പൂപ്പറമ്പ് പി എച്ച് സി കുടുംബാരോഗ്യ കേന്ദ്രമാക്കുന്നു; പി ആർ ഡി അറിയിപ്പുകൾ
November 17 | 05:57 AM
പൂപ്പറമ്പ് പി എച്ച് സി കുടുംബാരോഗ്യ കേന്ദ്രമാക്കുന്നു
കാത്തിരിപ്പിനൊടുവിൽ എരുവേശ്ശി പഞ്ചായത്തിലെ പൂപ്പറമ്പ് പ്രഥമികാരോഗ്യ കേന്ദ്രത്തെ കുടുംബാരോഗ്യ കേന്ദ്രമായി ഉയർത്തുന്നു. 64 ലക്ഷം രൂപ ചെലവിലാണ് മെച്ചപ്പെട്ട സൗകര്യങ്ങൾ ഒരുക്കുക. പ്രതിദിനം ശരാശരി 150 രോഗികളാണ് പൂപ്പറമ്പ് പി എച്ച് സിയെ ആശ്രയിക്കുന്നത്. ഏരുവേശ്ശി പഞ്ചായത്തിന് പുറമെ പയ്യാവൂർ പഞ്ചായത്ത്, ശ്രീകണ്ഠാപുരം നഗരസഭ എന്നിവിടങ്ങളിൽ നിന്നും ആളുകൾ എത്താറുണ്ട്. കുടുംബാരോഗ്യ കേന്ദ്രമാക്കാൻ എം എൽ എയുടെ ആസ്തി വികസന ഫണ്ടിൽ നിന്ന് 44 ലക്ഷം രൂപ, ദേശീയ ആരോഗ്യ ദൗത്യം 15 ലക്ഷം രൂപ, പഞ്ചായത്തിന്റെ അഞ്ച് ലക്ഷം രൂപ എന്നിങ്ങനെ മാറ്റിവെച്ചിരുന്നു.
ആദ്യഘട്ടത്തിൽ ഇമ്യൂണൈസേഷൻ ബ്ലോക്ക്, ഐസ് ലൈൻഡ് റഫ്രിജറേറ്റർ, ഡീപ്പ് ഫ്രീസർ സ്റ്റോറേജ്, മുലയൂട്ടൽ കേന്ദ്രം, പാലിയേറ്റീവ് മരുന്നുകളുടെയും ഉപകരണങ്ങളുടെയും സ്റ്റോർ റൂം, ലാബ്, ഫാർമസി, കാത്തിരിപ്പ് കേന്ദ്രം, ശുചിമുറി ബ്ലോക്ക്, ജീവനക്കാർക്കായുള്ള മുറികൾ എന്നിവയാണ് ഒരുക്കുക. ഇതിന് മുന്നോടിയായി ഉച്ചക്ക് ഒരു മണി വരെ മാത്രം പ്രവർത്തിച്ചിരുന്ന ഒ പി വൈകീട്ട് ആറുമണി വരെയാക്കി. ഇതിനായി ഒരു ഡോക്ടറെയും ഫാർമസിസ്റ്റിനെയും പഞ്ചായത്ത് അധികമായി നിയമിച്ചു. നടപടി പൂർത്തിയാക്കി നിർമാണ പ്രവൃത്തി വേഗത്തിൽ ആരംഭിക്കുമെന്ന് പഞ്ചായത്ത് പ്രസിഡണ്ട് ടെസ്സി ഇമ്മാനുവൽ പറഞ്ഞു.
