Latest News

ഓണത്തിന് പറിക്കാന്‍ ഒരു കൊട്ട പൂവ്

ഓണത്തിന് തദ്ദേശീയമായി പൂക്കള്‍ ലഭ്യമാക്കുന്നതിനായി ജില്ലാ പഞ്ചായത്ത് ആരംഭിക്കുന്ന ഓണത്തിന് പറിക്കാന്‍ ഒരു കൊട്ട പൂവ് പദ്ധതിയിലേക്ക് അപേക്ഷ ക്ഷണിച്ചു. പുഷ്പ കൃഷിയുടെ പ്രോത്സാഹനവും നാടന്‍ പൂക്കളുടെ വിപണനവുമാണ് പദ്ധതിയിലൂടെ ലക്ഷ്യമിടുന്നത്. ഇതിനായി ചെണ്ടുമല്ലി(ചെട്ടിപ്പൂവ്) യുടെ തൈകളാണ് 75 ശതമാനം സബ്സിഡിയോടെ കര്‍ഷക ഗ്രൂപ്പുകള്‍ക്ക് ലഭ്യമാക്കുക. ഗ്രാമപഞ്ചായത്തുകളില്‍ പദ്ധതി നടപ്പിലാക്കുന്നതിനായി 2019-20 വാര്‍ഷിക പദ്ധതിയിലുള്‍പ്പെടുത്തി 20 ലക്ഷം രൂപയാണ് വകയിരുത്തിയിട്ടുള്ളത്. കൃഷി വകുപ്പിന്റെ കീഴിലുള്ള ജില്ലാ കൃഷി തോട്ടം, കാങ്കോല്‍ ഫാം, പാലയാട് നഴ്സറി എന്നിവിടങ്ങളില്‍ നിന്ന് തൈകള്‍ കൃഷി ഭവനുകളില്‍ എത്തിക്കും. താല്‍പര്യമുള്ള കര്‍ഷക ഗ്രൂപ്പുകള്‍, സ്വയം സഹായ സംഘങ്ങള്‍, കുടുംബശ്രീകള്‍ എന്നിവര്‍ ജൂണ്‍ പത്തിനകം ബന്ധപ്പെട്ട കൃഷി ഭവനില്‍ അപേക്ഷിക്കണം. ജൂണ്‍ അവസാന വാരത്തോടെ കൃഷി ഭവനുകളില്‍ നിന്നും തൈകള്‍ വിതരണം ചെയ്യും.
വാഹനം ആവശ്യമുണ്ട്
വനിതാ ശിശുവികസന വകുപ്പിന് കീഴില്‍ ഇരിണാവില്‍ പ്രവര്‍ത്തിക്കുന്ന ഐ സി ഡി എസ് പ്രൊജക്ട് ഓഫീസിന്റെ ഔദ്യോഗിക ആവശ്യത്തിനായി കരാര്‍ അടിസ്ഥാനത്തില്‍ വാഹനം ലഭ്യമാക്കുന്നതിന് ദര്‍ഘാസ് ക്ഷണിച്ചു. ജൂണ്‍ 12 ന് ഉച്ചക്ക് ഒരു മണി വരെ ദര്‍ഘാസുകള്‍ സ്വീകരിക്കും.  ഫോണ്‍: 0497 2867040.