ് ഹൗസിങ് ആൻഡ് കൺസ്ട്രക്ഷൻ കോർപറേഷൻ ഓഫീസിന്റെ ജില്ലാ ഓഫീസിൽ കരാർ അടിസ്ഥാനത്തിൽ സൈറ്റ് സൂപ്പർവൈസർമാരെ നിയമിക്കുന്നു. സിവിൽ എഞ്ചിനീയറിങ് ബിരുദം/ ഡിപ്ലോമ/എൻ ടി സി (സിവിൽ) ആണ് യോഗ്യത. പ്രായപരിധി 58 വയസ്. അപേക്ഷ നവംബർ 30നകം മാനേജിങ് ഡയറക്ടർ, കെ പി എച്ച് സി സി, സി എസ് എൻ സ്റ്റേഡിയം, പാളയം, തിരുവനന്തപുരം 695033 എന്ന വിലാസത്തിൽ ലഭിക്കണം. ഫോൺ: 0471 2302201. വെബ്സൈറ്റ്: www.kphccltd.kerala.gov.in
ചിത്രരചന മത്സരം
മണ്ണ് പര്യവേഷണ മണ്ണ് സംരക്ഷണ വകുപ്പിന്റെ ആഭിമുഖ്യത്തിൽ ലോക മണ്ണ് ദിനാചരണത്തിന്റെ ഭാഗമായി ജില്ലയിലെ യു പി, ഹൈസ്കൂൾ വിഭാഗം വിദ്യാർഥികൾക്കായി ജലച്ചായം ചിത്രരചനാ മത്സരം സംഘടിപ്പിക്കുന്നു. നവംബർ 26ന് രാവിലെ 11 മണി മുതൽ കണ്ണൂർ സ്പോർട്സ് കൗൺസിൽ ഹാളിലാണ് മത്സരം. പങ്കെടുക്കുന്നവർ കളറിങ് സാമഗ്രികൾ കൊണ്ടുവരണം. ഫോൺ: 0497 2712818.
സൗജ്യ മത്സര പരീക്ഷാ പരിശീലനം
ജില്ലാ എംപ്ലോയ്മെന്റ് എക്സ്ചേഞ്ചിന്റെ ആഭിമുഖ്യത്തിൽ ഭിന്നശേഷിക്കാരായ ഉദ്യോഗാർഥികൾക്കായി 40 ദിവസത്തെ സൗജന്യ മത്സര പരീക്ഷാ പരിശീലനം സംഘടിപ്പിക്കുന്നു. താൽപര്യമുള്ള ഉദ്യോഗാർഥികൾ ബന്ധപ്പെട്ട എംപ്ലോയ്മെന്റ് എക്സ്ചേഞ്ചുകളിൽ നവംബർ 25നകം അപേക്ഷ സമർപ്പിക്കണം. ഉദ്യോഗാർഥികൾക്ക് യാത്രാബത്തയും പഠനസാമഗ്രികളും നൽകും. ഫോൺ: 0497 2700831.
റോഡ് നിർമാണത്തിനും സ്മാർട്ട് ക്ലാസ് റൂമിനും ഭരണാനുമതി
കെ മുരളീധരൻ എം പിയുടെ പ്രാദേശിക വികസന നിധിയിൽ ഉൾപ്പെടുത്തി 11.42 ലക്ഷം രൂപ വിനിയോഗിച്ച് പാനൂർ മുനിസിപ്പാലിറ്റിയിലെ നാമത്ത് മീത്തൽ-വലിയപുരയിൽ റോഡ് നിർമാണ പ്രവൃത്തിക്ക് ജില്ലാ കലക്ടർ ഭരണാനുമതി നൽകി.