ഇ എംഎസ് സ്മാരക പ്രസംഗമത്സര വിജയികൾ
ദേശീയ യുവജന ദിനത്തോടനുബന്ധിച്ച് സംസ്ഥാന യുവജന കമ്മീഷൻ സംസ്ഥാന തലത്തിൽ യുവജനങ്ങൾക്കായി സംഘടിപ്പിച്ച ഇ എം എസ് സ്മാരക പ്രസംഗ മത്സരത്തിൽ കൊല്ലം കൊട്ടാരക്കര സ്വദേശിയും തിരുവനന്തപുരം കാര്യവട്ടം ക്യാമ്പസിലെ വിദ്യാർഥിയുമായ എച്ച് എസ് ആദർശ് ഒന്നാം സ്ഥാനവും കണ്ണൂർ സ്വദേശിയും തലശ്ശേരി ഗവ. ബ്രണ്ണൻ കോളേജ് വിദ്യാർഥിനിയുമായ കെ അശ്വിനി രണ്ടാം സ്ഥാനവും ആലപ്പുഴ സ്വദേശിയും തിരുവനന്തപുരം യൂണിവേഴ്സിറ്റി കോളേജിലെ വിദ്യാർഥിയുമായ അഖിൽ ഡി വർഗീസ് മൂന്നാം സ്ഥാനവും നേടി.
കൊല്ലം പബ്ലിക് ലൈബ്രറി ഹാളിൽ നടന്ന പ്രസംഗ മത്സരത്തിൽ കേരളത്തിന്റെ വിവിധ ഭാഗങ്ങളിൽ നിന്ന് നൂറിലധികം യുവജനങ്ങൾ മാറ്റുരച്ചു. വിജയികൾക്കുള്ള ക്യാഷ് പ്രൈസും ഇ എം എസ് സ്മാരക ട്രോഫിയും യുവജനദിനത്തോടനുബന്ധിച്ച് നടക്കുന്ന ചടങ്ങിൽ വിതരണം ചെയ്യും.
അധ്യാപക പരിശീലനം തുടങ്ങി
പ്രാദേശിക ചരിത്ര രചനയുടെ വഴികൾ പകർന്നു കൊടുത്ത് ദേശചരിത്ര രചനയുടെ കുട്ടികളെ ആനയിക്കുന്ന പാദമുദ്ര പ്രാദേശിക ചരിത്ര രചന പ്രവർത്തനത്തിന് തുടക്കമായി. സമഗ്ര ശിക്ഷാ കേരളം സെക്കണ്ടറി വിദ്യാർഥികളുടെ ചരിത്രാന്വേഷണത്തെ ത്വരിതപ്പെടുത്തുന്ന പ്രവർത്തനമാണ് പാദമുദ്ര. ജില്ലാതല റിസോഴ്സ് അധ്യാപക പരിശീലനം നോർത്ത് ബി ആർ സി ഹാളിൽ കണ്ണൂർ കോർപ്പറേഷൻ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ സുരേഷ് ബാബു എളയാവൂർ ഉദ്ഘാടനം ചെയ്തു. ജില്ലാ പ്രൊജക്ട് കോ ഓർഡിനേറ്റർ ഇ സി വിനോദ് അധ്യക്ഷനായി. ട്രെയിനർ എം രാജേഷ് ക്ലാസെടുത്തു. ഡി പി ഒ ഡോ. രമേശൻ കടൂർ, ഡി പി ഒ രാജേഷ് കടന്നപ്പള്ളി എന്നിവർ സംസാരിച്ചു.
റാങ്ക് പട്ടിക റദ്ദായി
ജില്ലയിൽ ഭാരതീയ ചികിത്സാ/ ഇൻഷൂറൻസ് മെഡിക്കൽ സർവ്വീസസ്/ ആയുർവേദ കോളേജ് വകുപ്പുകളിൽ ഫാർമസിസ്റ്റ് ഗ്രേഡ് 2 (ആയുർവേദം-ഫസ്റ്റ് എൻ സി എ-എസ് സി-616/2012) തസ്തികയുടെ തെരഞ്ഞെടുപ്പിനായി 2015 സെപ്റ്റംബർ ഒമ്പതിന് നിലവിൽ വന്ന 414/15/ഒഎൽഇ നമ്പർ റാങ്ക് പട്ടിക, ഈ തസ്തികയുടെ 2010 ഏപ്രിൽ 26ന് പ്രസിദ്ധീകരിച്ച മാതൃ റാങ്ക് പട്ടികയുടെ (391/2008) കാലയളവിലെ എസ് സി വിഭാഗം എൻ സി എ ഊഴത്തിൽ നിയമന ശുപാർശ നൽകിയതിനാൽ 2015 നവംബർ 30 മുതൽ റദ്ദായതായി ജില്ലാ പി എസ് സി ഓഫീസർ അറിയിച്ചു.
