കാറില് ചാരി നിന്നതിന് ആറുവയസുകാരനെ യുവാവ് ചവിട്ടി, പ്രതി അറസ്റ്റിൽ
November 4 | 09:27 AM
കണ്ണൂര്: തലശേരിയില് ആറു വയസുകാരന് യുവാവിന്റെ ക്രൂര മർദ്ദനം. സംഭവത്തിൽ പ്രതി ശിഹ്ഷാദിനെ(20) അറസ്റ്റ് ചെയ്തു. ഇയാള്ക്കെതിരെ വധശ്രമത്തിന് കേസെടുത്തു. രാജസ്ഥാന് സ്വദേശികളുടെ മകനായ ഗണേഷ് എന്ന ആറുവയസുകാരനെയാണ്
കാറില് ചാരിനിന്നതിന് യുവാവ് മർദിച്ചത്. കണ്ണൂര് തലശേരിയില് തിരക്കേറിയ റോഡിലാണ് സംഭവം. കാറിൽ ചാരി നിന്നതിന് ശിഹ്ഷാദ് കുട്ടിയെ ചോദ്യം ചെയ്തു. ഒടുവിൽ കുട്ടിയുടെ നടുവിന് നേരെ ഇയാള് ചവിട്ടുകയായിരുന്നു. സംഭവത്തിൽ നാട്ടുകാർ ഇടപ്പെട്ടപ്പോൾ കാറിനുള്ളിലുണ്ടായിരുന്ന കുടുംബാംഗങ്ങളെ കുട്ടി ഉപദ്രവിക്കാന് ശ്രമിച്ചെന്നാണ് ഇയാൾ പറഞ്ഞത്. സിസിടിവി ദൃശ്യങ്ങള് വൈറലായതോടെയാണ് പോലീസ് നടപടിയെടുത്തത്.
കുട്ടിക്ക് നടുവിന് ഗുരുതര പരിക്കുണ്ട്. കുട്ടിയെ നാട്ടുകാരിൽ ചിലര് ആശുപത്രിയിലെത്തിച്ചു. അതേസമയം സംഭവം ശ്രദ്ധയില്പെട്ടതായും പ്രശ്നത്തില് ഇടപെടുമെന്നും ബാലാവകാശ കമ്മിഷന് ചെയര്മാന് കെ.വി മനോജ് കുമാര് പ്രതികരിച്ചു.