November 23 | 05:19 PM

ന്യൂഡൽഹി: തെരഞ്ഞെടുപ്പ് കമ്മീഷണർ അരുൺ ഗോയലിന്റെ നിയമനവുമായി ബന്ധപ്പെട്ട ഫയൽ ഹാജരാക്കണമെന്ന് സുപ്രീംകോടതി. ഫയലുകൾ നാളെ(നവംബർ 24) ഹാജരാക്കാൻ കേന്ദ്ര സർക്കാരിനോട് സുപ്രീംകോടതി ആവശ്യപ്പെട്ടു. അടുത്തിടെ സർവീസിൽ നിന്ന് സ്വയം വിരമിച്ച ഗോയലിനെ തെരഞ്ഞെടുപ്പ് കമ്മീഷണറായി നിയമിച്ചതിൽ എന്തെങ്കിലും അപാകതയുണ്ടായോ എന്ന് അറിയണമെന്നും കോടതി പറഞ്ഞു. ഫയലുകൾ ഹാജരാക്കാൻ അറ്റോർണി ജനറൽ ആർ വെങ്കിട്ടരമണിയോട് ജസ്റ്റിസ് കെ.എം ജോസഫിന്റെ നേതൃത്വത്തിലുള്ള അഞ്ചംഗ ബെഞ്ചാണ് ആവശ്യപ്പെട്ടത്.

മുഖ്യ തെരഞ്ഞെടുപ്പ് കമ്മീഷണറുടെയും തെരഞ്ഞെടുപ്പ് കമ്മീഷണറുടെയും നിയമനം കൂടുതൽ സുതാര്യമാക്കണമെന്ന ഹർജി പരിഗണിക്കവെയാണ് കോടതിയുടെ നിർദേശം.