സാക്ഷ്യപത്രം ഹാജരാക്കണം
മലബാർ ദേവസ്വം ബോർഡ് കാസർകോട് ഡിവിഷനിൽ നിന്നും നിലവിൽ ധനസഹായം കൈപ്പറ്റികൊണ്ടിരിക്കുന്ന ആചാരസ്ഥാനികർ/ കോലധാരികൾ എന്നിവർക്ക് 2021 നവംബർ മുതലുള്ള വേതനം ലഭിക്കുന്നതിനായി ക്ഷേത്രഭരണാധികാരികളുടെ സാക്ഷ്യപത്രം, മലബാർ ദേവസ്വം ബോർഡിൽ നിന്നും അനുവദിച്ച ഐഡന്റിറ്റി കാർഡിന്റെ പകർപ്പ്, ഗുണഭോക്താക്കളുടെ ബാങ്ക് പാസ് ബുക്കിന്റെ പകർപ്പ്, മൊബൈൽ നമ്പർ എന്നിവ മലബാർ ദേവസ്വം ബോർഡ് നീലേശ്വരത്തുള്ള കാസർകോട് ഡിവിഷൻ ഓഫീസിൽ നവംബർ 30നകം സമർപ്പിക്കണം.
നഴ്സ് നിയമനം
ഭാരതീയ ചികിത്സാ വകുപ്പ് നടപ്പാക്കുന്ന പാലിയേറ്റീവ് യൂണിറ്റിലേക്ക് നഴ്സ് തസ്തികയിൽ താൽക്കാലിക നിയമനം നടത്തുന്നു. യോഗ്യത: ഗവ.അംഗീകൃത നഴ്സിങ് കോഴ്സ്-ജനറൽ നഴ്സിങ്/ ബി എസ് സി നഴ്സിങ്/പോസ്റ്റ് ബി എസ് സി നഴ്സിങ്. താൽപര്യമുള്ള ഉദ്യോഗാർത്ഥികൾ നവംബർ 25ന് രാവിലെ 10.30ന് സർട്ടിഫിക്കറ്റുകളുടെ അസ്സലും പകർപ്പും സഹിതം ഭാരതീയ ചകിത്സാ വകുപ്പ് ഓഫീസിൽ നേരിട്ട് ഹാജരാകണം. ഫോൺ: 0497 2700911.
അപേക്ഷ ക്ഷണിച്ചു
ന്യൂനപക്ഷ മതവിഭാഗങ്ങളിലെ വിദ്യാർഥികൾക്കായി ന്യൂനപക്ഷ ക്ഷേമ വകുപ്പ് മുഖേന തലശ്ശേരി ഗവ.കോളേജ് നടപ്പാക്കുന്ന കമ്പ്യൂട്ടർ സയൻസ് സൗജന്യ യു ജി സി നെറ്റ് പരിശീലനത്തിന് അപേക്ഷ ക്ഷണിച്ചു. അപേക്ഷാ ഫോമും കൂടുതൽ വിവരങ്ങളും http://govtcollegetly.ac.in ൽ ലഭിക്കും. അപേക്ഷ സ്വീകരിക്കുന്ന അവസാന തീയതി നവംബർ 21.