കെ മുരളീധരൻ എം പിയുടെ പ്രാദേശിക വികസന നിധിയിൽ ഉൾപ്പെടുത്തി 3.81 ലക്ഷം രൂപ വിനിയോഗിച്ച് പാട്യം ഗ്രാമപഞ്ചായത്തിലെ പാട്യം എൽ പി സ്കൂളിൽ സ്മാർട്ട് ക്ലാസ്റൂം നിർമിക്കുന്നതിന് ജില്ലാ കലക്ടർ ഭരണാനുമതി നൽകി.
ജനറൽ ബോഡി യോഗം
ജില്ലാ അഗ്രി ഹോർട്ടി കൾച്ചറൽ സൊസൈറ്റിയുടെ വാർഷിക ജനറൽ ബോഡി യോഗം കലക്ടറേറ്റ് കോൺഫറൻസ് ഹാളിൽ സൊസൈറ്റി പ്രസിഡണ്ടും ജില്ലാ കലക്ടറുമായ എസ് ചന്ദ്രശേഖറിന്റെ അധ്യക്ഷതയിൽ ചേർന്നു. സെക്രട്ടറി വി പി കിരൺ പ്രവർത്തന റിപ്പോർട്ടും ട്രഷറർ കെ എം ബാലചന്ദ്രൻ വരവ് ചെലവ് കണക്കും അവതരിപ്പിച്ചു. സൊസൈറ്റി വൈസ് പ്രസിഡണ്ടുമാരായ ബി പി റൗഫ്, ഗൗരി നമ്പ്യാർ, ജോ. സെക്രട്ടറി എം കെ മൃദുൽ, ആർ സുനിൽ കുമാർ, കെ രമേശൻ, ഇ വി ജി നമ്പ്യാർ, എം ബാലകൃഷ്ണൻ, വി ബാബു, പി വി രത്നാകരൻ എന്നിവർ സംസാരിച്ചു
ജില്ലാ കളക്ടർ പ്രസിഡണ്ടും വി പി കിരൺ സെക്രട്ടറിയുമായി പുതിയ കമ്മിറ്റിയെ തെരഞ്ഞെടുത്തു രക്ഷാധികാരികൾ-യു കെ ബി നമ്പ്യാർ, പി സി മിത്രൻ, ഗൗരി നമ്പ്യാർ, പ്രഭ വേണുഗോപാൽ. വൈസ് പ്രസിഡണ്ടുമാർ-ബി പി റൗഫ്, ഡോ. കെ സി വത്സല, ജോ. സെക്രട്ടറിമാർ-എം കെ മൃദുൽ, ഇ ജി ഉണ്ണികൃഷ്ണൻ. ട്രഷറർ-കെ എം ബാലചന്ദ്രൻ. എക്സി. കമ്മിറ്റി ആംഗങ്ങൾ-കെ സുലൈമാൻ, ടി പി വിജയൻ, ടി വേണുഗോപാൽ, പി വി രത്നാകരൻ, സി എച്ച് പ്രദീപ് കുമാർ, സി അബ്ദുൾ ജലീൽ, ജില്ലാ ഇൻഫർമേഷൻ ഓഫീസർ ഇ കെ പത്മനാഭൻ.
ബിസിനസ് എസ്റ്റാബ്ലിഷ്മെന്റ് പരിശീലനം
കേരള ഇൻസ്റ്റിറ്റ്യൂട്ട് ഫോർ എന്റർപ്രണർഷിപ്പ് ഡെവലപ്മെന്റ് ഏഴ് ദിവസത്തെ ബിസിനസ് എസ്റ്റാബ്ലിഷ്മെന്റ് പരിശീലനം സംഘടിപ്പിക്കുന്നു. ഡിസംബർ ആറ് മുതൽ 14 വരെ കളമശ്ശേരിയിലെ ഇൻസ്റ്റിറ്റ്യൂട്ടിൽ നടക്കുന്ന പരിശീലനത്തിൽ പങ്കെടുക്കാൻ www.kied.info ൽ ഡിസംബർ ഒന്നിനകം അപേക്ഷിക്കണം. താമസവും ഭക്ഷണവും ഉൾപ്പടെ 4130 രൂപയാണ് ഫീസ്. ഫോൺ:04842532890, 2550322.
