ശിശുദിനാചരണം: കുട്ടികൾക്ക് പഠനോപകരണങ്ങൾ, കളിപ്പാട്ടങ്ങൾ വിതരണം ചെയ്യുന്നു
November 14 | 06:12 AM
കണ്ണൂർ: നവംബർ 14 ശിശുദിനാചരണത്തിന്റെ ഭാഗമായി കണ്ണൂർ ജില്ലയിലെ 91 സ്റ്റുഡൻറ് പൊലീസ് കേഡറ്റ് യൂനിറ്റുകളിലെ കേഡറ്റുകളും എസ്.പി.സി പൂർവ്വ വിദ്യാർത്ഥി കൂട്ടായ്മയായ പയനിയേഴ്സും ചേർന്ന് സമാഹരിച്ച പഠനോപകരണങ്ങൾ, കളിപ്പാട്ടങ്ങൾ, കുഞ്ഞുടുപ്പുകൾ, സ്പോർട്സ്, കരകൗശല സാമഗ്രികൾ എന്നിവ എസ് പി സി സ്കൂളുകൾക്ക് സമീപമുള്ള പ്രഥമിക വിദ്യാലയങ്ങൾ, അംഗനവാടികൾ, സ്പെഷൽ സ്കൂളുകൾ, ബഡ്സ് സ്കൂളുകൾ, എന്നിവിടങ്ങളിലെ കുട്ടികൾക്ക് വിതരണം ചെയ്യുന്നു.
ഇതിന്റെ ജില്ലാ തല ഉദ്ഘാടനം നവംബർ 14 ന് രാവിലെ 11.30ന് താവക്കര ഗവ. യു.പി സ്കൂളിൽ കണ്ണൂർ സിറ്റി അഡീഷണൽ പൊലീസ് സൂപ്രണ്ട് എ.വി.പ്രദീപ് നിർവ്വഹിക്കും. വിദ്യാഭ്യാസ ഉപ ഡയറക്ടർ വി എ ശശീന്ദ്രവ്യാസ് മുഖ്യാതിഥിയാവും. കോവിഡ് ലോക് ഡൗൺ സമയത്ത് കണ്ണൂർ ജില്ലയിൽ ആരംഭിച്ച ഈ പ്രവർത്തനം പിന്നീട് സംസ്ഥാന തലത്തിൽ ഏറ്റെടുക്കുകയും തുടർച്ചയായി മൂന്ന് വർഷങ്ങൾ തുടരുകയും ചെയ്തിട്ടുണ്ട്. കഴിഞ്ഞ വർഷം കണ്ണൂർ ജില്ലയിൽ നിന്ന് 8.15 ലക്ഷം രൂപയുടെ സമ്മാനപ്പൊതികൾ കുട്ടികൾക്ക് വിതരണം ചെയ്തിട്ടുണ്ട്. ജില്ലയിലെഏഴ് പോലീസ് സബ്ബ് ഡിവിഷനുകളിലും പോലീസ് സ്റ്റേഷൻ, സ്കൂളുകൾ എന്നിവ കേന്ദ്രീകരിച്ചും വിവിധ ശിശുദിനാചരണ പരിപാടികൾ സംഘടിപ്പിക്കുന്നുണ്ട്.