Latest News

സാനിറ്ററി പാഡ് നിര്‍മ്മാണ രംഗത്ത് ശ്രദ്ധനേടി ക്യൂ ഡെയ്‌സ്

അരുണാചലം മുരുകാനന്ദനെന്ന പാഡ് മാനെ നമുക്കറിയാം. ഇന്ത്യയിലെ പാവപ്പെട്ട സ്ത്രീകള്‍ക്ക് കുറഞ്ഞ വിലയില്‍ സാനിറ്ററി നാപ്കിനുകള്‍ക്ക് എത്തിച്ച വ്യക്തി. അതുപോലെ തന്ന സാനിറ്ററി നാപ്കിനുകളുടെ നിര്‍മ്മാണത്തിലും  വില്‍പ്പനയിലും ശ്രദ്ധനേടുകയാണ് 'ക്യൂ ഡെയ്‌സ്' എന്ന ബ്രാന്‍ഡും. കൊല്ലം തൊടിയൂരില്‍ നിന്നുള്ള  സാരഥി കുടുംബശ്രീയുടെ ആക്ടിവിറ്റി ഗ്രൂപ്പാണ്  ഈ ഉല്‍പ്പന്നത്തിന് പിന്നില്‍. കുത്തക കമ്പനികളുടെ വിവിധ ബ്രാന്‍ഡുകളിലും വിലകളിലുമുള്ള സാനിറ്ററി പാഡുകള്‍ വിപണി കീഴടക്കുമ്പോള്‍ ഗദ്ദികയില്‍ ഇവരൊരുക്കിയ സാനിറ്ററി നാപ്കിന്‍ സ്റ്റാളിലും തിരക്കിനൊട്ടും കുറവില്ല.  പരമ്പരാഗത വസ്തുക്കളുടെയും ഭക്ഷ്യ വിഭവങ്ങളുടെയും വര്‍ണശബളമായ  കാഴ്ചകള്‍ക്കൊണ്ട് നിറഞ്ഞ ഗദ്ദിക സ്റ്റാളുകളില്‍  സന്ദര്‍ശകരുടെ ശ്രദ്ധയാകര്‍ഷിച്ച ഒരിടമാണിത്. പൂര്‍ണ്ണമായും കോട്ടണ്‍ ഉപയോഗിച്ചുള്ള പാഡുകളാണ്  വില്പനയ്ക്കായി വെച്ചിട്ടുള്ളത്. 100 രൂപയ്ക്ക് മൂന്ന് പായ്ക്കറ്റുകള്‍ എന്ന നിരക്കിലാണ് വില്പന. വിവിധ വലിപ്പത്തിലുള്ള  നാപ്കിനുകള്‍ ലഭ്യമാണ്. പൂര്‍ണ്ണമായും കോട്ടണ്‍ ഉപയോഗിക്കുന്നത് കൊണ്ട് തന്നെ മറ്റ് ആരോഗ്യപ്രശ്‌നങ്ങള്‍ ഒന്നും ഇതിന്റെ ഉപയോഗം കൊണ്ട് ഉണ്ടാവില്ലെന്ന് സ്റ്റാള്‍ നടത്തിപ്പുകാരായ ശ്രീകലയും മീനയും ഉറപ്പ് പറയുന്നു. കോട്ടണ്‍ ആയത് കൊണ്ടും  കുടുംബശ്രീ ഉത്പന്നമായതിനാലും  ആവശ്യക്കാര്‍ നിസംശയം ഉല്‍പ്പന്നം വാങ്ങുന്നുണ്ടെന്നാണ് ഇവര്‍ പറയുന്നത്.  സ്റ്റാളില്‍ വെച്ച് തന്നെയാണ് നാപ്കിനുകള്‍ പാക്ക് ചെയ്യുന്നത്. സാധാരണ പാക്കറ്റില്‍ 8 നാപ്കിനുകള്‍ ആണുള്ളത്. വലുപ്പം കൂടിയ നാപ്കിന്‍ ആണെങ്കില്‍ ആറ് എണ്ണവും. ഗദ്ദിക മേള എട്ട് ദിവസം പിന്നിടുമ്പോള്‍  മെച്ചപ്പെട്ട വരുമാനം ഉണ്ടാക്കാന്‍ ഇവര്‍ക്ക് സാധിച്ചു. വിപണിയില്‍ സുലഭമായ ബ്രാന്‍ഡഡ്  ഉല്‍പ്പന്നങ്ങളോടാണ് ഏവര്‍ക്കും പ്രിയമെങ്കിലും തങ്ങളുടെ ഉല്‍പ്പന്നത്തിനും നല്ല അംഗീകാരമാണ് മേളയില്‍ ലഭിച്ചതെന്ന് സംരംഭകര്‍ പറയുന്നു.