മാടായി വിഎച്ച്എസ്സി കെട്ടിടം ഉദ്ഘാടനം 28ന്
മാടായി ഗവ ബോയ്സ് വൊക്കേഷണൽ ഹയർ സെക്കന്ററി സ്കൂളിന് നിർമ്മിച്ച പുതിയ കെട്ടിടത്തിന്റെ ഉദ്ഘാടനം നവംബർ 28ന് വൈകുന്നേരം 4 മണിക്ക് പൊതുവിദ്യാഭ്യാസ വകുപ്പ് മന്ത്രി വി ശിവൻകുട്ടി നിർവഹിക്കും.
സംഘാടക സമിതി രൂപീകരണ യോഗം എം വിജിൻ എം എൽ എ ഉദ്ഘാടനം ചെയ്തു. ചടങ്ങിൽ ജില്ലാ പഞ്ചായത്ത് അംഗം സി പി ഷിജു അധ്യക്ഷത വഹിച്ചു. പൊതു വിദ്യാഭ്യാസ സംരക്ഷണത്തിന്റെ ഭാഗമായി കിഫ്ബി പദ്ധതിയിൽ ഉൾപ്പെടുത്തി ഒരു കോടി രൂപയാണ് കെട്ടിട നിർമ്മാണത്തിന് സംസ്ഥാന സർക്കാർ അനുവദിച്ചത്. രണ്ടുനിലകളിലായി നിർമ്മിച്ച കെട്ടിടത്തിന് ആറ് ക്ലാസ് മുറികളും, വിശ്രമമുറി, ശുചിമുറിയും ഒരുക്കിയിട്ടുണ്ട്.
സംഘാടക സമിതി രക്ഷാധികാരികളായി രാജ് മോഹൻ ഉണ്ണിത്താൻ എം പി, എം വിജിൻ എം എൽ എ, പി പി ദിവ്യ എന്നിവരേയും, ചെയർമാനായി പ്രൊഫ. ബി മുഹമ്മദ് അഹമ്മദ്, കൺവീനറായി ഡോ പി ഷീജ എന്നിവരേയും തെരഞ്ഞെടുത്തു.
ഹയർ സെക്കന്ററി സ്കൂൾ പ്രിൻസിപ്പാൾ ഡോ പി ഷീജ, മാടായി ഉപജില്ല വിദ്യാഭ്യാസ ഓഫീസർ എം വി രാധാകൃഷ്ണൻ, പൊതുവിദ്യാഭ്യാസ യജ്ഞം ജില്ല കോർഡിനേറ്റർ പി.വി പ്രദീപൻ, മാടായി പഞ്ചായത്ത് വൈസ് പ്രസിഡന്റ് പി വി ധനലക്ഷ്മി, കെ പി മനോജ്, പി.നാരായണൻകുട്ടി, യു സജിത്ത് കുമാർ, ടി വി സുചിത്ര എന്നിവർ സംസാരിച്ചു
വൈദ്യുതി മുടങ്ങും
കാടാച്ചിറ ഇലക്ട്രിക്കൽ സെക്ഷനിലെ പനോന്നേരി, ആഡൂർ കനാൽ, കോവിലകം, ആഡൂർ വായനശാല, കാടാച്ചിറ എച്ച് എസ്, റിലയൻസ് (ഓഫീസ് പരിസരം) എന്നീ ട്രാൻസ്ഫോർമർ പരിധിയിൽ നവംബർ 20 ഞായർ രാവിലെ 10 മുതൽ 12 മണി വരെയും ആഡൂർ പാലം ട്രാൻസ്ഫോർമർ പരിധിയിൽ രാവിലെ 10 മുതൽ വൈകീട്ട് നാല് മണി വരെയും വൈദ്യുതി മുടങ്ങും.