ലോക ഭിന്നശേഷി ദിനാഘോഷം: ആലോചനായോഗം 19ന്
ഈ വർഷത്തെ ലോക ഭിന്നശേഷി ദിനാഘോഷം ജില്ലയിൽ സംഘടിപ്പിക്കുന്നതിന്റെ ഭാഗമായി വിവിധ ഭിന്നശേഷി സംഘടനകൾ , സ്ഥാപനങ്ങൾ എന്നിവയുടെ പ്രതിനിധികളുടെ യോഗം ചേരും. ജില്ലാതല കമ്മിറ്റി ചെയർമാനായ ജില്ലാ കലക്ടറുടെ അധ്യക്ഷതയിൽ നവംബർ 19ന് ഉച്ചക്ക് 12.30 ന് ജില്ലാ ആസൂത്രണ സമിതി ഹാളിലാണ് ആലോചനാ യോഗം. യോഗത്തിൽ ബഡ്സ് സ്കൂൾ/ബിആർസി/സ്പെഷ്യൽ സ്കൂൾ പ്രതിനിധികൾ അംഗീകൃത ഭിന്നശേഷി സംഘടനകളുടെ ജില്ല/സംസ്ഥാന പ്രതിനിധികൾ എന്നിവർ പങ്കെടുക്കണമെന്ന് ജില്ലാ സാമൂഹ്യനീതി ഓഫീസർ അറിയിച്ചു.
പശുപരിപാലനത്തിൽ പരിശീലനം
കണ്ണൂർ മൃഗസംരക്ഷണ പരിശീലന കേന്ദ്രത്തിൽ നവംബർ 22, 23 തീയതികളിൽ പശുപരിപാലനത്തിൽ പരിശീലനം നൽകുന്നു. താൽപര്യമുള്ള കണ്ണൂർ, കാസർകോട്, കോഴിക്കോട് ജില്ലകളിലെ കർഷകർ നവംബർ 21നകം പേര് രജിസ്റ്റർ ചെയ്യണമെന്ന് പ്രിൻസിപ്പൽ ട്രെയിനിങ് ഓഫീസർ അറിയിച്ചു. ഫോൺ: 0497 2763473.
ജില്ലാ ആസൂത്രണ സമിതി യോഗം
തദ്ദേശ ഭരണ സ്ഥാപനങ്ങളുടെ 2022-23 വാർഷിക പദ്ധതി ഭേദഗതികൾക്ക് അംഗീകാരം നൽകുന്നതിനും പ്രൊജക്ടുകളുടെ വെറ്റിങ് പുരോഗതി അവലോകനം ചെയ്യുന്നതിനുമായി ജില്ലാ ആസൂത്രണ സമിതി യോഗം നവംബർ 18 വെള്ളി ഉച്ചക്ക് രണ്ട് മണിക്ക് ജില്ലാ ആസൂത്രണ സമിതി കോൺഫറൻസ് ഹാളിൽ ചേരും.
ക്വട്ടേഷൻ
കണ്ണൂർ ഗവ.എഞ്ചിനീയറിങ് കോളേജിലെ ഇ സി ഇ വകുപ്പിലേക്ക് ആശയവിനിമയ സാങ്കേതിക വിദ്യകൾക്കായുള്ള ഗവേഷണ പ്രൊജക്ട് പ്രോട്ടോകോൾ പൂർത്തിയാക്കുന്നതിനും സുരക്ഷാ നടപ്പാക്കലിനും ആവശ്യമായ ഉപകരണങ്ങൾ ലഭ്യമാക്കുന്നതിന് ക്വട്ടേഷൻ ക്ഷണിച്ചു. ഡിസംബർ ഒന്നിന് ഉച്ചക്ക് 12.30 വരെ ക്വട്ടേഷൻ സ്വീകരിക്കും. ഫോൺ: 0497 2780226.വെബ്സൈറ്റ് : www.gcek.ac.in
ലേലം
കോടതി കുടിശ്ശിക ഈടാക്കുന്നതിനായി ജപ്തി ചെയ്ത നുച്യാട് അംശം ദേശത്ത് റീ സർവേ 1ൽപെട്ട 0.0405 ഹെക്ടർ സ്ഥലവും അതിലുൾപ്പെട്ട സകലതും നവംബർ 22ന് രാവിലെ 11 മണിക്ക് നുച്യാട് വില്ലേജ് ഓഫീസിൽ ലേലം ചെയ്യും. കൂടുതൽ വിവരങ്ങൾ നുച്യാട് വില്ലേജ് ഓഫീസിലും ഇരിട്ടി താലൂക്ക് ഓഫീസിലും ലഭിക്കും.
