September 28 | 06:01 AM

കണ്ണൂർ:  കോവിഡ് പ്രതിസന്ധിക്ക് ശേഷം വിനോദസഞ്ചാര കേന്ദ്രങ്ങൾ ഉണരുമ്പോൾ, സഞ്ചാരികളെ ആകർഷിക്കാൻ മലബാറിലെ ഊട്ടി എന്നറിയപ്പെടുന്ന പാലക്കയം തട്ടിൽ വ്യത്യസ്ത കാഴ്ചാനുഭവം ഒരുങ്ങുന്നു. ഏഷ്യയിൽ തന്നെ ഇതാദ്യമായി 'ഫീൽഡ് ഓഫ് ലൈറ്റ്' എന്ന വ്യത്യസ്തമായ വർണ്ണ കാഴ്ചയാണ് ഒരുങ്ങുന്നത്.

പ്രകാശം ചൊരിയുന്ന മഴവിൽ ക്കാഴ്‌ചകൾക്കിടയിലൂടെ അറുപതിനായിരത്തോളം ‘മിന്നാമിനുങ്ങു’കൾ അനേകം വർണരാജികളിൽ ആകാശത്ത്‌ വെട്ടിത്തിളങ്ങുന്ന അനുഭവമാകും ഇനി പാലക്കയം തട്ട് വിനോദസഞ്ചാരികൾക്ക് സമ്മാനിക്കുക. മലയാളികൾക്ക്‌ കേട്ടും കണ്ടും പരിചയമില്ലാത്ത ഫീൽഡ് ഓഫ് ലൈറ്റ് എന്ന ഈ ദൃശ്യ മനോഹാരിത ഏഷ്യയിൽ ഇതാദ്യമായാണെന്ന്‌ സംഘാടകർ പറയുന്നു.  

മലമടക്കുകളുടെ മനോഹാരിതയ്‌ക്ക്‌ അനുരൂപമായി പ്രകൃതിക്ക്‌  കോട്ടം തട്ടാതെ അമേരിക്കൻ സാങ്കേതിക വിദ്യ ഉപയോഗിച്ച്  നടപ്പാക്കുന്ന പദ്ധതി നിർമാണത്തിന്‌ ഒന്നരക്കോടി രൂപ ചെലവ്‌ കണക്കാക്കുന്നു. പത്ത്‌ ഏക്കർ സ്ഥലത്ത്‌ 60000 ചെറു വിളക്കുകകളിലൂടെ മലമടക്കുകൾ വെളിച്ചത്തിന്റെ പറുദീസയാകും.

ടൂറിസം വകുപ്പിനു കീഴിലുള്ള, ജില്ല ടൂറിസം പ്രമോഷൻ കൗൺസിലിൻ്റെ മേൽനോട്ടത്തിലുള്ള ഈ വിനോദ സഞ്ചാര കേന്ദ്രം നടത്തിപ്പുകാരനായ കെ.എൻ നിസാറാണ് നിർമാണ പ്രവർത്തനങ്ങൾക്ക്‌ നേരിട്ട്‌ മേൽനോട്ടം വഹിക്കുന്നത്.വിദേശരാഷ്‌ട്രങ്ങളിൽനിന്ന്‌ വിദഗ്‌ധരെ കൊണ്ടുവന്ന്‌ പദ്ധതി നടപ്പാക്കുമ്പോഴുണ്ടാകുന്ന ബുദ്ധിമുട്ടും ഭാരിച്ച ചെലവും ഒഴിവാക്കാൻ ഇദ്ദേഹം ഇത്തരം രാജ്യങ്ങൾ സന്ദർശിച്ച്‌ പ്രവർത്തനങ്ങൾ പഠിച്ചു. ചെറു യൂണിറ്റുകൾ ഇവിടെത്തന്നെ സ്ഥാപിച്ച്  ഉപകരണങ്ങൾ നിർമിച്ച്‌ ഭീമമായ നിർമാണ ചെലവും ഒഴിവാക്കി.

സൗരോർജം ഉപയോഗിച്ച് ഒപ്റ്റിക്കൽ ഗ്ലാസ് ഫൈബർ വഴിപ്രകാശം വിസരണ ഭാഗത്ത് എത്തിക്കും.  നിർമാണത്തിന്‌ സിമന്റ് ഉൾപ്പെടെയുള്ള രാസവസ്തുക്കൾ ഒരു തരിപോലും ഉപയോഗിച്ചില്ല എന്ന പ്രത്യേകതയുമുണ്ട്‌. അടുത്തമാസം ആദ്യവാരം മുതൽ പകൽ വെളിച്ചം മങ്ങുന്നതോടെ ഈ മലമടക്കുകൾ ദീപപ്രഭയിൽ സഞ്ചാരികളുടെ മനം കുളിർക്കും.