വധശിക്ഷ വിധിക്കുന്നതിനു മുമ്പ് പുതിയ മാര്‍ഗനിര്‍ദ്ദേശങ്ങളുമായി സുപ്രീംകോടതി
May 21 | 05:45 PM
രാജ്യത്ത് വധശിക്ഷ വിധിക്കുന്നതിന് പുതിയ മാര്‍ഗനിര്‍ദ്ദേശങ്ങള്‍ പുറപ്പെടുവിച്ച് സുപ്രീംകോടതി. പ്രതിയെ കുറിച്ചുള്ള കൃത്യമായ വിവരങ്ങള്‍ വിചാരണ ഘട്ടത്തില്‍ തന്നെ ശേഖരിക്കണം, പ്രതിയുടെ മനോനിലയെ കുറിച്ച് സര്‍ക്കാരിന്റെയും ജയില്‍ അധികൃതരുടെയും റിപ്പോര്‍ട്ട് തേടണം, പ്രതി പശ്ചാത്തപിക്കാനും മാറാനും സാധ്യതയുണ്ടോയെന്ന് സൂക്ഷ്മ പരിശോധന നടത്തണം, കുടുംബ പശ്ചാത്തലം ഉള്‍പ്പെടെ എല്ലാ വിവരങ്ങളും സര്‍ക്കാര്‍ ശേഖരിച്ച് കോടതിക്ക് നല്‍കണമെന്നുമാണ് കോടതി നിര്‍ദ്ദേശിച്ചിരിക്കുന്നത്.
കോടതി പുറപ്പെടുവിച്ചിരിക്കുന്ന മാര്‍ഗനിര്‍ദ്ദേശ പ്രകാരമുള്ള കാര്യങ്ങള്‍ പരിശോധിച്ച ശേഷം മാത്രമേ വധശിക്ഷ വിധിക്കാവു എന്നും കോടതി വ്യക്തമാക്കി. ജസ്റ്റിസ് യു.യു.ലളിത് അധ്യക്ഷനായ ബെഞ്ചാണ് മാര്‍ഗനിര്‍ദ്ദേശങ്ങള്‍ പുറപ്പെടുവിച്ചത്.