കോടതി കുടിശ്ശിക ഈടാക്കുന്നതിനായി ജപ്തി ചെയ്ത ആറളം അംശം ദേശത്ത് റീ സർവേ 67ൽപെട്ട 0.3358 ഹെക്ടർ സ്ഥലവും അതിലുൾപ്പെട്ട സകലതും (1/3 അവകാശം) നവംബർ 25ന് രാവിലെ 11 മണിക്ക് ആറളം വില്ലേജ് ഓഫീസിൽ ലേലം ചെയ്യും. കൂടുതൽ വിവരങ്ങൾ ആറളം വില്ലേജ് ഓഫീസിലും ഇരിട്ടി താലൂക്ക് ഓഫീസിലും ലഭിക്കും.
ക്വട്ടേഷൻ
തലശ്ശേരി ഗവൺമെന്റ് കോളേജിലേക്ക് സ്പോർട്സ് ഉപകരണങ്ങൾ, ജേഴ്സികൾ എന്നിവ വിതരണം ചെയ്യുന്നതിന് ക്വട്ടേഷൻ ക്ഷണിച്ചു. നവംബർ 25ന് വൈകിട്ട് മൂന്ന് മണി വരെ ക്വട്ടേഷൻ സ്വീകരിക്കും. ഫോൺ: 0490 2966800, 9497697639.
കണ്ണൂർ ജില്ലാ കൃത്രിമ അവയവ നിർമാണ കേന്ദ്രത്തിലേക്ക് വിവിധ ഉപകരണങ്ങൾ വിതരണം ചെയ്യുന്നതിന് ക്വട്ടേഷൻ ക്ഷണിച്ചു. നവംബർ 23ന് ഉച്ചക്ക് 12 മണി വരെ ക്വട്ടേഷൻ സ്വീകരിക്കും. കൂടുതൽ വിവരങ്ങൾ ജില്ലാ ആശുപത്രിയിലെ കൃത്രിമ അവയവ നിർമാണ ഓഫീസിൽ ലഭിക്കും.
ലൈഫ് സർട്ടിഫിക്കറ്റ് സമർപ്പിക്കണം
കേരള മദ്രസ അധ്യാപക ക്ഷേമനിധി ബോർഡിൽ നിന്നും പെൻഷൻ വാങ്ങുന്ന അംഗങ്ങൾ ഈ വർഷത്തെ ലൈഫ് സർട്ടിഫിക്കറ്റ് ഡിസംബർ 31 നകം ചീഫ് എക്സിക്യൂട്ടീവ് ഓഫീസർ, കേരള മദ്രസ അധ്യാപക ക്ഷേമനിധി ബോർഡ്, കെയുആർഡിഎഫ്സി ബിൽഡിങ് രണ്ടാം നില, ചാക്കോരത്തുകുളം, വെസ്റ്റ് ഹിൽ പി ഒ, കോഴിക്കോട്-673005 എന്ന വിലാസത്തിൽ സമർപ്പിക്കണം. സർട്ടിഫിക്കറ്റ് മാതൃക www.kmtboard.in ൽ ലഭിക്കും. ഗസറ്റഡ് ഓഫീസർ സാക്ഷ്യപ്പെടുത്തിയ സർട്ടിഫിക്കറ്റിൽ ആധാർ നമ്പറും മൊബൈൽ നമ്പറും നിർബന്ധമായും രേഖപ്പെടുത്തുക. ലൈഫ് സർട്ടിഫിക്കറ്റ് സമർപ്പിച്ചവർക്ക് മാത്രമേ 2023 ജനുവരി മാസം മുതൽ പെൻഷൻ നൽകുവാൻ കഴിയൂ എന്ന് ചീഫ് എക്സിക്യൂട്ടീവ് ഓഫീസർ അറിയിച്ചു. ഫോൺ: 0495 2966577, 9188230577.താൽക്കാലിക നിയമനം: കൂടിക്കാഴ്ച 19ന്
കണ്ണൂർ മുണ്ടയാട് മേഖലാ കോഴിവളർത്തൽ കേന്ദ്രത്തിലെ ചിക്ക് സെക്സർ തസ്തികയിലേക്ക് ദിവസ വേതനാടിസ്ഥാനത്തിൽ താൽക്കാലിക നിയമനം നടത്തുന്നതിനായി കൂടിക്കാഴ്ച നടത്തുന്നു. താത്പര്യമുളളവർ യോഗ്യത തെളിയിക്കുന്ന സർട്ടിഫിക്കറ്റുകളുടെ അസ്സൽ, പകർപ്പ് സഹിതം നവംബർ 19ന് രാവിലെ 11 മണിക്ക് പഴയ ബസ്റ്റാന്റിന് സമീപത്തെ ജില്ലാ മൃഗസംരക്ഷണ ഓഫീസിൽ ഹാജരാവുക. യോഗ്യത: പൗൾട്രി ഹസ്ബൻഡറി പ്രത്യേക വിഷയമായി ലൈവ് സ്റ്റോക്ക് മാനേജ്മെന്റിൽ വി എച്ച് എസ് സി. കൂടാതെ ചിക്ക് സെക്സിംഗിൽ ഗവ. അംഗീകൃത സ്ഥാപനത്തിൽനിന്ന് കുറഞ്ഞത് അഞ്ച് മാസത്തെ പരിശീലനം ലഭിച്ചതിന്റെ സർട്ടിഫിക്കറ്റ്.
ഹാപ്പിനെസ് ഫെസ്റ്റിവൽ: കായിക മേള 21 ന്
തളിപ്പറമ്പ് മണ്ഡലത്തിൽ നടക്കുന്ന നാടിന്റെ ജനകീയോത്സവം ഹാപ്പിനസ് ഫെസ്റ്റിവലിന്റെ ഭാഗമായി കായിക മേളക്ക് നവംബർ 21ന് തുടക്കമാകും. നാടിന്റെ കായിക പ്രതിഭകളെ കണ്ടെത്താനും അവരെ കൂടുതൽ മികവിലേക്കുയർത്താനും ലക്ഷ്യമിട്ടുള്ള കായികമേള നവംബർ 21 ന് കായിക വകുപ്പ് മന്ത്രി വി അബ്ദുറഹിമാൻ ഉദ്ഘാടനം ചെയ്യും.
കൂവോട് എ കെ ജി സ്റ്റേഡിയത്തിൽ നടക്കുന്ന ചടങ്ങിൽ എം വി ഗോവിന്ദൻ മാസ്റ്റർ എംഎൽഎ അധ്യക്ഷനാവും. പരിപാടിയിൽ തളിപ്പറമ്പ് നിയോജക മണ്ഡലം സമഗ്രകായിക വികസന പദ്ധതി രൂപരേഖ മന്ത്രി പ്രകാശനം ചെയ്യും. ഫുട്ബോൾ, ക്രിക്കറ്റ്, ഷട്ടിൽ, കമ്പവലി, അത് ലറ്റിക്സ്, ബോക്സിങ്, വോളിബോൾ, കളരിപ്പയറ്റ്, ഹാൻഡ് ബോൾ, ചെസ്സ് തുടങ്ങിയ മത്സരയിനങ്ങളിൽ കായിക പ്രതിഭകൾ മാറ്റുരയ്ക്കും.
കൂടുതൽ വിവരങ്ങൾക്ക്
http://happinessfestival.in സന്ദർശിക്കുക.
ഫോൺ: 94479 24422
ഇ-മെയിൽ: happinessfestival2022@gmail.com
വൈദ്യുതി മുടങ്ങും
വെള്ളൂർ ഇലക്ട്രിക്കൽ സെക്ഷന് കീഴിൽ ലൈനിൽ തട്ടുന്ന മരച്ചില്ലകൾ വെട്ടി മാറ്റുന്നതിനാൽ നവംബർ 17 രാവിലെ ഒൻപത് മണി മുതൽ വൈകുന്നേരം അഞ്ച് വരെ ഏച്ചിലാംവയൽ പള്ളി, പങ്ങടം, കോത്തായിമുക്ക്, വി കെ സി, എം വി റോഡ്, അലുമിനിയം, പുതിയങ്കാവ്, ശക്തി ടയർ, ആയുർവേദം, ശ്രീകൃഷ്ണ, ലോൺഡ്രി, ആയുർവേദ റോഡ്, കിസാൻ കൊവ്വൽ റോഡ്, കിസ്സാൻ കൊവ്വൽ ഗ്രൗണ്ട് തുടങ്ങിയ ട്രാൻസ്ഫോർമറുകൾക്ക് കീഴിൽ വൈദ്യുതി മുടങ്ങും.
വേങ്ങാട് ഇലക്ട്രിക്കൽ സെക്ഷന് കീഴിൽ ലൈനിൽ പ്രവൃത്തി നടക്കുന്നതിനാൽ നവംബർ 17ന് രാവിലെ 8.30 മണി മുതൽ 11.30 മണി വരെ വണ്ണാൻ്റെമെട്ട ട്രാൻസ്ഫോർമർ പരിധിയിലും 11.30 മണി മുതൽ 2.30 മണി വരെ ഹെൽത്ത് സെൻ്റർ ട്രാൻസ്ഫോർമർ പരിധിയിലും വൈദ്യുതി മുടങ്ങും.
കണ്ണൂർ സെക്ഷൻ പരിധിയിൽ നവംബർ 17ന് രാവിലെ ഏഴ് മണി മുതൽ രണ്ട് മണി വരെ ജയശ്രീ പമ്പ്, രാജാ, മാണിക്കക്കാവ് ഭാഗങ്ങളിൽ ഭാഗികമായി വൈദ്യുതി മുടങ്ങും.
കാടാച്ചിറ ഇലക്ട്രിക്കൽ സെക്ഷൻ പരിധിയിൽ നവംബർ 17ന് എൽ.ടി ടച്ചിങ് വർക്കിന്റെ ഭാഗമായി ആറ്റടപ്പ സ്കൂൾ ട്രാൻസ്ഫോർമർ പരിധിയിൽ രാവിലെ ഏഴ് മുതൽ 12 വരെയും ആറ്റടപ്പ ഡിസ്പെൻസറി ട്രാൻസ്ഫോർമർ പരിധിയിൽ രാവിലെ 12 മുതൽ 2.30 വരെയും ഭാഗികമായി വൈദ്യുതി മുടങ്ങും.
പാടിയോട്ടുചാൽ ഇലക്ട്രിക്കൽ സെക്ഷനിലെ കടുക്കാരം, ഏണ്ടി എന്നീ ട്രാൻസ്ഫോമർ പരിധിയിൽ നവംബർ 17 വ്യാഴം രാവിലെ എട്ട് മുതൽ വൈകിട്ട് അഞ്ച് മണി വരെ വൈദ്യുതി മുടങ്ങും.